Taittiriyabrahmana 3.3.5
Taittirīyabrāhmaṇa 3.3.5
- Language
- Sanskrit
3.3.5.1
devāsurā́ḥ sáṃyāttā āsan /
sá etám índra ā́jyasyāvakāśám apaśyat /
ténā́vaikṣata /
táto devā́ ábhavan /
párā_ásurāḥ /
yá eváṃ vidvā́n ā́jyam avékṣate /
bhávaty ātmánā /
párā_asya bhrā́tṛvyo bhavati /
brahmavādíno vadanti /
yádā́jyenānyā́ni havī́m̐ṣy abhighāráyati //
3.3.5.2
átha kéna_ā́jyam íti /
satyéna_íti brūyāt /
cákṣur vái satyám /
satyénaiváinad abhíghārayati /
īśvaró vā́ eṣò 'ndhó bhávitoḥ /
yáś cákṣuṣā_ā́jyam avékṣate /
nimī́lyā́vekṣeta /
dādhā́ra_ātmán cákṣuḥ /
abhy ā́jyaṃ ghārayati /
ā́jyaṃ gṛhṇāti //
3.3.5.3
chándām̐si vā́ ā́jyam /
chándām̐sy evá prīṇāti /
catúr juhvāṃ gṛhṇāti /
cátuṣpādaḥ paśávaḥ /
paśū́n evá_avarundhe /
aṣṭā́v upabhṛ́ti /
aṣṭā́kṣarā gāyatrī́ /
gāyatráḥ prāṇáḥ /
prāṇám evá paśúṣu dadhāti /
catúr dhruvā́yām //
3.3.5.4
cátuṣpādaḥ paśávaḥ /
paśúṣv evá_upáriṣṭāt prátitiṣṭhati /
yajamānadevatyā̀ vái juhū́ḥ /
bhrātṛvyadevatyā̀_upabhṛ́t /
catúr juhvā́ṃ gṛhṇán bhū́yo gṛhṇīyāt /
aṣṭā́v upabhṛ́ti gṛhṇán kánīyaḥ /
yájamānāya_evá bhrā́tṛvyam úpastiṃ karoti /
gáur vái srúvaḥ /
catúr juhvā́ṃ gṛhṇāti /
tásmāc cátuṣpadī //
3.3.5.5
aṣṭā́v upabhṛ́ti /
tásmād aṣṭā́śaphā /
catúr dhruvā́yām /
tásmāc cátustanā /
gā́m evá tát sám̐skaroti /
sā́_asmai sám̐skṛtā_íṣam ū́rjaṃ duhe /
yáj juhvā́ṃ gṛhṇā́ti /
prayājébhyas tát /
yád upabhṛ́ti /
prayājānūyājébhyas tát /
sárvasmai vā́ etád yajñā́ya gṛhyate /
yád dhruvā́yām ā́jyam //
Commentaries (4)
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (1)
- Vedic Index of Names and Subjects — Arthur A. Macdonell & A. Berriedale Keith, English