Pramāṇa · Search · About · API

Taittiriyabrahmana 3.3.7

Taittirīyabrāhmaṇa 3.3.7

Language
Sanskrit

3.3.7.1

agnínā vái hótrā /
devā́ ásurān abhyàbhavan /
agnáye samidhyámānāyā́nubrūhī́ty āha bhrā́tṛvyābhibhūtyai /
ékavim̐śatim idhmadārū́ṇi bhavanti /
ekavim̐śó vái púruṣaḥ /
púruṣasya_ā́ptyai /
páñcadaśa_idhmadārū́ṇy abhyā́dadhāti /
pañcadaśa vā́ ardhamāsásya rā́trayaḥ /
ardhamāsaśáḥ saṃvatsará āpyate /
trī́n paridhī́n páridadhāti //

3.3.7.2

ūrdhvé samídhāv ā́dadhāti /
anūyā́jébhyaḥ samídhamátiśinaṣṭi /
ṣáṭ sáṃpadyante /
ṣáḍ vā́ ṛtávaḥ /
ṛtū́n evá prīṇāti /
vedéna_úpavājayati /
prājāpatyó vái vedáḥ /
prājāpatyáḥ prāṇáḥ /
yájamāna āhavanī́yaḥ /
yájamāna evá prāṇáṃ dadhāti //

3.3.7.3

trír úpavājayati /
tráyo vái prāṇā́ḥ /
prāṇā́n evá_asmin dadhāti /
vedéna_upayátya sruvéṇa prājāpatyám āghārám āghārayati /
yajñó vái prajā́patiḥ /
yajñám evá prajā́ptiṃ mukhatá ā́rabhate /
átho prajā́patiḥ sárvā devátāḥ /
sarvā́ evá devátāḥ prīṇāti /
agním agnīt trís_triḥ sáṃmṛḍḍhī́ty āha /
tryā̀vṛd dhí yajñáḥ //

3.3.7.4

átho rákṣasām ápahatyai /
paridhī́nt sáṃmārṣṭi /
punā́ty eváinān /
trís_triḥ sáṃmārṣṭi /
tryā̀vṛd dhí yajñáḥ /
átho medhyatvā́ya /
átho eté vái devāśvā́ḥ /
devāśvā́n evá tát sáṃmārṣṭi /
suvargásya lokásya sámaṣṭyai /
ā́sīno 'nyám āghārám ā́ghārayati //

3.3.7.5

tíṣṭhann anyám /
yáthā_áno vā ráthaṃ vā yuñjyā́t /
evám evá tád adhvaryúr yajñáṃ yunakti /
suvargásya lokásyābhyū̀ḍhyai /
váhanty enaṃ grāmyā́ḥ paśávaḥ /
yá eváṃ véda /
bhúvanam asi víprathasva_íty āha /
yajñó vái bhúvanam /
yajñá evá yájamānaṃ prajáyā paśúbhiḥ prathayati /
ágne yáṣṭar idáṃ náma íty āha //

3.3.7.6

agnír vái devā́nāṃ yáṣṭā /
yá evá devā́nāṃ yáṣṭā /
tásmā evá námaskaroti /
júhv éhy agnís tvā hvayati devayajyā́yā úpabhṛd éhi devás tvā savitā́ hvayati devayajyā́yā íty āha /
āgneyī́ vái juhū́ḥ /
sāvitry ùpabhṛ́t /
tā́bhyām eváine prásūta ā́datte /
ágnāviṣṇū mā́_āvām ávakramiṣam íty āha /
agníḥ purástāt /
víṣṇur yajñáḥ paścā́t //

3.3.7.7

tā́bhyām evá pratiprócyātyā́krāmati /
víjihāthāṃ mā́ mā sáṃtāptam íty āhā́him̐sāyai /
lokáṃ me lokakṛtau kṛṇutam íty āha /
āśíṣam eváitā́m ā́śāste /
víṣṇoḥ sthā́nam asī́ty āha /
yajñó vái víṣṇuḥ /
etát khálu vái devā́nām áparājitam āyátanam /
yád yajñáḥ /
devā́nām evá_aparājita āyátane tiṣṭhati /
itá índro akṛṇod vīryā̀ṇī́ty āha //

3.3.7.8

indriyám evá yájamāne dadhāti /
samārábhya_ūrdhvó adhvaró divispṛ́śam íty āha vṛ́ddhyai /
āghārám āghāryámāṇam ánu samārábhya /
etásmin kālé devā́ḥ suvargáṃ lokám āyan /
sākṣā́d evá yájamānaḥ suvargáṃ lokám eti /
átho sámṛddhenaivá yajñéna yájamānaḥ suvargáṃ lokám eti /
áhruto yajñó yajñápater íty āhā́nārtyai /
índrāvānt svā́hā_íty āha /
indriyám evá yájamāne dadhāti /
bṛhád bhā́ íty āha //

3.3.7.9

suvargó vái lokó bṛhád bhā́ḥ /
suvargásya lokásya sámaṣṭyai yajamānadevatyā̀ vái juhū́ḥ /
bhrā́tṛvyadevatyā̀_upabhṛ́t /
prāṇá āghāráḥ /
yát sam̐sparśáyet /
bhrā́tṛvye 'sya prāṇáṃ dadhyāt /
ásam̐sparśayann atyā́krāmati /
yájamāna evá prāṇáṃ dadhāti /
pāhí mā_agne dúścaritād ā́ mā súcarite bhaja_íty āha //

3.3.7.10

agnír vā́vá pavítram /
vṛjinám ánṛtaṃ dúścaritam /
ṛjukarmám̐ satyám̐ súcaritam /
agnír eváinaṃ vṛjinā́d ánṛtād dúścaritāt pāti /
ṛjukarmé satyé súcarite bhajati tásmād evám ā́śāste /
ātmáno gopīthā́ya /
śíro vā́ etád yajñásya /
yád āghāráḥ /
ātmā́ dhruvā́ //

3.3.7.11

āghārám āghā́rya dhruvā́m̐ sámanakti /
ātmánn evá yajñásya śíraḥ prátidadhāti /
dvíḥ sámanakti /
dváu hí prāṇāpānáu /
tád āhuḥ /
trír evá sámañjyāt /
trídhātu hí śíra íti /
śíra iva_etád yajñásya /
átho tráyo vái prāṇā́ḥ /
prāṇā́n evā́smin dadhāti /
makhásya śíro 'si sáṃ jyótiṣā jyótir aṅktām íty āha /
jyótir evā́smā upáriṣṭād dadhāti /
suvargásya lokásyā́nukhyātyai //

Commentaries (4)

Linked texts (2)