Pramāṇa · Search · About · API

Taittiriyabrahmana 3.3.8

Taittirīyabrāhmaṇa 3.3.8

Language
Sanskrit

3.3.8.1

dhíṣṇiyā vā́ eté nyùpyante /
yád brahmā́ /
yád dhótā /
yád adhvaryúḥ /
yád agnī́t /
yád yájamānaḥ /
tā́n yád antareyā́t /
yájamānasya prāṇā́nt sáṃkarṣet /
pramā́yukaḥ syāt /
puroḍā́śam apagṛ́hya sáṃcaraty adhvaryúḥ //

3.3.8.2

yájamānāya_evá tál lokám̐ śim̐ṣati /
ná_asya prāṇā́nt sáṃkarṣati /
ná pramā́yuko bhavati /
purástāt pratyáṅṅ ā́sīnaḥ /
íḍāyā íḍām ā́dadhāti /
hástyām̐ hótre /
paśávo vā́ íḍā /
paśávaḥ púruṣaḥ /
paśúṣv evá paśū́n prátiṣṭhāpayati /
íḍāyai vā́ eṣā́ prájātiḥ //

3.3.8.3

tā́ṃ prájātiṃ yájamāno 'nu prájāyate /
dvír aṅgúlāv anakti párvaṇoḥ /
dvipā́d yájamānaḥ prátiṣṭhityai /
sakṛ́d úpastṛṇāti /
dvír ā́dadhāti /
sakṛ́d abhíghārayati /
catúḥ sáṃpadyate /
catvā́ri vái paśóḥ pratiṣṭhā́nāni /
yā́vān evá paśúḥ /
tám úpahvayate //

3.3.8.4

múkham iva práty úpahvayeta /
saṃmukhā́n evá paśū́núpahvayate /
paśávo vā́ íḍā /
tásmāt sā́_anvārábhyā /
adhvaryúṇā ca yájamānena ca /
úpahūtaḥ paśumā́n asānī́ty āha /
úpa hy ènau hváyate hótā /
íḍāyai devátānām upahavé /
úpahūtaḥ paśumā́n bhavati /
yá eváṃ véda //

3.3.8.5

yā́ṃ vái hástyām íḍām ādádhāti /
vācáḥ sā́ bhāgadhéyam /
yā́m upahváyate /
prāṇā́nām̐ sā́ /
vā́caṃ caivá prāṇā́m̐ś cā́varundhe /
átha vā́ etárhy úpahūtāyām íḍāyām /
puroḍā́śasyaivá barhiṣádo mīmām̐sā́ /
yájamānaṃ devā́ abruvan /
havír no nírvapa_íti /
ná_ahám abhāgó nírvapsyāmī́ty abravīt //

3.3.8.6

ná máyā_abhāgáyā_ánuvakṣyatha_íti vā́g abravīt /
ná_ahám abhāgā́ puro'nuvākyā̀ bhaviṣyāmī́ti puro'nuvākyā̀ /
ná_ahám abhāgā́ yājyā̀ bhaviṣyāmī́ti yājyā̀ /
ná máyā_abhāgéna váṣaṭkariṣyatha_íti vaṣaṭkāráḥ /
yád yajamānabhāgáṃ nidhā́ya puroḍā́śaṃ barhiṣádaṃ karóti /
tā́n evá tád bhā́ginaḥ karoti /
caturdhā́ karoti /
cátasro díśaḥ /
dikṣv èvá prátitiṣṭhati /
barhiṣádaṃ karoti //

3.3.8.7

yájamāno vái puroḍā́śaḥ /
prajā́ barhíḥ /
yájamānamevá prajā́su prátiṣṭhāpayati /
tásmād asthnā́_anyā́ḥ prajā́ḥ pratitíṣṭhanti /
mām̐sénānyā́ḥ /
átho khálv āhuḥ /
dákṣiṇā vā́ etā́ havíryajñásyāntarvedy ávarudhyante /
yát puroḍā́śaṃ barhiṣádaṃ karótī́ti /
caturdhā́ karoti /
catvā́ro hy èté haviryajñásya_ṛtvíjaḥ //

3.3.8.8

brahmā́ hótā_adhvaryúr agnī́t /
tám abhímṛśet /
idáṃ brahmáṇaḥ /
idám̐ hótuḥ /
idám adhvaryóḥ /
idám agnī́dha íti /
yáthā_evā́dáḥ saumyè 'dhvaré /
ādéśam ṛtvígbhyo dákṣiṇā nīyánte /
tādṛ́g evá tát /
agnī́dhe prathamā́yā_ā́dadhāti //

3.3.8.9

agnímukhā hy ṛ́ddhiḥ /
agnímukhām evá_ṛddhiṃ yájamāna ṛdhnoti /
sakṛ́d upastī́rya dvír ādádhat /
upastī́rya dvír abhíghārayati /
ṣáṭ sáṃpadyante /
ṣáḍ vā́ ṛtávaḥ /
ṛtū́n evá prīṇāti /
vedéna brahmáṇe brahmabhāgáṃ páriharati /
prājāpatyó vái vedáḥ /
prājāpatyó brahmā́ //

3.3.8.10

savitā́ yajñásya prásṛtyai /
átha kā́mam anyéna /
táto hótre /
mádhyaṃ vā́ etád yajñásya /
yád dhótā /
madhyatá evá yajñáṃ prīṇāti /
áthādhvaryáve /
pratiṣṭhā́ vā́ eṣā́ yajñásya /
yád adhvaryúḥ /
tásmād dhaviryajñásya_etā́m evá_āvṛ́tam ánu //

3.3.8.11

anyā́ dákṣiṇā nīyante /
yajñásya prátiṣṭhityai /
agním agnīt sakṛ́t_sakṛt sáṃmṛḍḍhī́ty āha /
párāṅ iva hy ètárhi yajñáḥ /
iṣitā́ dáivyā hótāra íty āha /
iṣitám̐ hí kárma kriyáte /
bhadravā́cyāya préṣito mā́nuṣaḥ sūktavākā́ya sūktā́ brūhī́ty āha /
āśíṣam eváitā́m ā́śāste /
svagā́ dáivyā hótṛbhya íty āha /
yajñám evá tát svagā́ karoti /
svastír mā́nuṣebhya íty āha /
āśíṣam eváitā́m ā́śāste /
śaṃyór brūhī́ty āha /
śaṃyúm evá bārhaspatyáṃ bhāgadhéyena sámardhayati //

Commentaries (4)

Linked texts (3)