Pramāṇa · Search · About · API

Taittiriyabrahmana 3.3.9

Taittirīyabrāhmaṇa 3.3.9

Language
Sanskrit

3.3.9.1

átha srúcāv anuṣṭúgbhyāṃ vā́javatībhyāṃ vyū̀hati /
pratiṣṭhā́ vā́ anuṣṭúk /
ánnaṃ vā́jaḥ prátiṣṭhityai /
annā́dyasyā́varudhyai /
prā́cīṃ juhū́m ūhati /
jātā́n evá bhrā́tṛvyān práṇudate /
pratī́cīm upabhṛ́tam /
janiṣyámāṇān evá prátinudate /
sá víṣūca evá_apóhya sapátnān yájamānaḥ /
asmín loké prátitiṣṭhati //

3.3.9.2

dvā́bhyām /
dvípratiṣṭho hí /
vásubhyas tvā rudrébhyas tvā_ādityébhyas tvā_íty āha /
yathāyajúr eváitát /
srukṣú prastarám anakti /
imé vái lokā́ḥ srúcaḥ /
yájamānaḥ prastaráḥ /
yájamānam evá téjasā_anakti /
tredhā́_anakti /
tráya imé lokā́ḥ //

3.3.9.3

ebhyá eváinaṃ lokébhyo 'nakti /
abhipūrvám anakti /
abhipūrvám evá yájamānaṃ téjasā_anakti /
aktám̐ ríhāṇā íty āha /
téjo vā́ ā́jyam /
yájamānaḥ prastaráḥ /
yájamānam evá téjasā_anakti /
viyántu váya íty āha /
váya eváinaṃ kṛtvā́ /
suvargáṃ lokáṃ gamayati //

3.3.9.4

prajā́ṃ yóniṃ mā́ nírmṛkṣam íty āha /
prajā́yai gopīthā́ya /
ā́pyāyantām ā́pa óṣadhaya íty āha /
ā́pa evá_oṣadhīr ā́pyāyayati /
marútāṃ pṛ́ṣatayaḥ stha_íty āha /
marúto vái vṛ́ṣṭyā īśate /
vṛ́ṣṭim eva_ávarundhe /
dívaṃ gaccha táto no vṛ́ṣṭim éraya_íty āha /
vṛ́ṣṭir vái dyáuḥ /
vṛ́ṣṭim evá_avarundhe //

3.3.9.5

yā́vad vā́ adhvaryúḥ prastaráṃ prahárati /
tā́vad asya_ā́yur mīyate /
āyuṣpā́ agne 'sya_ā́yur me pāhī́ty āha /
ā́yur evá_ātmán dhatte /
yā́vad vā́ adhvaryúḥ prastaráṃ prahárati /
tā́vad asya cákṣur mīyate /
cakṣuṣpā́ agne 'si cákṣur me pāhī́ty āha /
cákṣur evá_ātmán dhatte /
dhruvā́_asī́ty āha prátiṣṭhityai /
yáṃ paridhíṃ paryádhatthā íty āha //

3.3.9.6

yathāyajúr eváitát /
ágne deva paṇíbhir vīryámāṇa íty āha /
agnáya eváinaṃ júṣṭaṃ karoti /
táṃ ta etám ánu jóṣaṃ bharāmī́ty āha /
sajātā́n evā́smā ánukān karoti /
ná_id eṣá tvád apacetáyātā íty āhā́nukhyātyai /
yajñásya pā́tha úpa sámitam íty āha /
bhūmā́nam evá_upaiti /
paridhī́n práharati /
yajñásya sámiṣṭyai //

3.3.9.7

srúcau sáṃprásrāvayati /
yád evá tátra krūrám /
tát téna śamayati /
juhvā́m upabhṛ́tam /
yajamānadevatyā̀ vái juhū́ḥ /
bhrātṛvyadevatyā́_upabhṛ́t /
yájamānāya_evá bhrā́tṛvyam úpastiṃ karoti /
sam̐srāvábhāgāḥ stha_íty āha /
vásavo vái rudrā́ ādityā́ḥ sam̐srāvábhāgāḥ /
téṣāṃ tád bhāgadhéyam //

3.3.9.8

tā́n evá téna prīṇāti /
vaiśvadevyā́_ṛcā́ /
eté hí víśve devā́ḥ /
triṣṭúg bhavati /
indriyáṃ vái triṣṭúk /
indriyám evá yájamāne dadhāti /
agnér vām ápannagṛhasya sádasi sādayāmī́ty āha /
iyáṃ vā́ agnír ápannagṛhaḥ /
asyā́ eváine sádane sādayati /
sumnā́ya sumninī sumné mā dhattam íty āha //

3.3.9.9

prajā́ vái paśávaḥ sumnám /
prajā́m evá paśū́n ātmán dhatte /
dhurí dhuryàu pā́tam íty āha /
jāyāpatyór gopīthā́ya /
ágne 'dabdhāyo 'śītatano íty āha /
yathāyajúr eváitát /
pāhí mā_adyá diváḥ pāhí prásityai pāhí dúriṣṭyai pāhí duradmanyái pāhí dúścaritād íty āha /
āśíṣam eváitā́m ā́śāste /
áviṣaṃ naḥ pitúṃ kṛṇu suṣádā yónim̐ svā́hā_ítīdhmasaṃvṛ́ścanāny anvāhāryapácane 'bhyādhā́ya phalīkaraṇahomáṃ juhoti /
átiriktāni vā́ idhmasaṃvṛ́ścanāni //

3.3.9.10

átiriktāḥ phalīkáraṇāḥ /
átiriktam ājya_uccheṣaṇám /
átirkita evá_átiriktaṃ dadhāti /
átho átiriktenaivá_átiriktam āptvā́_ávarundhe /
védir devébhyo nílāyata /
tā́ṃ vedénā́nvavindan /
vedéna védiṃ vividuḥ pṛthivī́m /
sā́ paprathe pṛthivī́ pā́rthivāni /
gárbhaṃ bibharti bhúvaneṣv antáḥ /
táto yajñó jāyate viśvadā́nir íti purástāt stambayajúṣo vedéna védim̐ sáṃmārṣṭy ánuvittyai //

3.3.9.11

átho yád vedáś ca védiś ca bhávataḥ /
mithunatvā́ya prájātyai /
prajā́pater vā́ etā́ni śmáśrūṇi /
yád vedáḥ /
pátniyā upástha ā́syati /
mithunám evá karoti /
vindáte prajā́m /
vedám̐ hótā_ā́havanī́yāt stṛṇánn eti /
yajñám evá tát sáṃtanoty ā́_úttarasmād ardhamāsā́t /
tám̐ sáṃtatam úttare 'rdhamāsá ā́labhate //

3.3.9.12

táṃ kālé_kāla ā́gate yajate /
brahmavādíno vadanti /
sá tvā́ adhvaryúḥ syāt /
yó yáto yajñáṃ prayuṅkté /
tád enaṃ pratiṣṭhāpáyatī́ti /
vā́tād vā́ adhvaryúr yajñáṃ práyuṅkte /
dévā gātuvido gātúṃ vittvā́ gātúm ita_íty āha /
yáta evá yajñáṃ prayuṅkté /
tád enaṃ prátiṣṭhāpayati /
prátitiṣṭhati prajáyā paśúbhir yájamānaḥ //

Commentaries (4)

Linked texts (2)