Taittiriyabrahmana 3.5.8
Taittirīyabrāhmaṇa 3.5.8
- Language
- Sanskrit
3.5.8.1
úpahūtam̐ rathaṃtarám̐ sahá pṛthivyā́ /
úpa mā rathaṃtarám̐ sahá pṛthivyā́ hvayatām /
úpahūtaṃ vāmadevyám̐ sahá_antárikṣeṇa /
úpa mā vāmadevyám̐ sahá_antárikṣeṇa hvayatām /
úpahūtaṃ bṛhát sahá divā́ /
úpa mā bṛhát sahá divā́ hvayatām /
úpahūtāḥ saptá hótrāḥ /
úpa mā saptá hotrā hvayantām /
úpahūtā dhenúḥ sahá_ṛṣabhā /
úpa mā dhenúḥ sahá_ṛṣabhā hvayatām //
3.5.8.2
úpahūto bhakṣáḥ sákhā /
úpa mā bhakṣáḥ sákhā hvayatām /
úpahūtā́3ṃ hó /
íḍā_úpahūtā /
úpahūtā_íḍā /
úpo asmā́m̐ íḍā hvayatām /
íḍā_úpahūtā /
úpahūtā_íḍā mānavī́ ghṛtápadī maitrāvaruṇī́ /
bráhma devákṛtam úpahūtam //
3.5.8.3
dáivyā adhvaryáva úpahūtāḥ /
úpahūtā manuṣyā̀ḥ /
yá imáṃ yajñám ávān /
yé yajñápatiṃ várdhān /
úpahūte dyā́vāpṛthivī́ /
pūrvajé ṛtā́varī /
devī́ deváputre /
úpahūto 'yáṃ yájamānaḥ /
úttarasyāṃ devayajyā́yām úpahūtaḥ /
bhū́yasi haviṣkáraṇa úpahūtaḥ /
divyé dhā́mann úpahūtaḥ /
idáṃ me devā́ havír juṣantām íti tásminn úpahūtaḥ /
víśvam asya priyam úpahūtam /
víśvasya priyásya_úpahūtasya_úpahūtaḥ //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (4)
- Āśvalāyanaśrautasūtra (ed. Rāmanārāyaṇa Vidyāratna, Calcutta) — Sanskrit
- A Vedic Concordance — Maurice Bloomfield, English
- The Religion and Philosophy of the Veda and Upanishads — Arthur Berriedale Keith, English
- Darśapūrṇamāsaprakāśa — Vāmana Śāstrin Kiṃjavaḍekara, Sanskrit