Taittiriyabrahmana 3.6.1
Taittirīyabrāhmaṇa 3.6.1
- Language
- Sanskrit
3.6.1.1
añjánti tvā́m adhvaré devayántaḥ /
vánaspate mádhunā dáivyena /
yád ūrdhvás tiṣṭhād dráviṇā_ihá dhattāt /
yád vā kṣáyo mātúr asyā́ upásthe /
úcchrayasva vanaspate /
várṣaman pṛthivyā́ ádhi /
súmitī mīyámānaḥ /
várco dhā yajñávāhase /
sámiddhasya śráyamāṇaḥ purástāt /
bráhma vanvānó ajáram̐ suvī́ram //
3.6.1.2
āré asmád ámatiṃ bā́dhamānaḥ /
úcchrayasva mahaté sáubhagāya /
ūrdhvá ū ṣú ṇa ūtáye /
tíṣṭhā devó ná savitā́ /
ūrdhvó vā́jasya sánitā yád añjíbhiḥ /
vāghádbhir vihváyāmahe /
ūrdhvó naḥ pāhy ám̐haso níketúnā /
víśvam̐ sám attríṇaṃ daha /
kṛdhī́ na ūrdhvā́n ca ráthāya jīváse /
vidā́ devéṣu no dúvaḥ //
3.6.1.3
jātó jāyate sudinatvé áhnām /
sá maryá ā́ vidáthe várdhamānaḥ /
punánti dhī́rā apáso manīṣā́ /
devayā́ vípra údiryati vā́cam /
yúvā suvā́sāḥ párivīta ā́gāt /
sá u śréyān bhavati jā́yamānaḥ /
táṃ dhī́rāsaḥ kaváya únnayanti /
svādhíyo mánasā devayántaḥ /
pṛthupā́jā ámartyaḥ /
ghṛtánirṇik svā̀hutaḥ /
agnír yajñásya havyavā́ṭ /
tám̐ sabā́dho yatásrucaḥ /
itthā́ dhiyā́ yajñávantaḥ /
ā́cakrur agním ūtáye /
tváṃ váruṇa utá mitró agne /
tvā́ṃ vardhanti matíbhir vásiṣṭhāḥ /
tvé vásu suṣaṇanā́ni santu /
yūyáṃ pāta svastíbhiḥ sádā naḥ //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (3)
- A Vedic Concordance — Maurice Bloomfield, English
- Āśvalāyanasaṃhitā — Sanskrit
- Vaidikasūktasaṅgraha — Sanskrit