Pramāṇa · Search · About · API

Taittiriyabrahmana 3.6.10

Taittirīyabrāhmaṇa 3.6.10

Language
Sanskrit

3.6.10.1

tvám̐ hy àgne prathamó manótā /
asyā́ dhiyó ábhavo dasma hótā /
tvám̐ sīṃ vṛṣann akṛṇor duṣṭárītu /
sáho víśvasmai sáhase sáhadhyai /
ádhā hótā nyàsīdo yájīyān /
iḍás padá iṣáyann ī́ḍyaḥ sán /
táṃ tvā náraḥ prathamáṃ devayántaḥ /
mahó rāyé citáyanto ánugman /
vṛtā́_iva yántaṃ bahúbhir vasavyàiḥ /
tvé rayíṃ jāgṛvā́m̐so ánugman //

3.6.10.2

rúśantam agníṃ darśatáṃ bṛhántam /
vapā́vantaṃ viśváhā dīdivā́m̐sam /
padáṃ devásya námasā viyántaḥ /
śravasyávaḥ śrava āpann ámṛktam /
nā́māni cid dadhire yajñíyāni /
bhadrā́yāṃ te raṇayanta sáṃdṛṣṭau /
tvā́ṃ vardhanti kṣitáyaḥ pṛthivyā́m /
tvám̐ rā́ya ubháyāso jánānām /
tváṃ trātā́ taraṇe cétyo 'bhūḥ /
pitā́ mātā́ sádam ín mā́nuṣāṇām //

3.6.10.3

sá paryéṇyaḥ sá priyó vikṣv àgníḥ /
hótā mandró níṣasādā yájīyān /
táṃ tvā vayáṃ dáma ā́ dīdivā́m̐sam /
úpa jñubā́dho námasā sadema /
táṃ tvā vayám̐ sudhíyo návyam agne /
sumnāyáva īmahe devayántaḥ /
tváṃ víśo anayo dī́dyānaḥ /
divó agne bṛhatā́ rocanéna /
viśā́ṃ kavíṃ viśpátim̐ śaśvatīnām /
nitóśanaṃ vṛṣabháṃ carṣaṇīnām //

3.6.10.4

prétīṣaṇim iṣáyantaṃ pāvakám /
rā́jantam agníṃ yajatám̐ rayīṇā́m /
só agna īje śaśamé ca mártaḥ /
yásta ā́naṭ samídhā havyádātim /
yá ā́hutiṃ pári védā námobhiḥ /
víśvā_ít sá vāmā́ dadhate tvótaḥ /
asmā́ u te máhi mahé vidhema /
námobhir agne samídhā_utá havyáiḥ /
védī sūno sahaso gīrbhír uktháiḥ /
ā́ te bhadrā́yām̐ sumatáu yatema //

3.6.10.5

ā́ yás tatántha ródasī ví bhāsā́ /
śrávobhiś ca śravasyàs tárutraḥ /
bṛhádbhir vā́jaiḥ sthávirebhir asmé /
revádbhir agne vitaráṃ víbhāhi /
nṛvád vaso sádam íd dhehy asmé /
bhū́ri tokā́ya tánayāya paśváḥ /
pūrvī́r íṣo bṛhatī́r āré aghāḥ /
asmé bhadrā́ sauśravasā́ni santu /
purū́ṇy agne purudhā́ tvāyā́ /
vásūni rājan vasútā te aśyām /
purū́ṇi hí tvé puruvāra sánti /
ágne vásu vidhaté rā́jani tvé //

Commentaries (4)

Linked texts (3)