<!-- Pramāṇa, a library of Indian primary sources · https://indike.org/pramana/in.veda.brahmana.taittiriya.3.6.11 -->

[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.6.11

# Taittiriyabrahmana 3.6.11

Taittirīyabrāhmaṇa 3.6.11

- **Language:** Sanskrit

### [3.6.11.1](https://indike.org/pramana/in.veda.brahmana.taittiriya.3.6.11.1)

ā́ bharatam̐ śikṣataṃ vajrabāhū /  
asmā́m̐ indrāgnī avatam̐ śácībhiḥ /  
imé nú té raśmáyaḥ sū́ryasya /  
yébhiḥ sapitváṃ pitáro na ā́yan /  
hótā yakṣad indrāgnī́ /  
chā́gasya havíṣa ā́ttām adyá /  
madhyató méda údbhṛtam /  
purā́ dvéṣobhyaḥ /  
purā́ páuruṣeyyā gṛbháḥ /  
ghástāṃ nūnám //

### [3.6.11.2](https://indike.org/pramana/in.veda.brahmana.taittiriya.3.6.11.2)

ghāsé\_ajrāṇāṃ yávasaprathamānām /  
sumátkṣarāṇām̐ śatárudriyāṇām /  
agniṣvāttā́nāṃ pī́vopavasanānām /  
pārśvatáḥ śroṇitáḥ śitāmatá utsādatáḥ /  
áṅgād\_aṅgād ávattānām /  
kárata evá\_indragnī́ /  
juṣétām̐ havíḥ /  
hótar yája /  
devébhyo vanaspate havī́m̐ṣi /  
híraṇyaparṇa pradívas te ártham //

### [3.6.11.3](https://indike.org/pramana/in.veda.brahmana.taittiriya.3.6.11.3)

pradakṣiṇíd raśanáyā niyū́ya /  
ṛtásya vakṣi pathíbhī rájiṣṭhaiḥ /  
hótā yakṣad vánaspátim, abhí hí /  
piṣṭátamayā rábhiṣṭhayā raśanáyā\_ádhita /  
yátra\_indrāgniyóś chā́gasya havíṣaḥ priyā́ dhā́māni /  
yátra vánaspáteḥ priyā́ pā́thām̐si /  
yátra devā́nām ājyapā́nāṃ priyā́ dhā́māni /  
yátrāgnér hótuḥ priyā́ dhā́māni /  
tátra\_etáṃ prastútyā\_iva\_upastútyā\_iva\_upā́vasrakṣat /  
rábhīyām̐sam iva kṛtvī́ //

### [3.6.11.4](https://indike.org/pramana/in.veda.brahmana.taittiriya.3.6.11.4)

kárad eváṃ devó vánaspátiḥ /  
juṣátām̐ havíḥ /  
hótar yája /  
piprīhí devā́m̐ uśató yaviṣṭha /  
vidvā́m̐ ṛtū́m̐ ṛtupate yaja\_ihá /  
yé dáivyā ṛtvíjas tébhir agne /  
tvám̐ hótṝṇām asy ā́yajiṣṭhāḥ /  
hótā yakṣad agním̐ sviṣṭakṛ́tam /  
áyāḍ agnír indrāgniyóś chā́gasya havíṣaḥ priyā́ dhā́māni /  
áyāḍ vánaspáteḥ priyā́ pā́thām̐si /  
áyāḍ devā́nām ājyapā́nāṃ priyā́ dhā́māni /  
yákṣad agnér hótuḥ priyā́ dhā́māni /  
yákṣat sváṃ mahimā́nam /  
ā́yajatām éjyā íṣaḥ /  
kṛṇotu só adhvarā́ jātávedāḥ /  
juṣátām̐ havíḥ /  
hótar yája //

## Commentaries (4)

- [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.194.56.95) — Sāyaṇa, Sanskrit
- [Taittirīyabrāhmaṇaṭīkā](https://indike.org/pramana/in.veda.brahmana.taittiriya!taittiriyabrahmanatika.70.2.54) — Sanskrit
- [Jñānayajña on the Taittirīya Brāhmaṇa (Bhaṭṭabhāskara)](https://indike.org/pramana/in.veda.brahmana.taittiriya!bhattabhaskara) — Bhaṭṭabhāskara Miśra, Sanskrit
- [Taittirīyabrāhmaṇakāṭhakabhāṣya](https://indike.org/pramana/in.veda.brahmana.taittiriya!bhatta-bhaskara-misra-cikaedamandana) — Bhaṭṭa Bhāskara Miśra Cikāeḍamaṇḍana, Sanskrit

## Linked texts (4)

- [Kāṭhakasaṃhitā](https://indike.org/pramana/in.veda.samhita.krsnayajur*kathaka.18.21) — Sanskrit
- [A Vedic Concordance](https://indike.org/pramana/ins.reference.bloomfield-1906.c6.941) — Maurice Bloomfield, English
- [The Religion and Philosophy of the Veda and Upanishads](https://indike.org/pramana/ins.religion.keith-1925.v1.c27.s5.24) — Arthur Berriedale Keith, English
- [Die Religion des Veda](https://indike.org/pramana/ins.religion.oldenberg-1894.c8.s5.44) — Hermann Oldenberg, German

---
Source: [https://indike.org/pramana/in.veda.brahmana.taittiriya.3.6.11](https://indike.org/pramana/in.veda.brahmana.taittiriya.3.6.11) · Pramāṇa