<!-- Pramāṇa, a library of Indian primary sources · https://indike.org/pramana/in.veda.brahmana.taittiriya.3.6.13.1 -->

[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.6.13.1

# Taittiriyabrahmana 3.6.13.1

Taittirīyabrāhmaṇa 3.6.13.1

- **Language:** Sanskrit

### [3.6.13.1](https://indike.org/pramana/in.veda.brahmana.taittiriya.3.6.13.1)

deváṃ barhíḥ sudeváṃ deváiḥ syā́t suvī́raṃ vīráir vástor vṛjyétāktóḥ prábhriyetā́ty anyā́n rāyā́ barhíṣmato madema vasuváne vasudhéyasya vetu yája /  
devī́r dvā́raḥ saṃghāté viḍvī́r yā́man\_śithirā́ dhruvā́ deváhūtau vatsá īm enās táruṇa ā́mimīyāt kumāró vā návajāto mā́\_enā árvā reṇúkakāṭaḥ pṛ́ṇag, vasuváne vasudhéyasya viyantu yája /  
devī́ uṣā́sā\_náktā\_adyā́smín yajñé prayaty àhvetām ápi nūnáṃ dáivīr víśaḥ prā́yāsiṣṭām̐ súprīte súdhite vasuváne vasudhéyasya vītāṃ yája /  
devī́ jóṣṭrī vásudhitī yáyor anyā́\_aghā́ dvéṣām̐si yuyávad ā́\_anyā́ vakṣad vásu vā́ryāṇi yájamānāya vasuváne vasudhéyasya vī́tāṃ yája /  
devī́ ūrjā́hutī iṣam ū́rjam anyā́\_āvakṣat sagdhim̐ sápītim anyā́ návena pū́rvaṃ dáyamānāḥ syā́ma purāṇéna návaṃ tā́m ū́rjam ūrjā́hutī ū́rjáyamāne adhātāṃ vasuváne vasudhéyasya vītāṃ yája /  
devā́ dáivyā hótārā néṣṭārā pótārā hatā́ghaśam̐sāv ābharádvasū vasuváne vasudhéyasya vītāṃ yája /  
devī́s tisrás tisró devī́r íḍā sárasvatī bhā́ratī dyā́ṃ bhā́raty ādityáir aspṛkṣat sárasvatī\_imám̐ rudráir yajñám āvīd ihá\_evá\_iḍayā vásumatyā sadhamā́daṃ madema vasuváne vasudhéyasya viyantu yája /  
devó nárāśam̐sas triśīrṣā́ ṣaḍakṣáḥ śatám íd enam̐ śitipṛṣṭhā́ ā́dadhati sahásram īṃ právahanti mitrā́varuṇā\_íd asya hotrám árhato bṛ́haspátiḥ stotrám aśvinā́\_ādhvaryavaṃ vasuváne vasudhéyasya vetu yája /  
devó vánaspátir varṣáprāvā ghṛtánirṇig dyā́m ágreṇā́spṛkṣad ā́ntárikṣaṃ mádhyenāprāḥ pṛthivī́m úpareṇādṛm̐hīd vasuváne vasudhéyasya vetu yája /  
deváṃ barhír vā́ritīnāṃ nidhé dhāsi prácyutīnām ápracyutaṃ nikāmadháraṇaṃ puruspārháṃ yáśasvad enā́ barhíṣā\_anyā́ barhī́m̐ṣy abhíṣyāma vasuváne vasudhéyasya vetu yája /  
devó agníḥ sviṣṭakṛ́t sudráviṇā mandráḥ kavíḥ satyámanmā \_āyajī́ hótā hótur\_hotur ā́yajīyān ágne yā́n devā́n áyāḍ yā́m̐ ápiprer yé te hotré ámatsata tā́m̐ sasanúṣīm̐ hótrāṃ devaṃgamā́ṃ diví devéṣu yajñám éraya\_imám̐ sviṣṭakṛ́c cā́gne hótā́\_abhūr vasuváne vasudhéyasya namovāké vī́hi yája //

- [Previous: 3.6.12.2](https://indike.org/pramana/in.veda.brahmana.taittiriya.3.6.12.2)
- [Next: 3.6.14.1](https://indike.org/pramana/in.veda.brahmana.taittiriya.3.6.14.1)
- [Up: 3.6.13](https://indike.org/pramana/in.veda.brahmana.taittiriya.3.6.13)

## Commentaries (1)

- [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.194.56.102) — Sāyaṇa, Sanskrit

## Linked texts (5)

- [Āśvalāyanaśrautasūtra (ed. Rāmanārāyaṇa Vidyāratna, Calcutta)](https://indike.org/pramana/in.vedanga.kalpa.srauta.asvalayana*vidyaratna.0-8.7) — Sanskrit
- [Kāṭhakasaṃhitā](https://indike.org/pramana/in.veda.samhita.krsnayajur*kathaka.19.13) — Sanskrit
- [Ṛgvedakhilāni](https://indike.org/pramana/in.veda.samhita.rg.khila.5.7.3) — Sanskrit
- [Nirukta](https://indike.org/pramana/in.vedanga.nirukta.yaska.9.43) — Yāska, Sanskrit
- [Nighaṇṭu](https://indike.org/pramana/in.vedanga.nirukta.nighantu.210.1) — Yāska, Sanskrit

---
Source: [https://indike.org/pramana/in.veda.brahmana.taittiriya.3.6.13.1](https://indike.org/pramana/in.veda.brahmana.taittiriya.3.6.13.1) · Pramāṇa