Taittiriyabrahmana 3.6.2
Taittirīyabrāhmaṇa 3.6.2
- Language
- Sanskrit
3.6.2.1
hótā yakṣad agním̐ samídhā suṣamídhā sámiddhaṃ nā́bhā pṛthivyā́ḥ saṃgathé vāmásya /
várṣman divá iḍás padé vétv ā́jyasya hótar yája /
hótā yakṣat tánūnápātam áditer gárbhaṃ bhúvanasya gopā́m /
mádhvā_adyá devó devébhyo devayā́nān pathó anaktu vétv ā́jyasya hótar yája /
hótā yakṣan nárāśám̐saṃ nṛśastráṃ nṛ́̄m̐ḥpraṇetram /
góbhir vapā́vānt syā́d vīráiḥ śáktīvān ráthaiḥ prathamayā́vā híraṇyaiś candrī́ vétv ā́jyasya hótar yája /
hótā yakṣad agním iḍá īḍitó devó devā́m̐ ā́vakṣad dūtó havyavā́ḍ ámūraḥ /
upa_imáṃ yajñám úpa_imā́ṃ devó deváhūtim avatu vétv ā́jyasya hótar yája /
hótā yakṣad barhíḥ suṣṭárīma_ū́rṇamradā asmín yajñé ví ca prá ca prathatām̐ svāsastháṃ devébhyaḥ /
ā́_īm enad adyá vásavo rudrā́ ādityā́ḥ sadantu priyám índrasyāstu vétv ā́jyasya hótar yája //
3.6.2.2
hótā yakṣad dúra ṛṣvā́ḥ kavaṣyó 'koṣadhāvanīr úd ā́tābhir jíhatāṃ ví pákṣobhiḥ śrayantām /
suprāyaṇā́ asmín yajñé víśrayantām ṛtāvṛ́dho viyántv ā́jyasya hótar yája /
hótā yakṣad uṣā́sānáktā bṛhatī́ supéśasā nṛ́̄m̐ḥpátibhyo yóniṃ kṛṇvāné /
sam̐smáyamāne índreṇa deváirā́_idáṃ barhíḥ sīdatāṃ vītā́m ā́jyasya hótar yája /
hótā yakṣad dáivyā hótārā mandrā́ pótārā kavī́ prácetasā /
svìṣṭam adyā́nyáḥ karad iṣā́ svabhigūrtam anyá ūrjā́ satavasā_imáṃ yajñáṃ diví devéṣu dhattāṃ vītā́m ā́jyasya hótar yája /
3.6.2.3
hótā yakṣat tisró devī́r apásām apástamā ácchidram adyá_idám ápas tanvatām /
devébhyo devī́r devám ápo viyántv ā́jyasya hótar yája /
hótā yakṣat tváṣṭāram áciṣṭum ápākam̐ retodhā́ṃ víśravasaṃ yaśodhā́m /
pururū́pam ákāmakarśanam̐ supóṣaḥ póṣaiḥ syā́t suvī́ro vīráir vétv ā́jyasya hótar yája /
hótā yakṣad vánaspátim upā́vasrakṣad dhiyó joṣṭā́ram̐ śaśáman náraḥ /
svádāt svádhitir ṛtuthā́dyá devó devébhyo havyā́vāḍ vétv ā́jyasya hotar yája /
hótā yakṣad agním̐ svā́hā_ā́jyasya svā́hā médasaḥ svā́hā stokā́nām̐ svā́hā svā́hākṛtīnām̐ svā́hā havyásūktīnām /
svā́hā devā́m̐ ājyapā́nt svā́hā_agním̐ hotrā́j juṣāṇā agna ájyasya viyantu hótar yája //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (5)
- Kāṭhakasaṃhitā — Sanskrit
- Ṛgvedakhilāni — Sanskrit
- Śrautakośa — Sanskrit
- Altindische Grammatik — Jacob Wackernagel & Albert Debrunner, German
- A Vedic Concordance — Maurice Bloomfield, English