<!-- Pramāṇa, a library of Indian primary sources · https://indike.org/pramana/in.veda.brahmana.taittiriya.3.6.3 -->

[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.6.3

# Taittiriyabrahmana 3.6.3

Taittirīyabrāhmaṇa 3.6.3

- **Language:** Sanskrit

### [3.6.3.1](https://indike.org/pramana/in.veda.brahmana.taittiriya.3.6.3.1)

sámiddho adyá mánuṣo duroṇé /  
devó devā́n yajasi jātavedaḥ /  
ā́ ca váha mitramahaś cikitvā́n /  
tváṃ dūtáḥ kavír asi prácetāḥ /  
tánūnapāt pathá ṛtásya yā́nān /  
mádhvā samañjánt svadayā sujihva /  
mánmāni dhībhír utá yajñám ṛndhán /  
devatrā́ ca kṛṇuhy adhvaráṃ naḥ /  
nárāśam̐sasya mahimā́nameṣām /  
úpastoṣāma yajatásya yajñáiḥ //

### [3.6.3.2](https://indike.org/pramana/in.veda.brahmana.taittiriya.3.6.3.2)

té sukrátavaḥ śúcayo dhiyaṃdhā́ḥ /  
svádantu devā́ ubháyāni havyā́ /  
ājúhvāna ī́ḍyo vándyaś ca /  
ā́yāhy agne vásubhiḥ sajóṣāḥ /  
tváṃ devā́nām asi yahva hótā /  
sá enān yakṣīṣitó yájīyān /  
prācī́naṃ barhíḥ pradíśā pṛthivyā́ḥ /  
vástor asyā́ vṛjyate ágre áhnām /  
vy ù prathate vitaráṃ várīyaḥ /  
devébhyo áditaye syonám //

### [3.6.3.3](https://indike.org/pramana/in.veda.brahmana.taittiriya.3.6.3.3)

vyácasvatīr urviyā́ víśrayantām /  
pátibhyo ná jánayaḥ śúmbhamānāḥ /  
dévīr dvāro bṛhatīr viśvaminvāḥ /  
devébhyo bhavatha suprāyaṇā́ḥ /  
ā́ suṣváyantī yajaté úpāke /  
uṣā́sānáktā sadatāṃ ní yónau /  
divyé yóṣaṇe bṛhatī́ surukmé /  
ádhi śríyam̐ śukrapíśaṃ dádhāne /  
dáivyā hótārā prathamā́ suvā́cā /  
mímānā yajñáṃ mánuṣo yájadhyai //

### [3.6.3.4](https://indike.org/pramana/in.veda.brahmana.taittiriya.3.6.3.4)

pracodáyantā vidátheṣu kārū́ /  
prācī́naṃ jyótiḥ pradíśā diśántā /  
ā́ no yajñáṃ bhā́ratī tū́yam etu /  
íḍā manuṣvád ihá cetáyantī /  
tisró devī́r barhír ā́\_idám̐ syonám /  
sárasvatīḥ svápasaḥ sadantu /  
yá imé dyā́vāpṛthivī́ jánitrī /  
rūpáir ápim̐śad bhúvanāni víśvā /  
tám adyá hotar iṣitó yájīyān /  
deváṃ tváṣṭāram ihá yakṣi vidvā́n //

### [3.6.3.5](https://indike.org/pramana/in.veda.brahmana.taittiriya.3.6.3.5)

upā́vasṛjat tmányā samañjan /  
devā́nāṃ pā́tha ṛtuthā́ havī́m̐ṣi /  
vánaspátiḥ śamitā́ devó agníḥ /  
svádantu havyáṃ mádhunā ghṛténa /  
sadyó jātó vyàmimīta yajñám /  
agnír devā́nām abhavat purogā́ḥ /  
asyá hótuḥ pradíśy ṛtásya vācí /  
svā́hākṛtam̐ havír adantu devā́ḥ //

## Commentaries (4)

- [Taittirīyabrāhmaṇaṭīkā](https://indike.org/pramana/in.veda.brahmana.taittiriya!taittiriyabrahmanatika.70.2.29) — Sanskrit
- [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.194.56.69) — Sāyaṇa, Sanskrit
- [Jñānayajña on the Taittirīya Brāhmaṇa (Bhaṭṭabhāskara)](https://indike.org/pramana/in.veda.brahmana.taittiriya!bhattabhaskara) — Bhaṭṭabhāskara Miśra, Sanskrit
- [Taittirīyabrāhmaṇakāṭhakabhāṣya](https://indike.org/pramana/in.veda.brahmana.taittiriya!bhatta-bhaskara-misra-cikaedamandana) — Bhaṭṭa Bhāskara Miśra Cikāeḍamaṇḍana, Sanskrit

## Linked texts (2)

- [A Vedic Concordance](https://indike.org/pramana/ins.reference.bloomfield-1906.c6.973) — Maurice Bloomfield, English
- [Altindische Grammatik](https://indike.org/pramana/ins.literature.wackernagel-1896.v2.c7.s2.t11.63) — Jacob Wackernagel & Albert Debrunner, German

---
Source: [https://indike.org/pramana/in.veda.brahmana.taittiriya.3.6.3](https://indike.org/pramana/in.veda.brahmana.taittiriya.3.6.3) · Pramāṇa