<!-- Pramāṇa, a library of Indian primary sources · https://indike.org/pramana/in.veda.brahmana.taittiriya.3.6.6 -->

[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.6.6

# Taittiriyabrahmana 3.6.6

Taittirīyabrāhmaṇa 3.6.6

- **Language:** Sanskrit

### [3.6.6.1](https://indike.org/pramana/in.veda.brahmana.taittiriya.3.6.6.1)

dáivyāḥ śamitāra utá manuṣyā ā́rabhadhvam /  
úpanayata médhyā dúraḥ /  
āśā́sānā médhapatibhyāṃ médham /  
prā́smā agníṃ bharata /  
stṛṇītá barhíḥ /  
ánv enaṃ mātā́ manyatām /  
ánu pitā́ /  
ánu bhrā́tā ságarbhyaḥ /  
ánu sákhā sáyūthyaḥ /  
udīcī́nām̐ asya padó nídhattāt //

### [3.6.6.2](https://indike.org/pramana/in.veda.brahmana.taittiriya.3.6.6.2)

sū́ryaṃ cákṣur gamayatāt /  
vā́taṃ prāṇám anvávasṛjatāt /  
díśaḥ śrótram /  
antárikṣam ásum /  
pṛthivī́m̐ śárīram /  
ekadhā́\_asya tvácam ā́cchyatāt /  
purā́ nā́bhyā apiśáso vapā́m útkhidatāt /  
antár evá\_uṣmā́ṇaṃ vārayatāt /  
śyenám asya vákṣaḥ kṛṇutāt /  
praśásā bāhū́ //

### [3.6.6.3](https://indike.org/pramana/in.veda.brahmana.taittiriya.3.6.6.3)

śalā́ doṣáṇī /  
kaśyápā\_ivā́m̐sā ácchidre śróṇī /  
kaváṣā\_ūrū́ srekáparṇā\_aṣṭhīvantā /  
ṣaḍvim̐śatir asya váṅkrayaḥ /  
tā́ anuṣṭhyā\_úccyāvayatāt /  
gā́traṃ\_gātram asyā́nūnaṃ kṛṇutāt /  
ūvadhyagūháṃ pā́rthivaṃ khanatāt /  
asnā́ rákṣaḥ sám̐sṛjatāt /  
vaniṣṭhúm asya mā́ rāviṣṭa //

### [3.6.6.4](https://indike.org/pramana/in.veda.brahmana.taittiriya.3.6.6.4)

úrūkaṃ mányamānāḥ /  
ná\_id vas toké tánaye /  
rávitā rávat\_śamitāraḥ /  
ádhrigo śamīdhvám /  
suśámi śamīdhvam /  
śamīdhvám adhrigo /  
ádhriguś cā́pāpaś ca /  
ubháu devā́nām̐ śamitā́rau /  
tā́v imáṃ paśúm̐ śrapayatāṃ pravidvā́m̐sau /  
yáthā\_yathā\_asya śrápaṇaṃ táthā\_tathā //

## Commentaries (1)

- [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.194.56.75) — Sāyaṇa, Sanskrit

## Linked texts (2)

- [Āśvalāyanaśrautasūtra](https://indike.org/pramana/in.vedanga.kalpa.srauta.asvalayana.3.3-1a) — Āśvalāyana, Sanskrit
- [Kauṣītakibrāhmaṇa](https://indike.org/pramana/in.veda.brahmana.kausitaki.10.7.7) — Kauṣītaki, Sanskrit

---
Source: [https://indike.org/pramana/in.veda.brahmana.taittiriya.3.6.6](https://indike.org/pramana/in.veda.brahmana.taittiriya.3.6.6) · Pramāṇa