Taittiriyabrahmana 3.7.10
Taittirīyabrāhmaṇa 3.7.10
- Language
- Sanskrit
3.7.10.1
úd astāṃpsīt savitā́ mitró aryamā́ /
sárvān amítrān avadhīd yugéna /
bṛhántaṃ mā́m akarad vīrávantam /
rathaṃtaré śrayasva svā́hā pṛthivyā́m /
vāmadevyé śrayasva svā́hā_antárikṣe /
bṛhatí śrayasva svā́hā diví /
bṛhatā́ tvā_úpastabhnomi /
ā́ tvā dade yáśase vīryā̀ya ca /
asmā́sv aghniyā yūyáṃ dadhāthá_indriyáṃ páyaḥ /
yás te drapsó yás ta udarṣáḥ //
3.7.10.2
dáivyaḥ ketúr víśvaṃ bhúvanam āvivéśa /
sá naḥ pāhy áriṣṭyái svā́hā /
ánu mā sárvo yajñò 'yám etu /
víśve devā́ marútaḥ sā́mārkáḥ /
āpríyaś chándām̐si nivído yájūm̐ṣi /
asyái pṛthivyái yád yajñíyam /
prajā́pater vartaním ánuvartasva /
ánu vīráir ánurādhyāma góbhiḥ /
ánv áśvair ánu sárvair u puṣṭáiḥ /
ánu prajáyā_ánv indriyéṇa //
3.7.10.3
devā́ no yajñám ṛjudhā́ nayantu /
práti kṣatré práti tiṣṭhāmi rāṣṭré /
práty áśveṣu prátitiṣṭhāmi góṣu /
práti prajā́yāṃ prátitiṣṭhāmi bhávye /
víśvam anyā́_abhivāvṛdhé /
tád anyásyām ádhi śritám /
divé ca viśvákarmaṇe /
pṛthivyái cākaraṃ námaḥ /
áskān dyáuḥ pṛthivī́m /
áskān ṛṣabhó yúvā gā́ḥ //
3.7.10.4
skannā́_imā́ víśvā bhúvanā /
skannó yajñáḥ prajanayatu /
áskān ájani prā́jani /
ā́ skannā́j jāyate vṛ́ṣā /
skannā́t prájaniṣīmahi /
yé devā́ yéṣām idáṃ bhāgadhéyaṃ babhū́va /
yéṣāṃ prayājā́ utā́nūyājā́ḥ /
índrajyeṣṭhebhyo váruṇarājabhyaḥ /
agníhotṛbhyo devébhyaḥ svā́hā /
utá tyā́ no dívā matíḥ //
3.7.10.5
áditir ūtyā́_āgamat /
sā́ śántācī máyas karat /
ápa srídhaḥ /
utá tyā́ dáivyā bhiṣájā /
śáṃ nas karato aśvínā /
yūyā́tām asmád rápaḥ /
ápa srídhaḥ /
śám agnír agníbhis karat /
śáṃ nas tapatu sū́ryaḥ /
śáṃ vā́to vātv arapā́ḥ //
3.7.10.6
ápa srídhaḥ /
tád ít padáṃ ná víciketa vidvā́n /
yán mṛtáḥ púnar apy éti jīvā́n /
trivṛ́d yád bhúvanasya rathavṛ́t /
jīvó gárbho ná mṛtáḥ sá jīvāt /
práty asmai pípīṣate /
víśvāni vidúṣe bhara /
araṃgamā́ya jágmave /
ápaścāddadhvane náre /
índur índum ávāgāt /
índor índro 'pāt /
tásya ta indav índrapītasya mádhumataḥ /
úpahūtasya_úpahūto bhakṣayāmi //
Commentaries (1)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
Linked texts (2)
- Baudhāyanagṛhyasūtra — Baudhāyana, Sanskrit
- Taittirīyāraṇyaka (complete text) — Sanskrit