<!-- Pramāṇa, a library of Indian primary sources · https://indike.org/pramana/in.veda.brahmana.taittiriya.3.7.10 -->

[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.7.10

# Taittiriyabrahmana 3.7.10

Taittirīyabrāhmaṇa 3.7.10

- **Language:** Sanskrit

### [3.7.10.1](https://indike.org/pramana/in.veda.brahmana.taittiriya.3.7.10.1)

úd astāṃpsīt savitā́ mitró aryamā́ /  
sárvān amítrān avadhīd yugéna /  
bṛhántaṃ mā́m akarad vīrávantam /  
rathaṃtaré śrayasva svā́hā pṛthivyā́m /  
vāmadevyé śrayasva svā́hā\_antárikṣe /  
bṛhatí śrayasva svā́hā diví /  
bṛhatā́ tvā\_úpastabhnomi /  
ā́ tvā dade yáśase vīryā̀ya ca /  
asmā́sv aghniyā yūyáṃ dadhāthá\_indriyáṃ páyaḥ /  
yás te drapsó yás ta udarṣáḥ //

### [3.7.10.2](https://indike.org/pramana/in.veda.brahmana.taittiriya.3.7.10.2)

dáivyaḥ ketúr víśvaṃ bhúvanam āvivéśa /  
sá naḥ pāhy áriṣṭyái svā́hā /  
ánu mā sárvo yajñò 'yám etu /  
víśve devā́ marútaḥ sā́mārkáḥ /  
āpríyaś chándām̐si nivído yájūm̐ṣi /  
asyái pṛthivyái yád yajñíyam /  
prajā́pater vartaním ánuvartasva /  
ánu vīráir ánurādhyāma góbhiḥ /  
ánv áśvair ánu sárvair u puṣṭáiḥ /  
ánu prajáyā\_ánv indriyéṇa //

### [3.7.10.3](https://indike.org/pramana/in.veda.brahmana.taittiriya.3.7.10.3)

devā́ no yajñám ṛjudhā́ nayantu /  
práti kṣatré práti tiṣṭhāmi rāṣṭré /  
práty áśveṣu prátitiṣṭhāmi góṣu /  
práti prajā́yāṃ prátitiṣṭhāmi bhávye /  
víśvam anyā́\_abhivāvṛdhé /  
tád anyásyām ádhi śritám /  
divé ca viśvákarmaṇe /  
pṛthivyái cākaraṃ námaḥ /  
áskān dyáuḥ pṛthivī́m /  
áskān ṛṣabhó yúvā gā́ḥ //

### [3.7.10.4](https://indike.org/pramana/in.veda.brahmana.taittiriya.3.7.10.4)

skannā́\_imā́ víśvā bhúvanā /  
skannó yajñáḥ prajanayatu /  
áskān ájani prā́jani /  
ā́ skannā́j jāyate vṛ́ṣā /  
skannā́t prájaniṣīmahi /  
yé devā́ yéṣām idáṃ bhāgadhéyaṃ babhū́va /  
yéṣāṃ prayājā́ utā́nūyājā́ḥ /  
índrajyeṣṭhebhyo váruṇarājabhyaḥ /  
agníhotṛbhyo devébhyaḥ svā́hā /  
utá tyā́ no dívā matíḥ //

### [3.7.10.5](https://indike.org/pramana/in.veda.brahmana.taittiriya.3.7.10.5)

áditir ūtyā́\_āgamat /  
sā́ śántācī máyas karat /  
ápa srídhaḥ /  
utá tyā́ dáivyā bhiṣájā /  
śáṃ nas karato aśvínā /  
yūyā́tām asmád rápaḥ /  
ápa srídhaḥ /  
śám agnír agníbhis karat /  
śáṃ nas tapatu sū́ryaḥ /  
śáṃ vā́to vātv arapā́ḥ //

### [3.7.10.6](https://indike.org/pramana/in.veda.brahmana.taittiriya.3.7.10.6)

ápa srídhaḥ /  
tád ít padáṃ ná víciketa vidvā́n /  
yán mṛtáḥ púnar apy éti jīvā́n /  
trivṛ́d yád bhúvanasya rathavṛ́t /  
jīvó gárbho ná mṛtáḥ sá jīvāt /  
práty asmai pípīṣate /  
víśvāni vidúṣe bhara /  
araṃgamā́ya jágmave /  
ápaścāddadhvane náre /  
índur índum ávāgāt /  
índor índro 'pāt /  
tásya ta indav índrapītasya mádhumataḥ /  
úpahūtasya\_úpahūto bhakṣayāmi //

## Commentaries (1)

- [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.197.8) — Sāyaṇa, Sanskrit

## Linked texts (2)

- [Baudhāyanagṛhyasūtra](https://indike.org/pramana/in.vedanga.kalpa.grhya.baudhayana.2.5.6_3) — Baudhāyana, Sanskrit
- [Taittirīyāraṇyaka (complete text)](https://indike.org/pramana/in.veda.aranyaka.taittiriya*complete.4.13) — Sanskrit

---
Source: [https://indike.org/pramana/in.veda.brahmana.taittiriya.3.7.10](https://indike.org/pramana/in.veda.brahmana.taittiriya.3.7.10) · Pramāṇa