[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.7.12 # Taittiriyabrahmana 3.7.12 Taittirīyabrāhmaṇa 3.7.12 - **Language:** Sanskrit ### [3.7.12.1](https://indike.org/pramana/in.veda.brahmana.taittiriya.3.7.12.1) yád devā devahéḍanam / dévāsaś cakṛmā́ vayám / ā́dityās tásmān mā muñcata / ṛtásya\_ṛténa mā́m utá / dévā jīvanakāmyā́ yát / vācā́\_anṛtam ūdimá / agnír mā tásmād énasaḥ / gā́rhapatyaḥ prámuñcatu / duritā́ yā́ni cakṛmá / karótu mā́m anenásam // ### [3.7.12.2](https://indike.org/pramana/in.veda.brahmana.taittiriya.3.7.12.2) ṛténa dyāvāpṛthivī / ṛténa tvám̐ sarasvati / ṛtā́n mā muñcatā́m̐hasaḥ / yád anyákṛtam ārimá / sajātaśam̐sā́d utá vā jāmiśam̐sā́t / jyā́yasaḥ śám̐sād utá vā kánīyasaḥ / ánājñātaṃ devákṛtaṃ yád énaḥ / tásmāt tvám asmā́n jātavedo mumugdhi / yád vācā́ yán mánasā / bāhúbhyām ūrúbhyām aṣṭhīvádbhyām // ### [3.7.12.3](https://indike.org/pramana/in.veda.brahmana.taittiriya.3.7.12.3) śiśnáir yád ánṛtaṃ cakṛmā́ vayám / agnír mā tásmād énasaḥ / yád dhástābhyāṃ cakára kílbiṣāṇi / akṣā́ṇāṃ vagnúm upajíghnamānaḥ / dūrepaśyā́ ca rāṣṭrabhṛ́c ca / tā́ny apsarásāv ánudattām ṛṇā́ni / ádīvyann ṛṇáṃ yád aháṃ cakā́ra / yád vā\_ádāsyant saṃjagā́rā jánebhyaḥ / agnír mā tásmād énasaḥ / yán máyi mātā́ gárbhe satí // ### [3.7.12.4](https://indike.org/pramana/in.veda.brahmana.taittiriya.3.7.12.4) énaś cakā́ra yát pitā́ / agnír mā tásmād énasaḥ / yád āpipéṣa mātáraṃ pitáram / putráḥ prámudito dháyan / áhim̐sitau pitárau máyā tát / tád agne anṛṇó bhavāmi / yád antárikṣaṃ pṛthivī́m utá dyā́m / yán mātáraṃ pitáraṃ vā jihim̐simá / agír mā tásmād énasaḥ / yád āśásā niśásā yát parāśásā // ### [3.7.12.5](https://indike.org/pramana/in.veda.brahmana.taittiriya.3.7.12.5) yád énaś cakṛmā́ nū́tanaṃ yát purāṇám / agnír mā tásmād énasaḥ / átikrāmāmi duritáṃ yád énaḥ / jáhāmi ripráṃ paramé sadhásthe / yátra yánti sukṛ́to nā́pi duṣkṛ́taḥ / tám ā́rohāmi sukṛ́tāṃ nú lokám / trité devā́ amṛjata\_etád énaḥ / tritá etán manuṣyèṣu māmṛje / táto mā yádi kíṃ cid ānaśé / agnír mā tásmād énasaḥ // ### [3.7.12.6](https://indike.org/pramana/in.veda.brahmana.taittiriya.3.7.12.6) gā́rhapatyaḥ prámuñcatu / duritā́ yā́ni cakṛmá / karótu mā́m anenásam / diví jātā́ apsú jātā́ḥ / yā́ jātā́ óṣadhībhyaḥ / átho yā́ agnijā́ ā́paḥ / tā́ naḥ śundhantu śúndhanīḥ / yád ā́po náktaṃ duritáṃ carāma / yád vā dívā nū́tanaṃ yát purāṇám / híraṇyavarṇās táta útpunīta naḥ / imáṃ me varuṇa, tát tvā yāmi, / tváṃ no agne, sá tváṃ no agne / tvám agne ayā́\_asi, // ## Commentaries (1) - [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.199.5) — Sāyaṇa, Sanskrit ## Linked texts (1) - [Merutantra](https://indike.org/pramana/in.sampradaya.general.sakta.merutantra.4.122) — Gommaṭa, Sanskrit --- Source: [https://indike.org/pramana/in.veda.brahmana.taittiriya.3.7.12](https://indike.org/pramana/in.veda.brahmana.taittiriya.3.7.12) · Pramāṇa