<!-- Pramāṇa, a library of Indian primary sources · https://indike.org/pramana/in.veda.brahmana.taittiriya.3.7.13 -->

[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.7.13

# Taittiriyabrahmana 3.7.13

Taittirīyabrāhmaṇa 3.7.13

- **Language:** Sanskrit

### [3.7.13.1](https://indike.org/pramana/in.veda.brahmana.taittiriya.3.7.13.1)

yát te grā́vṇā cicchidúḥ soma rājan /  
priyā́ṇy áṅgāni svádhitā párūm̐ṣi /  
tát saṃdhatsva\_ā́jyena\_utá vardhayasva /  
anāgáso ádham ít saṃkṣáyema /  
yát te grā́vā bāhúcyuto ácucyavuḥ /  
náro yát te duduhúr dákṣiṇena /  
tát ta ā́pyāyatāṃ tát te /  
níṣṭyāyatāṃ  
yát te tvácaṃ bibhidúr yác ca yónim /  
yád āsthā́nāt prácyuto vénasi tmánā //

### [3.7.13.2](https://indike.org/pramana/in.veda.brahmana.taittiriya.3.7.13.2)

tváyā tát soma guptám astu naḥ /  
sā́ naḥ saṃdhā́\_asat paramé vyòman /  
áhāt\_śárīraṃ páyasā samétya /  
anyò'nyo bhavati várṇo asya /  
tásmin vayám úpahūtās táva smaḥ /  
ā́ no bhaja sádasi viśvárūpe /  
nṛcákṣāḥ sóma utá śuśrúg astu /  
mā́ no víhāsīd gíra āvṛṇānáḥ /  
ánāgās tanúvo vāvṛdhānáḥ /  
ā́ no rūpáṃ vahatu jā́yamānaḥ //

### [3.7.13.3](https://indike.org/pramana/in.veda.brahmana.taittiriya.3.7.13.3)

úpakṣaranti juhvò ghṛténa /  
priyā́ṇy áṅgāni táva vardháyantīḥ /  
tásmai te soma náma íd váṣaṭ ca /  
úpa mā rājant sukṛté hvayasva /  
sáṃ prāṇāpānā́bhyām̐ sám u cákṣuṣā tvám /  
sám̐ śrótreṇa gacchasva soma rājan /  
yát ta ā́sthitam̐ śám u tát te astu /  
jānītā́n naḥ saṃgámane pathīnā́m /  
etáṃ jānītāt paramé vyòman /  
vṛ́kāḥ sadhasthā vidá rūpám asya //

### [3.7.13.4](https://indike.org/pramana/in.veda.brahmana.taittiriya.3.7.13.4)

yád āgácchāt pathíbhir devayā́naiḥ /  
iṣṭāpūrté kṛṇutād āvír asmai /  
áriṣṭo rājann agadáḥ párehi /  
námas te astu cákṣase raghūyaté /  
nā́kam ā́roha sahá yájamānena /  
sū́ryaṃ gacchatāt paramé vyòman /  
ábhūd deváḥ savitā́ vándyó nú naḥ /  
idā́nīm áhna upavā́cyo nṛ́bhiḥ /  
ví yó rátnā bhájati mānavébhyaḥ /  
śreṣṭhaṃ no átra dráviṇaṃ yáthā dádhat /  
úpa no mitrāvaruṇāv ihā́vatam /  
anvā́dīdhyāthām ihá naḥ sakhāyā /  
ādityā́nāṃ prásitir hetíḥ /  
ugrā́ śatā́pāṣṭhā gha víṣā pári ṇo vṛṇaktu /  
ā́pyāyasva, sáṃ te, //

## Commentaries (1)

- [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.200.4.3) — Sāyaṇa, Sanskrit

## Linked texts (3)

- [Mānavaśrautasūtra](https://indike.org/pramana/in.vedanga.kalpa.srauta.manava.2.5.4.24c) — Sanskrit
- [Taittirīyāraṇyaka (complete text)](https://indike.org/pramana/in.veda.aranyaka.taittiriya*complete.4.18.p4) — Sanskrit
- [Kalpaḥ](https://indike.org/pramana/in.jaina.post.vidhi.mantra.kalpah.2.6.9.935_206) — Sanskrit

---
Source: [https://indike.org/pramana/in.veda.brahmana.taittiriya.3.7.13](https://indike.org/pramana/in.veda.brahmana.taittiriya.3.7.13) · Pramāṇa