Pramāṇa · Search · About · API

Taittiriyabrahmana 3.7.14

Taittirīyabrāhmaṇa 3.7.14

Language
Sanskrit

3.7.14.1

yád didīkṣé mánasā yác ca vācā́ /
yád vā prāṇáiś cákṣuṣā yác ca śrótreṇa /
yád rétasā mithunénā́py ātmánā /
adbhyó lokā́ dadhire téja indriyám /
śukrā́ dīkṣā́yai tápaso vimócanīḥ /
ā́po vimoktrī́r máyi téja indriyám /
yád ṛcā́ sā́mnā yájuṣā /
paśūnā́ṃ cárman havíṣā didīkṣé /
yác chándobhir óṣadhībhir vánaspátau /
adbhyó lokā́ dadhire téja indriyám //

3.7.14.2

śukrā́ dīkṣā́yai tápaso vimócanīḥ /
ā́po vimoktrī́r máyi téja indriyám /
yéna bráhma yéna kṣatrám /
yéna_indrāgnī́ prajā́patiḥ sómo váruṇo yéna rā́jā /
víśve devā́ ṛ́ṣayo yéna prāṇā́ḥ /
adbhyó lokā́ dadhire téja indriyám /
śukrā́ dīkṣā́yai tápaso vimócanīḥ /
ā́po vimoktrī́r máyi téja indriyám /
apā́ṃ púṣpam asy óṣadhīnām̐ rásaḥ /
sómasya priyáṃ dhā́ma //

3.7.14.3

agnéḥ priyátamam̐ havíḥ svā́hā /
apā́ṃ púṣpam asy óṣadhīnām̐ rásaḥ /
sómasya priyáṃ dhā́ma /
índrasya priyátamam̐ havíḥ svā́hā /
apā́ṃ púṣpam asy óṣadhīnām̐ rásaḥ /
sómasya priyáṃ dhā́ma /
víśveṣāṃ devā́nāṃ priyátamam̐ havíḥ svā́hā /
vayám̐ soma vrate táva /
mánas tanū́ṣu píprataḥ /
prajā́vanto aśīmahi //

3.7.14.4

devébhyaḥ pitṛ́bhyaḥ svā́hā /
somyébhyaḥ pitṛ́bhyaḥ svā́hā /
kavyébhyaḥ pitṛbhyaḥ svā́hā /
dévāsa ihá mādayadhvam /
sómyāsa ihá mādayadhvam /
kávyāsa ihá mādayadhvam /
ánantaritāḥ pitáraḥ somyā́ḥ somapīthā́t /
ápaitu mṛtyúr amṛ́taṃ na ā́gan /
vaivasvató no ábhayaṃ kṛṇotu /
parṇáṃ vánaspáter iva //

3.7.14.5

abhí naḥ śīyatām̐ rayíḥ /
sácatāṃ naḥ śácīpátiḥ /
páraṃ mṛtyo ánu párehi pánthām /
yás te svá ítaro devayā́nāt /
cákṣuṣmate śṛṇvaté te bravīmi /
mā́ naḥ prajā́m̐ rīriṣo mā́_utá vīrā́n /
idámū nú śréyo 'vasā́nam ā́ganma /
yád gojíd dhanajíd aśvajíd yát /
parṇáṃ vánaspáter iva /
abhí naḥ śīyatām̐ rayíḥ /
sácatāṃ naḥ śácīpátiḥ //

Commentaries (1)

Linked texts (2)