[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.7.1 # Taittiriyabrahmana 3.7.1 Taittirīyabrāhmaṇa 3.7.1 - **Language:** Sanskrit ### [3.7.1.1](https://indike.org/pramana/in.veda.brahmana.taittiriya.3.7.1.1) sárvān vā́ eṣò 'gnáu kā́mān práveśayati / yò 'gnī́n anvādhā́ya vratám upáiti / sá yád ániṣṭvā prayāyā́t / ákāmaprītā enaṃ kā́mā nā́nu práyāyuḥ / atejā́ avīryàḥ syāt / sá juhuyāt / túbhyaṃ tā́ / víśvāḥ sukṣitáyaḥ pṛ́thak / ágne kā́māya yemira íti / kā́mān evā́smin dadhāti // ### [3.7.1.2](https://indike.org/pramana/in.veda.brahmana.taittiriya.3.7.1.2) kā́maprītā enaṃ kā́mā ánu práyānti / tejasvī́ vīryā̀vān bhavati / sáṃtatir vā́ eṣā́ yajñásya / yò 'gnī́n anvādhā́ya vratám upáiti / sá yád udvā́yati / vícchittir evā́sya sā́ / táṃ prā́ñcam uddhṛ́tya / mánasā\_úpatiṣṭheta / máno vái prajā́patiḥ / prājāpatyó yajñáḥ // ### [3.7.1.3](https://indike.org/pramana/in.veda.brahmana.taittiriya.3.7.1.3) mánasā\_evá yajñám̐ sáṃtanoti / bhū́r íty āha / bhūtó vái prajā́patiḥ / bhū́tim evá\_upaiti / ví vā́ eṣá indriyéṇa vīryèṇa\_ṛdhyate / yásya\_ā́hitāgner agnír apakṣā́yati / yā́vat\_śámyayā pravídhyet / yádi tā́vad apakṣā́yet / tám̐ sáṃbharet / idáṃ ta ékaṃ pará uta ékam // ### [3.7.1.4](https://indike.org/pramana/in.veda.brahmana.taittiriya.3.7.1.4) tṛtī́yena jyótiṣā sáṃviśasva / saṃvéśanas tanúvai cā́rur edhi / priyé devā́nāṃ paramé janítra íti / bráhmaṇā\_eváinam̐ sáṃbharati / sā́\_evá tátaḥ prā́yaścittiḥ / yádi parastarā́m apakṣā́yet / anuprayā́yā́vasyet / só evá tátaḥ prā́yaścittiḥ / óṣadhīr vā́ etásya paśū́n páyaḥ práviśati / yásya havíṣe vatsā́ apā́kṛtā dháyanti // ### [3.7.1.5](https://indike.org/pramana/in.veda.brahmana.taittiriya.3.7.1.5) tā́n yád duhyā́t / yātáyāmnā havíṣā yajeta / yán ná duhyā́t / yajñaparúr antáriyāt / vāyavyā̀ṃ yavāgū́ṃ nírvapet / vāyúr vái páyasaḥ pradāpayitā́ / sá evā́smai páyaḥ prádāpayati / páyo vā́ óṣadhayaḥ / páyaḥ páyaḥ / páyasā\_evā́smai páyó 'varundhe // ### [3.7.1.6](https://indike.org/pramana/in.veda.brahmana.taittiriya.3.7.1.6) átha\_úttarasmai havíṣe vatsā́n apā́kuryāt / sā́\_evá tátaḥ prā́yaścittiḥ / anyatarā́n vā́ eṣá devā́n bhāgadhéyena vyàrdhayati / yé yájamānasya sāyáṃ gṛhám āgácchanti / yásya sāyaṃdugdhám̐ havír ā́rtim ārccháti / índrāya vrīhī́n nirúpya\_úpavaset / páyo vā́ óṣadhayaḥ / páya evá\_ārábhya gṛhītvā́\_upavasati / yát prātáḥ syā́t / tát\_śṛtáṃ kuryāt // ### [3.7.1.7](https://indike.org/pramana/in.veda.brahmana.taittiriya.3.7.1.7) átha\_ítara aindráḥ puroḍā́śaḥ syāt / indriyé evā́smai samī́cī dadhāti / páyo vā́ óṣadhayaḥ / páyaḥ páyaḥ / páyasā\_evā́smai páyó 'varundhe / átha\_úttarasmai havíṣe vatsā́n apā́kuryāt / sā́\_evá tátaḥ prā́yaścittiḥ / ubháyān vā́ eṣá devā́n bhāgadhéyena vyàrdhayati / yé yájamānasya sāyáṃ ca prātáś ca gṛhám āgácchanti / yásya\_ubháyam̐ havír ā́rtim ārcháti // ### [3.7.1.8](https://indike.org/pramana/in.veda.brahmana.taittiriya.3.7.1.8) aindráṃ páñcaśarāvam odanáṃ nírvapet / agníṃ devátānāṃ prathamáṃ yajet / agnímukhā evá devátāḥ prīṇāti / agníṃ vā́ anv anyā́ devátāḥ / índram ánv anyā́ḥ / tā́ evá\_ubháyīḥ prīṇāti / páyo vā́ óṣadhayaḥ / páyaḥ páyaḥ / páyasā\_evā́smai páyó 'varundhe / átha\_úttarasmai havíṣe vatsā́n apā́kuryāt // ### [3.7.1.9](https://indike.org/pramana/in.veda.brahmana.taittiriya.3.7.1.9) sā́\_evá tátaḥ prā́yaścittiḥ / ardhó vā́ etásya yajñásya mīyate / yásya vrátyé 'han pátny anālambhukā́ bhávati / tā́m aparúdhya yajeta / sárveṇa\_evá yajñéna yajate / tā́m iṣṭvā́\_upahvayeta / ámū hám asmi / sā́ tvám / dyáur ahám / pṛthivī́ tvám / sā́māhám / ṛ́k tvám / tā́v éhi sáṃbhavāva / sahá réto dadhāvahai / pum̐sé putrā́ya véttavai / rāyás póṣāya suprajāstvā́ya suvī́ryāya\_íti / ardhá evá\_enām úpahvayate / sā́\_evá tátaḥ prā́yaścittiḥ // ## Commentaries (1) - [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.194.56.111) — Sāyaṇa, Sanskrit ## Linked texts (1) - [Āpastambaśrautasūtra](https://indike.org/pramana/in.vedanga.kalpa.srauta.apastamba.9.1.17.b) — Āpastamba, Sanskrit --- Source: [https://indike.org/pramana/in.veda.brahmana.taittiriya.3.7.1](https://indike.org/pramana/in.veda.brahmana.taittiriya.3.7.1) · Pramāṇa