Taittiriyabrahmana 3.7.2
Taittirīyabrāhmaṇa 3.7.2
- Language
- Sanskrit
3.7.2.1
yád víṣṣaṇṇena juhuyā́t /
áprajā apaśúr yájamānaḥ syāt /
yád ánāyatane nináyet /
anāyatanáḥ syāt /
prājāpatyáyā_ṛcā́ valmīkavapā́yām ávanayet /
prājāpatyó vái valmī́kaḥ /
yajñáḥ prajā́patiḥ /
prajā́patāv evá yajñáṃ prátiṣṭhāpayati /
bhū́r íty āha /
bhūtó vái prajā́patiḥ //
3.7.2.2
bhū́tim evá_upaiti /
tát kṛtvā́ /
anyā́ṃ dugdhvā́ púnar hotavyàm /
sā́_evá tátaḥ prā́yaścittiḥ /
yát kīṭā́vapannena juhuyā́t /
áprajā apaśúr yájamānaḥ syāt /
yád ánāyatane nináyet /
anāyatanáḥ syāt /
madhyaména parṇéna dyāvāpṛthivyàyā_ṛcā́_antaḥparidhí nínayet /
dyā́vāpṛthivyór eváinat prátiṣṭhāpayati //
3.7.2.3
tát kṛtvā́ /
anyā́ṃ dugdhvā́ púnar hotavyàm /
sā́_evá tátaḥ prā́yaścittiḥ /
yád ávavṛṣṭena juhuyā́t /
áparūpam asya_ātmán jāyeta /
kilā́so vā syā́d arśasó vā /
yát prátyeyā́t /
yajñáṃ vícchindyāt /
sá juhuyāt /
mitró jánān kalpayati prajānán //
3.7.2.4
mitró dādhāra pṛthivī́m utá dyā́m /
mitráḥ kṛṣṭī́r ánimiṣā_abhícaṣṭe /
satyā́ya havyáṃ ghṛtávaj juhota_íti /
mitréṇa_eváinat kalpayati /
tát kṛtvā́ /
anyā́ṃ dugdhvā́ púnar hotavyàm /
sā́_evá tátaḥ prā́yaścittiḥ /
yát pū́rvasyām ā́hutyām̐ hutā́yām úttarā́hutiḥ skándet /
dvipā́dbhiḥ paśúbhir yájamāno vyṛ̀dhyeta /
yád úttarayā_abhíjuhuyāt //
3.7.2.5
cátuṣpādbhiḥ paśúbhir yájamāno vyṛ̀dhyeta /
yátra véttha vanaspate devā́nāṃ gúhyā nā́māni /
tátra havyā́ni gāmaya_íti vānaspatyáyā_ṛcā́ samídham ādhā́ya /
tūṣṇī́m evá púnar juhuyāt /
vánaspátinā_evá yajñásya_ā́rtāṃ cā́nārtāṃ ca_ā́hutī vídādhāra /
tát kṛtvā́ /
anyā́ṃ dugdhvā́ púnar hotavyàm /
sā́_evá tátaḥ prā́yaścittiḥ /
yát purā́ prayājébhyaḥ prā́ṅ áṅgāraḥ skándet /
adhvaryáve ca yájamānāya cā́kam̐ syāt //
3.7.2.6
yád dakṣiṇā́ /
brahmáṇe ca yájamānāya cā́kam̐ syāt /
yát pratyák /
hótre ca pátniyai ca yájamānāya cā́kam̐ syāt /
yád údaṅ /
agnī́dhe ca paśúbhyaś ca yájamānāya cā́kam̐ syāt /
yád abhi juhuyā́t /
rudrò 'sya paśū́n ghā́tukaḥ syāt /
yán ná_abhijuhuyā́t /
áśāntaḥ práhriyeta //
3.7.2.7
sruvásya búdhnenābhinídadhyāt /
mā́ tamo mā́ yajñástaman mā́ yájamānas tamat /
námas te astv āyaté /
námo rudra parāyaté /
námo yátra niṣī́dasi /
amúṃ mā́ him̐sīr amúṃ mā́ him̐sīr íti yéna skándet /
táṃ práharet /
sahásraśṛṅgo vṛṣabhó jātávedāḥ /
stómapṛṣṭho ghṛtávānt suprátīkaḥ /
mā́ no hāsīn metthitó ná_it tvā jáhāma /
gopoṣáṃ no vīrapoṣáṃ ca yaccha_íti /
bráhmaṇā_eváinaṃ práharati /
sā́_evá tátaḥ prā́yaścittiḥ //
Commentaries (1)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
Linked texts (1)
- Āpastambaśrautasūtra — Āpastamba, Sanskrit