<!-- Pramāṇa, a library of Indian primary sources · https://indike.org/pramana/in.veda.brahmana.taittiriya.3.7.3 -->

[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.7.3

# Taittiriyabrahmana 3.7.3

Taittirīyabrāhmaṇa 3.7.3

- **Language:** Sanskrit

### [3.7.3.1](https://indike.org/pramana/in.veda.brahmana.taittiriya.3.7.3.1)

ví vā́ eṣá indriyéṇa vīryèṇa\_ṛdhyate /  
yásya\_ā́hitāgner agnír mathyámāno ná jā́yate /  
yátrānyáṃ páśyet /  
táta āhṛ́tya hotavyàm /  
agnā́v evā́syāgnihotrám̐ hutáṃ bhavati /  
yády anyáṃ ná vindét /  
ajā́yām̐ hotavyàm /  
āgneyī́ vā́ eṣā́ /  
yád ajā́ /  
agnā́v evā́syāgnihotrám̐ hutáṃ bhavati //

### [3.7.3.2](https://indike.org/pramana/in.veda.brahmana.taittiriya.3.7.3.2)

ajásya tú nā́śnīyāt /  
yád ajásyāśnīyā́t /  
yā́m evā́gnā́v ā́hutiṃ juhuyā́t /  
tā́m adyāt /  
tásmād ajásya ná\_āśyam /  
yády ajā́ṃ ná vindét /  
brāhmaṇásya dákṣiṇe háste hótavyàm /  
eṣá vā́ agnír vaiśvānaráḥ /  
yád brāhmaṇáḥ /  
agnā́v evā́syāgnihotrám̐ hutáṃ bhavati //

### [3.7.3.3](https://indike.org/pramana/in.veda.brahmana.taittiriya.3.7.3.3)

brāhmaṇáṃ tú vasatyài nā́parundhyāt /  
yád brāhmaṇáṃ vasatyā́ aparundhyā́t /  
yásminn evā́gnā́v ā́hutiṃ juhuyā́t /  
táṃ bhāgadhéyena vyàrdhayet /  
tásmād brāhmaṇó vasatyài nā́parúdhyáḥ /  
yádi brāhmaṇáṃ ná vindét /  
darbhastambé hotavyam /  
agnivā́n vái darbhastambáḥ /  
agnā́v evā́syāgnihotrám̐ hutáṃ bhavati /  
darbhā́m̐s tú nā́dhyāsīta //

### [3.7.3.4](https://indike.org/pramana/in.veda.brahmana.taittiriya.3.7.3.4)

yád darbhā́n adhyā́sīta /  
yā́m evā́gnā́v ā́hutiṃ juhuyā́t /  
tā́m ádhyāsīta /  
tásmād darbhā́ nā́dhyāsitavyā̀ḥ /  
yádi darbhā́n ná vindét /  
apsú hotavyàm /  
ā́po vái sárvā devátāḥ /  
devátāsv evā́syāgnihotrám̐ hutáṃ bhavati /  
ā́pas tú ná páricakṣīta /  
yád āpaḥ paricákṣīta //

### [3.7.3.5](https://indike.org/pramana/in.veda.brahmana.taittiriya.3.7.3.5)

yā́m evā́psv ā́hutiṃ juhuyā́t /  
tā́ṃ páricakṣīta /  
tásmād ā́po ná paricákṣyāḥ /  
médhyā ca vā́ etásyāmedhyā́ ca tanúvau sám̐sṛjyete /  
yásya\_ā́hitāgner anyáir agníbhir agnáyaḥ sam̐sṛjyánte /  
agnáye vívicaye puroḍā́śam aṣṭā́kapālaṃ nírvapet /  
médhyāṃ ca\_evā́syāmedhyā́ṃ ca tanúvau vyā́vartayati /  
agnáye vratápataye puroḍā́śam aṣṭā́kapālaṃ nírvapet /  
agním evá vratápatim̐ svéna bhāgadhéyena\_úpadhāvati /  
sá eváinaṃ vratám ā́lambhayati //

### [3.7.3.6](https://indike.org/pramana/in.veda.brahmana.taittiriya.3.7.3.6)

gárbham̐ srávantam agadám akaḥ /  
agnír índras tváṣṭā bṛ́haspátiḥ /  
pṛthivyā́m ávacuścota\_etát /  
nā́bhí prā́pnoti nírṛtiṃ parācáiḥ /  
réto vā́ etád vā́jinam ā́hitāgneḥ /  
yád agnihotrám /  
tád yát srávet /  
réto 'sya vā́jinam̐ sravet /  
gárbham̐ srávantam agadám akar íty āha /  
réta evā́smin vā́jinaṃ dadhāti //

### [3.7.3.7](https://indike.org/pramana/in.veda.brahmana.taittiriya.3.7.3.7)

agnír íty āha /  
agnír vái retodhā́ḥ /  
réta evá tád dadhāti /  
índra íty āha /  
indriyám evā́smin dadhāti /  
tváṣṭā\_íty āha /  
tváṣṭā vái paśūnā́m mithunā́nām̐ rūpakṛ́t /  
rūpám evá paśúṣu dadhāti /  
bṛhaspátir íty āha /  
bráhma vái devā́nāṃ bṛ́haspátiḥ /  
bráhmaṇā\_evā́smai prajā́ḥ prájanayati /  
pṛthivyā́m ávacuścota\_etád íty āha /  
asyā́m evá\_enat prátiṣṭhāpayati nā́bhí prā́pnoti nírṛtiṃ parācáir íty āha /  
rákṣasām ápahatyai //

## Commentaries (1)

- [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.194.56.124) — Sāyaṇa, Sanskrit

## Linked texts (1)

- [Āpastambaśrautasūtra](https://indike.org/pramana/in.vedanga.kalpa.srauta.apastamba.9.4.1.a) — Āpastamba, Sanskrit

---
Source: [https://indike.org/pramana/in.veda.brahmana.taittiriya.3.7.3](https://indike.org/pramana/in.veda.brahmana.taittiriya.3.7.3) · Pramāṇa