[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.7.4 # Taittiriyabrahmana 3.7.4 Taittirīyabrāhmaṇa 3.7.4 - **Language:** Sanskrit ### [3.7.4.1](https://indike.org/pramana/in.veda.brahmana.taittiriya.3.7.4.1) yā́ḥ purástāt prasrávanti / upáriṣṭāt sarvátaś ca yā́ḥ / tā́bhī raśmípavitrābhiḥ / śraddhā́ṃ yajñám ā́rabhe / dévā gātuvidaḥ / gātúṃ yajñā́ya vindata / mánasas pátinā devéna / vā́tād yajñáḥ práyujyatām / tṛtī́yasyai diváḥ / gāyatriyā́ sóma ā́bhṛtaḥ // ### [3.7.4.2](https://indike.org/pramana/in.veda.brahmana.taittiriya.3.7.4.2) somapīthā́ya sáṃnayitum / vákalam ántaram ā́dade / ā́po devīḥ śuddhā́ḥ stha / imā́ pā́trāṇi śundhata / upātaṅkyā̀ya devā́nām / parṇavalkám utá śundhata / páyo gṛhéṣu páyo aghniyā́su / páyo vatséṣu páya índrāya havíṣe dhriyasva / gāyatrī́ parṇavalkéna / páyaḥ sómaṃ karotv imám // ### [3.7.4.3](https://indike.org/pramana/in.veda.brahmana.taittiriya.3.7.4.3) agníṃ gṛhṇāmi suráthaṃ yó mayobhū́ḥ / yá udyántam āróhati sū́ryam áhne / ādityáṃ jyótiṣāṃ jyótir uttamám / śvó yajñā́ya ramatāṃ devátābhyaḥ / vásūn rudrā́n ādityān / índreṇa sahá devátāḥ / tā́ḥ pū́rvaḥ párigṛhṇāmi / svá āyátane manīṣáyā / imā́m ū́rjaṃ pañcadaśī́ṃ yé práviṣṭāḥ / tā́n devā́n párigṛhṇāmi pū́rvāḥ // ### [3.7.4.4](https://indike.org/pramana/in.veda.brahmana.taittiriya.3.7.4.4) agnír havyavā́ḍ ihá tā́n ā́vahatu / paurṇamāsám̐ havír idám eṣāṃ máyi / āmāvāsyàm̐ havír idám eṣāṃ máyi / antarā́\_agnī́ paśávaḥ / devasam̐sádam ā́gaman / tā́n pū́rvaḥ párigṛhṇāmi / svá āyátane manīṣáyā / ihá prajā́ viśvárūpā ramantām / agníṃ gṛhápatim abhí saṃvásānāḥ / tā́ḥ pū́rvaḥ párigṛhṇāmi // ### [3.7.4.5](https://indike.org/pramana/in.veda.brahmana.taittiriya.3.7.4.5) svá āyátane manīṣáyā / ihá paśávo viśvárūpā ramantām / agníṃ gṛhápatim abhí saṃvásānāḥ / tā́n pū́rvaḥ párigṛhṇāmi / svá āyátane manīṣáyā / ayáṃ pitṛṇā́m agníḥ / ávāḍ ḍhavyā pitṛ́bhya ā́ / táṃ pū́rvaḥ párigṛhṇāmi / áviṣaṃ naḥ pitúṃ karat / ájasraṃ tvā́m̐ sabhāpālāḥ // ### [3.7.4.6](https://indike.org/pramana/in.veda.brahmana.taittiriya.3.7.4.6) vijayábhāgam̐ sámindhatām / ágne dīdā́ya me sabhya / víjityai śarádaḥ śatám / ánnam āvasathī́yam / abhíharāṇi śarádaḥ śatám / āvasathé śríyaṃ mántram / áhir budhníyo níyacchatu / idám ahám agníjyeṣṭhebhyaḥ / vásubhyo yajñáṃ prábravīmi / idám ahám índrajyeṣṭhebhyaḥ // ### [3.7.4.7](https://indike.org/pramana/in.veda.brahmana.taittiriya.3.7.4.7) rudrébhyo yajñáṃ prábravīmi / idám aháṃ váruṇajyeṣṭhebhyaḥ / ādityébhyo yajñáṃ prábravīmi / páyasvatīr óṣadhayaḥ / páyasvad vīrúdhāṃ páyaḥ / apā́ṃ páyaso yát páyaḥ / téna mā́m indra sám̐sṛja / ágne vratapate vratáṃ cariṣyāmi / tát\_śakeyaṃ tán me rādhyatām / vā́yo vratapata ā́ditya vratapate // ### [3.7.4.8](https://indike.org/pramana/in.veda.brahmana.taittiriya.3.7.4.8) vratā́nāṃ vratapate vratáṃ cariṣyāmi / tát\_śakeyaṃ tán me rādhyatām / imā́ṃ prācīm údīcīm / íṣam ū́rjam abhí sám̐skṛtām / bahuparṇā́m áśuṣkāgrām / hárāmi paśupā́m aham / yát kṛ́ṣṇo rūpáṃ kṛtvā́ / prā́viśas tváṃ vanaspatī́n / tátas tvā́m ekavim̐śatidhā́ / sáṃbharāmi susaṃbhṛ́tā // ### [3.7.4.9](https://indike.org/pramana/in.veda.brahmana.taittiriya.3.7.4.9) trī́n paridhī́m̐s tisráḥ samídhaḥ / yajñā́yur anusaṃcarā́n / upaveṣáṃ mékṣaṇaṃ dhṛ́ṣṭim / sáṃbharāmi susaṃbhṛ́tā / yā́ jātā́ óṣadhayaḥ / devébhyas triyugáṃ purā́ / tā́sāṃ párva rādhyāsam / paristarám āháran / apā́ṃ médhyaṃ yajñíyam / sádevam̐ śivám astu me // ### [3.7.4.10](https://indike.org/pramana/in.veda.brahmana.taittiriya.3.7.4.10) ācchettā́ vo mā́ riṣam / jī́vāni śarádaḥ śatám / áparimitānāṃ párimitāḥ / sáṃnahye sukṛtā́ya kám / éno mā́ nígāṃ katamác cana\_ahám / púnar utthā́ya bahulā́ bhavantu / sakṛdācchinnáṃ barhír ū́rṇāmṛdu / syonáṃ pitṛ́bhyas tvā bharāmy ahám / asmínt sīdantu me pitáraḥ somyā́ḥ / pitāmahā́ḥ prápitāmahāś cānugáiḥ sahá // ### [3.7.4.11](https://indike.org/pramana/in.veda.brahmana.taittiriya.3.7.4.11) trivṛ́t palāśé darbháḥ / íyān prādeśásaṃmitaḥ / yajñé pavítraṃ pótṛtamam / páyo havyáṃ karotu me / prāṇāpānáu / yajñásyā́ṅgāni sarvaśáḥ / āpyāyáyantau sáṃcaratām / pavítre havyaśódhane / pavítre stho vaiṣṇavī́ / vāyúr vāṃ mánasā punātu // ### [3.7.4.12](https://indike.org/pramana/in.veda.brahmana.taittiriya.3.7.4.12) ayáṃ prāṇáś cāpānáś ca / yájamānam ápigacchatām / yajñé hy ábhūtāṃ pótārau / pavítre havyaśódhane / tváyā védiṃ vividuḥ pṛthivī́m / tváyā yajñó jāyate viśvadā́niḥ / ácchidraṃ yajñám ánveṣi vidvā́n / tváyā hótā sáṃtanoty ardhamasā́n / trayastrim̐śò 'si tántūnām / pavítreṇa sahá\_āgahi // ### [3.7.4.13](https://indike.org/pramana/in.veda.brahmana.taittiriya.3.7.4.13) śivé 'yám̐ rájjur abhidhā́nī / aghniyā́m úpasevatām / áprasram̐sāya yajñásya / ukhé úpadadhāmy ahám / paśúbhiḥ sáṃnītaṃ bibhṛtām / índrāya śṛtáṃ dádhi / upaveṣò 'si yajñā́ya / tvā́ṃ pariveṣám adhārayan / índrāya havíḥ kṛṇvántaḥ / śiváḥ śagmó bhavāsi naḥ // ### [3.7.4.14](https://indike.org/pramana/in.veda.brahmana.taittiriya.3.7.4.14) ámṛnmayaṃ devapātrám / yajñásya\_ā́yuṣi práyujyatām / tiraḥpavitrám átinītāḥ / ā́po dhāraya mā́\_atiguḥ / devéna savitrā́\_utpūtāḥ / vásoḥ sū́ryasya raśmíbhiḥ / gā́ṃ dohapavitré rájjum / sárvā pā́trāṇi śundhata / etā́ ā́caranti mádhumad dúhānāḥ / prajā́vatīr yaśáso viśvárūpāḥ // ### [3.7.4.15](https://indike.org/pramana/in.veda.brahmana.taittiriya.3.7.4.15) bahvī́r bhávantīr úpa jā́yamānāḥ / ihá va índro ramayatu gāvaḥ / pūṣā́ stha / ayakṣmā́ vaḥ prajáyā sám̐sṛjāmi / rāyás póṣeṇa bahulā́ bhavantīḥ / ū́rjaṃ páyaḥ pínvamānā ghṛtáṃ ca / jīvó jī́vantīr úpa vaḥ sadeyam / dyáuś ca\_imáṃ yajñáṃ pṛthivī́ ca sáṃduhātām / dhātā́ sómena sahá vā́tena vāyúḥ / yájamānāya dráviṇaṃ dadhātu // ### [3.7.4.16](https://indike.org/pramana/in.veda.brahmana.taittiriya.3.7.4.16) útsaṃ duhanti kaláśaṃ cáturbilam / íḍāṃ devī́ṃ mádhumatīm̐ suvarvídam / tád indrāgnī́ jinvatam̐ sūnṛ́tāvat / tád yájamānam amṛtatvé dadhātu / kā́m adhukṣaḥ prá ṇo brūhi / índrāya havír indriyám / amū́ṃ yásyāṃ devā́nām / manuṣyā̀ṇāṃ páyo hitám / bahú dugdhī́ndrāya devébhyaḥ / havyám ā́pyāyatāṃ púnaḥ // ### [3.7.4.17](https://indike.org/pramana/in.veda.brahmana.taittiriya.3.7.4.17) vatsébhyo manuṣyèbhyaḥ / punardohā́ya kalpatām / yajñásya sáṃtatir asi / yajñásya tvā sáṃtatim ánu sáṃtanomi / ádastam asi víṣṇave tvā / yajñā́yāpidadhāmy ahám / adbhír áriktena pā́treṇa / yā́ḥ pūtā́ḥ pariśérate / ayáṃ páyaḥ sómaṃ kṛtvā / svā́ṃ yónim ápigacchatu // ### [3.7.4.18](https://indike.org/pramana/in.veda.brahmana.taittiriya.3.7.4.18) parṇavalkáḥ pavítram / saumyáḥ sómād dhí nírmitaḥ / imáu parṇáṃ ca darbháṃ ca / devā́nām̐ havyaśódhanau / prātarveṣā́ya gopāya víṣṇo havyám̐ hí rákṣasi / ubhā́v agnī́ upastṛṇaté / devátā úpavasantu me / aháṃ grāmyā́n úpavasāmi / máhyaṃ gópataye paśū́n // ## Commentaries (1) - [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.194.56.129) — Sāyaṇa, Sanskrit ## Linked texts (3) - [Bhāradvājaśrautasūtra](https://indike.org/pramana/in.vedanga.kalpa.srauta.bharadvaja.64.3) — Sanskrit - [Kalpaḥ](https://indike.org/pramana/in.jaina.post.vidhi.mantra.kalpah.2.2.4.3) — Sanskrit - [Hiraṇyakeśiśrautasūtra (ed. Kāśīnāthaśāstrī Āgāśe, Ānandāśrama 1907, with Mahādeva's Vaijayantī)](https://indike.org/pramana/in.vedanga.kalpa.srauta.hiranyakesi*agase.1.41.1) — Sanskrit --- Source: [https://indike.org/pramana/in.veda.brahmana.taittiriya.3.7.4](https://indike.org/pramana/in.veda.brahmana.taittiriya.3.7.4) · Pramāṇa