[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.7.5 # Taittiriyabrahmana 3.7.5 Taittirīyabrāhmaṇa 3.7.5 - **Language:** Sanskrit ### [3.7.5.1](https://indike.org/pramana/in.veda.brahmana.taittiriya.3.7.5.1) dévā devéṣu párākramadhvam / práthamā dvitī́yeṣu / dvítīyās tṛtī́yeṣu / trírekādaśā ihá mā\_avata / idám̐ śakeyaṃ yád idáṃ karómi / ātmā́ karotv ātmáne / idáṃ kariṣye bheṣajám / idáṃ me viśvabheṣajā / áśvinā prā́vataṃ yuvám / idám ahám̐ sénāyā abhī́tvaryai // ### [3.7.5.2](https://indike.org/pramana/in.veda.brahmana.taittiriya.3.7.5.2) múkham ápohāmi / sū́ryajyotir víbhāhi / mahatá indriyā́ya / ā́pyāyatāṃ ghṛtáyoniḥ / agnír havyā́\_anumanyatām / khám aṅkṣva tvácam aṅkṣva / surūpáṃ tvā vasuvídam / paśūnā́ṃ téjasā / agnáye júṣṭam abhíghārayāmi / syonáṃ te sádanaṃ karomi // ### [3.7.5.3](https://indike.org/pramana/in.veda.brahmana.taittiriya.3.7.5.3) ghṛtásya dhā́rayā suśévaṃ kalpayāmi / tásmint sīdāmṛ́te prátitiṣṭha / vrīhīṇā́ṃ medha sumanasyámānaḥ / ārdráḥ prathasnur bhúvanasya gopā́ḥ / śṛtá útsnāti janitā́ matīnā́m / yás ta ātmā́ paśúṣu práviṣṭaḥ / devā́nāṃ viṣṭhām ánu yó vitasthé / ātmanvā́nt soma ghṛtávān hí bhūtvā́ / devā́n gaccha súvar vida yájamānāya máhyam / írā bhū́tiḥ pṛthivyái ráso mā́\_utkramīt // ### [3.7.5.4](https://indike.org/pramana/in.veda.brahmana.taittiriya.3.7.5.4) dévāḥ pitaraḥ pítaro devāḥ / yò 'hám ásmi sá sán yaje / yásyāsmi ná tám antár emi / sváṃ ma iṣṭám̐ sváṃ dattám / sváṃ pūrtám̐ svám̐ śrāntám / svám̐ hutám / tásya me 'gnír upadraṣṭā́ / vāyúr upaśrotā́ / ādityò 'nukhyātā́ / dyáuḥ pitā́ // ### [3.7.5.5](https://indike.org/pramana/in.veda.brahmana.taittiriya.3.7.5.5) pṛthivī́ mātā́ / prajā́patir bándhuḥ / yá evā́smi sá sán yaje / mā́ bher mā́ sáṃvikthā mā́ tvā him̐siṣam / mā́ te téjó 'pakramīt / bharatám úddhara\_im ánusiñca / avadā́nāni te pratyávadāsyāmi / námas te astu mā́ mā him̐sīḥ / yád avadā́nāni te 'vadyán / vílomā́kārṣam ātmánaḥ // ### [3.7.5.6](https://indike.org/pramana/in.veda.brahmana.taittiriya.3.7.5.6) ā́jyena prátyanajmy enat / tát ta ā́pyāyatāṃ púnaḥ / ájyāyo yavamātrā́t / āvyādhā́t kṛtyatām idám / mā́ rūrupāma yajñásya / śuddhám̐ svìṣṭam idám̐ havíḥ / mánunā dṛṣṭāṃ ghṛtápadīm / mitrā́váruṇasamīritām / dakṣiṇārdhā́d ásaṃbhindan / ávadyāmy ekatómukhām // ### [3.7.5.7](https://indike.org/pramana/in.veda.brahmana.taittiriya.3.7.5.7) íḍe bhāgáṃ juṣasva naḥ / jínva gā́ jínvā́rvataḥ / tásyās te bhakṣivā́ṇaḥ syāma / sarvā́tmānaḥ sarvágaṇāḥ / brádhna pínvasva / dádato me mā́ kṣāyi / kurvató me mā́\_upadasat / diśā́ṃ kŀ̥ptir asi / díśo me kalpantām / kálpantāṃ me díśaḥ // ### [3.7.5.8](https://indike.org/pramana/in.veda.brahmana.taittiriya.3.7.5.8) dáivīś ca mā́nuṣīś ca / ahorātré me kalpetām / ardhamāsā́ me kalpantām / mā́sā me kalpantām / ṛtávo me kalpantām / saṃvatsaró me kalpatām / kŀ̥ptir asi kálpatāṃ me / ā́śānāṃ tvā\_āśāpālébhyaḥ / catúrbhyo amṛ́tebhyaḥ / idáṃ bhūtásyā́dhyakṣebhyaḥ // ### [3.7.5.9](https://indike.org/pramana/in.veda.brahmana.taittiriya.3.7.5.9) vidhéma havíṣā vayám / bhájatāṃ bhāgī́ bhāgám / mā́\_abhāgó bhakta nír abhāgáṃ bhajāmaḥ / apás pinva / óṣadhīr jinva / dvipā́t pāhi / cátuṣpād ava / divó vṛ́ṣṭim éraya / brāhmaṇā́nām idám̐ havíḥ // ### [3.7.5.10](https://indike.org/pramana/in.veda.brahmana.taittiriya.3.7.5.10) somyā́nām̐ somapīthínām / nírbhaktó 'brāhmaṇaḥ / ná\_ihā́brāhmaṇasyāsti / sámaṅktāṃ barhír havíṣā ghṛténa / sám ādityáir vásubhiḥ sáṃ marúdbhiḥ / sám índreṇa víśvebhir devébhir aṅktām / divyáṃ nábho gacchatu yát svā́hā / indrāṇī́vāvidhavā́ bhūyāsam / áditir iva suputrā́ / asthūrí tvā gārhapatya // ### [3.7.5.11](https://indike.org/pramana/in.veda.brahmana.taittiriya.3.7.5.11) úpa níṣade suprajāstvā́ya / sáṃ patnī pátyā sukṛténa gacchatām / yajñásya yuktáu dhúryāv abhūtām / saṃjānānáu víjahatām árātīḥ / diví jyótir ajáram ā́rabhetām / dáśa te tanúvo yajña yajñíyāḥ / tā́ḥ prīṇātu yájamāno ghṛténa / nāriṣṭháyoḥ praśíṣam ī́ḍamānaḥ / devā́nāṃ dáivyé 'pi yájamāno 'mṛ́to 'bhūt / yáṃ vāṃ devā́ akalpayan // ### [3.7.5.12](https://indike.org/pramana/in.veda.brahmana.taittiriya.3.7.5.12) ūrjó bhāgám̐ śatakratū / etád vāṃ téna prīṇāni / téna tṛpyatam am̐hahau / aháṃ devā́nām̐ sukṛ́tām asmi loké / máma\_idám iṣṭáṃ ná míthur bhavāti / aháṃ nāriṣṭhā́v ánuyajāmi vidvā́n / yád ābhyām índro ádadhād bhāgadhéyam / ádārasṛd bhavata deva soma / asmín yajñé maruto mṛḍatā naḥ / mā́ no vidad abhí bhāmó áśastiḥ // ### [3.7.5.13](https://indike.org/pramana/in.veda.brahmana.taittiriya.3.7.5.13) mā́ no vidad vṛjánā dvéṣyā yā́ / ṛṣabháṃ vājínaṃ vayám / pūrṇámāsaṃ yajāmahe / sá no dohatām̐ suvī́ryam / rāyás póṣam̐ sahasríṇam / prāṇā́ya surā́dhase / pūrṇámāsāya svā́hā / amāvāsyā̀ subhágā suśévā / dhenúr iva bhū́ya āpyā́yamānā / sā́ no dohatām̐ suvī́ryam / rāyás póṣam̐ sahasríṇam / apānā́ya surā́dhase / amāvāsyā̀yai svā́hā / abhístṛṇīhi páridhehi védim / jāmíṃ mā́ him̐sīr amuyā́ śáyānā / hotṛṣádanā háritāḥ suvárṇāḥ / niṣkā imé yájamānasya bradhné // ## Linked texts (5) - [Mānavaśrautasūtra](https://indike.org/pramana/in.vedanga.kalpa.srauta.manava.1.3.2.21a_2) — Sanskrit - [Kātyāyanaśrautasūtra](https://indike.org/pramana/in.vedanga.kalpa.srauta.katyayana.2.8.14) — Kātyāyana (Vājasaneyi sūtrakāra), Sanskrit - [Āgniveśyagṛhyasūtra](https://indike.org/pramana/in.vedanga.kalpa.grhya.agnivesya.1.7.3.24) — Agniveśa, Sanskrit - [Kalpaḥ](https://indike.org/pramana/in.jaina.post.vidhi.mantra.kalpah.2.6.1.167_807) — Sanskrit - [Hiraṇyakeśiśrautasūtra (ed. Kāśīnāthaśāstrī Āgāśe, Ānandāśrama 1907, with Mahādeva's Vaijayantī)](https://indike.org/pramana/in.vedanga.kalpa.srauta.hiranyakesi*agase.1.95.175) — Sanskrit --- Source: [https://indike.org/pramana/in.veda.brahmana.taittiriya.3.7.5](https://indike.org/pramana/in.veda.brahmana.taittiriya.3.7.5) · Pramāṇa