[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.7.6 # Taittiriyabrahmana 3.7.6 Taittirīyabrāhmaṇa 3.7.6 - **Language:** Sanskrit ### [3.7.6.1](https://indike.org/pramana/in.veda.brahmana.taittiriya.3.7.6.1) páristṛṇīta páridhattāgním / párihito 'gníryájamānaṃ bhunaktu / apā́m̐ rása óṣadhīnām̐ suvárṇaḥ / niṣkā́ imé yájamānasya santu kāmadúghāḥ / amútrāmúṣmin\_loké / bhū́pate bhúvanapate / maható bhūtásya pate / brahmā́ṇaṃ tvā vṛṇīmahe / aháṃ bhū́patir aháṃ bhúvanapatiḥ / aháṃ maható bhūtásya pátiḥ // ### [3.7.6.2](https://indike.org/pramana/in.veda.brahmana.taittiriya.3.7.6.2) devéna savitrā́ prásūta ā́rtvijyaṃ kariṣyāmi / déva savitar etáṃ tvā vṛṇate / bṛ́haspátiṃ dáivyaṃ brahmā́ṇam / tád aháṃ mánase prábravīmi / máno gāyatriyái / gāyatrī́ triṣṭúbhe / triṣṭúb jágatyai / jágaty anuṣṭúbhe / anuṣṭúk paṅktyái / paṅktíḥ prajā́pataye // ### [3.7.6.3](https://indike.org/pramana/in.veda.brahmana.taittiriya.3.7.6.3) prajā́patir víśvebhyo devébhyaḥ / víśve devā́ bṛ́haspátaye / bṛ́haspátir bráhmaṇe / bráhma bhū́r bhúvaḥ súvah / bṛ́haspátir devā́nāṃ brahmā́ / aháṃ manuṣyā̀ṇām / bṛ́haspate yajñáṃ gopāya / idáṃ tásmai harmyáṃ karomi / yó vo devāś cárati brahmacáryam / medhāvī́ dikṣú mánasā tapasvī́ // ### [3.7.6.4](https://indike.org/pramana/in.veda.brahmana.taittiriya.3.7.6.4) antár dūtáś carati mā́nuṣīṣu / cátuḥśikhaṇḍā yuvatíḥ supéśāḥ / ghṛtápratīkā bhúvanasya mádhye / marmṛjyámānā mahaté sáubhagāya / máhyaṃ dhukṣva yájamānāya kā́mān / bhūmir bhūtvā́ mahimā́naṃ pupoṣa / táto devī́ vardhayate payām̐si / yajñíyā yajñáṃ ví ca yánti sám̐ ca / óṣadhīr ā́pa ihá śakvarīś ca / yó mā hṛdā́ mánasā yáś ca vācā́ // ### [3.7.6.5](https://indike.org/pramana/in.veda.brahmana.taittiriya.3.7.6.5) yó bráhmaṇā kármaṇā dvéṣti devāḥ / yáḥ śruténa hṛ́dayena\_iṣṇatā́ ca / tásya\_indra vájreṇa śíraś chinadmi / ū́rṇāmṛdu práthamānam̐ syonám / devébhyo júṣṭam̐ sádanāya barhíḥ / suvargé loké yájamānam̐ hí dhehí / mā́ṃ nā́kasya pṛṣṭhé paramé vyòman / cátuḥśikhaṇḍā yuvatíḥ supéśāḥ / ghṛtápratīkā vayúnāni vaste / sā́ stīryámāṇā mahaté sáubhagāya // ### [3.7.6.6](https://indike.org/pramana/in.veda.brahmana.taittiriya.3.7.6.6) sā́ me dhukṣva yájamānāya kā́mān / śivā́ ca me śagmā́ ca\_edhi / syonā́ ca me suṣádā ca\_edhi / ū́rjasvatī ca me páyasvatī ca\_edhi / íṣam ū́rjaṃ me pinvasva / bráhma téjo me pinvasva / kṣatrám ójo me pinvasva / víśaṃ púṣṭiṃ me pinvasva / ā́yur annā́dyaṃ me pinvasva / prajā́ṃ paśū́n me pinvasva // ### [3.7.6.7](https://indike.org/pramana/in.veda.brahmana.taittiriya.3.7.6.7) asmín yajñá úpa bhū́ya ín nú me / ávikṣobhāya paridhī́n dadhāmi / dhartā́ dharúṇo dhárīyān / agnír dvéṣām̐si nír itó nudātai / vícchinadmi vídhṛtībhyām̐ sapátnān / jātā́n bhrā́tṛbyān yé ca janiṣyámānāḥ / viśó yantrā́bhyāṃ vídhamāmy enān / ahám̐ svā́nām uttamò 'sāni devāḥ / viśó yantré nudámāne árātim / víśvaṃ pāpmā́nam ámatiṃ durmarāyúm // ### [3.7.6.8](https://indike.org/pramana/in.veda.brahmana.taittiriya.3.7.6.8) sī́dantī devī́ sukṛtásya loké / dhṛ́tī stho vídhṛtī svádhṛtī / prāṇā́n máyi dhārayatam / prajā́ṃ máyi dhārayatam / paśū́n máyi dhārayatam / ayáṃ prastará ubháyasya dhartā́ / dhartā́ prayājā́nām utā́nūyājā́nām / sá dādhāra samídho viśvárūpāḥ / tásmint srúco ádhy ā́sādayāmi / ā́roha pathó júhu devayā́nān // ### [3.7.6.9](https://indike.org/pramana/in.veda.brahmana.taittiriya.3.7.6.9) yátrá\_ṛṣayaḥ prathamajā́ yé purāṇā́ḥ / híraṇyapakṣā\_ājirā́ sámbhṛtāṅgā / váhāsi mā sukṛ́tāṃ yátra lokā́ḥ / ávāháṃ bādha upabhṛ́tā sapátnān / jātā́n bhrā́tṛvyān yé ca janiṣyámāṇāḥ / dóhaṃ yajñám̐ sudúghām iva dhenúm / ahám úttaro bhūyāsam / ádhare mát sapátnāḥ / yó mā vācā́ mánasā durmarāyúḥ / hṛdā́\_arātīyā́d abhidā́sad agne // ### [3.7.6.10](https://indike.org/pramana/in.veda.brahmana.taittiriya.3.7.6.10) idám asya cittam ádharaṃ dhruvā́yāḥ / ahám úttaro bhūyāsam / ádhare mát sapátnāḥ / ṛṣabhò 'si śākvaráḥ / ghṛtā́cīnām̐ sūnúḥ / priyéṇa nā́mnā priyé sádasi sīda / syonó me sīda suṣádaḥ pṛthivyā́m / práthayi prajáyā paśúbhiḥ suvargé loké / diví sīda pṛthivyā́m antárikṣe / ahám úttaro bhūyāsam // ### [3.7.6.11](https://indike.org/pramana/in.veda.brahmana.taittiriya.3.7.6.11) ádhare mát sapátnāḥ / iyám̐ sthālī́ ghṛtásya pūrṇā́ / ácchinnapayāḥ śatádhāra útsaḥ / māruténa śarmaṇā dáivyena / yajñò 'si sarvátaḥ śritáḥ / sarváto mā́ṃ bhūtáṃ bhavaiṣyát\_śrayatām / śatáṃ me santv āśíṣaḥ / sahásraṃ me santu sūnṛ́tāḥ / írāvatīḥ paśumátīḥ / prajā́patir asi sarvátaḥ śritáḥ // ### [3.7.6.12](https://indike.org/pramana/in.veda.brahmana.taittiriya.3.7.6.12) sarváto mā́ṃ bhūtáṃ bhaviṣyát\_śrayatām / śatáṃ me santv āśíṣaḥ / sahásraṃ me santu sūnṛ́tāḥ / írāvatīḥ paśumátīḥ / idám indriyám amṛ́taṃ vīryàm / anéna\_índrāya paśávo 'cikitsan / téna devā avató 'pa mā́m / iha\_íṣam ū́rjaṃ yáśaḥ sáha ójaḥ saneyam / śṛtáṃ máyi śrayatām / yát pṛthivī́m ácarat tát práviṣṭam // ### [3.7.6.13](https://indike.org/pramana/in.veda.brahmana.taittiriya.3.7.6.13) yénā́siñcad bálam índre prajā́patiḥ / idáṃ tát\_śukráṃ mádhu vājínīvat / yéna\_upáriṣṭād ádhinon mahendrám / dádhi mā́ṃ dhinotu / ayáṃ vedáḥ pṛthivī́m ánvavindat / gúhā satī́ṃ gáhane gáhvareṣu / sá vindatu yájamānāya lokám / ácchidraṃ yajñáṃ bhū́rikarmā karotu / ayáṃ yajñáḥ sámasadad dhavíṣmān / ṛcā́ sā́mnā yájuṣā devátābhiḥ // ### [3.7.6.14](https://indike.org/pramana/in.veda.brahmana.taittiriya.3.7.6.14) téna lokā́nt sū́ryavato jayema / índrasya sakhyám amṛtatvám aśyām / yó naḥ kánīya ihá kāmáyātai / asmín yajñé yájamānāya máhyam / ápa tám indrāgnī́ bhúvanān nudetām / aháṃ prajā́ṃ vīrávatīṃ videya / ágne vājajit / vā́jaṃ tvā sariṣyántaṃ / vā́jaṃ jeṣyántam / vājínaṃ vājajítam // ### [3.7.6.15](https://indike.org/pramana/in.veda.brahmana.taittiriya.3.7.6.15) vājajityā́yai sáṃmārjmi / agnímannādám annā́dyāya / úpahūto dyáuḥ pitā / úpa mā́ṃ dyáuḥ pitā́ hvayatām / agnír ā́gnīdhrāt / ā́yuṣe várcase jīvā́tvái púṇyāya / úpahūtā pṛthivī́ mātā́ / úpa mā́ṃ mātā́ pṛthivī́ hvayatām / agnír ā́gnīdhrāt // ### [3.7.6.16](https://indike.org/pramana/in.veda.brahmana.taittiriya.3.7.6.16) ā́yuṣe várcase / jīvā́tvái púṇyāya / máno jyótir juṣatām ā́jyam / vícchinnaṃ yajñám̐ sam imáṃ dadhātu / bṛ́haspátis tanutām imáṃ naḥ / víśve devā́ ihá mādayantām / yáṃ te agna āvṛścā́mi / aháṃ vā kṣipitáś cáran / prajā́ṃ ca tásya mū́laṃ ca / nīcáir devā nívṛścata // ### [3.7.6.17](https://indike.org/pramana/in.veda.brahmana.taittiriya.3.7.6.17) ágne yó no 'bhidā́sati / samānó yáś ca níṣṭyaḥ / idhmásya\_iva prakṣā́yataḥ / mā́ tásya\_uccheṣi kíṃcaná / yó mā́ṃ dvéṣṭi jātavedaḥ / yáṃ cāháṃ dvéṣmi yáś ca mā́m / sárvām̐s tā́n agne sáṃdaha / yā́m̐ś cāháṃ dveṣmi yé ca mā́m / ágne vājajit / vā́jaṃ tvā sasṛvā́m̐sam // ### [3.7.6.18](https://indike.org/pramana/in.veda.brahmana.taittiriya.3.7.6.18) vā́jaṃ jigivā́m̐sam / vājínaṃ vājajítam / vājajityā́yai sáṃmārjmi / agním annādám annā́dyāya / védir barhíḥ śṛtam̐ haviḥ / idhmáḥ paridháyaḥ srúcaḥ / ā́jyaṃ yajñá ṛ́co yájuḥ / yājyā̀ś ca vaṣaṭkārā́ḥ / sáṃ me sáṃnatayo namantām / idhmasaṃnáhane huté // ### [3.7.6.19](https://indike.org/pramana/in.veda.brahmana.taittiriya.3.7.6.19) diváḥ khī́ló 'vatataḥ / pṛthivyā́ ádhy útthitaḥ / ténā sahásrakāṇḍena / dviṣántam̐ śocayāmasi / dviṣán me bahú śocatu / óṣadhe mó ahám̐ śucam / yájña námas te yajña / námo námaś ca te yajña / śivéna me sáṃtiṣṭhasva / syonéna me saṃtiṣṭhasva // ### [3.7.6.20](https://indike.org/pramana/in.veda.brahmana.taittiriya.3.7.6.20) subhūténa me sáṃtiṣṭhasva / brahmavarcaséna me sáṃtiṣṭhasva / yajñásyá\_ṛddhim ánu sáṃtiṣṭhasva / úpa te yajña námaḥ / úpa te námaḥ / úpa te námaḥ / tríṣ phalīkriyámāṇānām / yó nyaṅgó avaśíṣyate / rákṣasāṃ bhāgadhéyam / ā́pas tát právahatād itáḥ // ### [3.7.6.21](https://indike.org/pramana/in.veda.brahmana.taittiriya.3.7.6.21) ulū́khale músale yác ca śū́rpe / āśiśléṣa dṛṣádi yát kapā́le / avaprúṣo viprúṣaḥ sáṃyajāmi / víśve devā́ havír idáṃ juṣantām / yajñé yā́ viprúṣaḥ sánti bahvī́ḥ / agnáu tā́ḥ sárvāḥ svìṣṭāḥ súhutā juhomi / udyánn adyá mitramahaḥ / sapátnān me anīnaśaḥ / díva\_enān vidyútā jahi / nimrócann ádharān kṛdhi // ### [3.7.6.22](https://indike.org/pramana/in.veda.brahmana.taittiriya.3.7.6.22) udyánn adyá ví no bhaja / pitā́ putrébhyo yáthā / dīrghāyutvásya ha\_iśiṣe / tásya no dehi sūrya / udyánn adyá mitramahaḥ / āróhann úttarāṃ dívam / hṛdrogáṃ máma sūrya / harimā́ṇaṃ ca nāśaya / śúkeṣu me harimā́ṇam / ropaṇā́kāsu dadhmasi // ### [3.7.6.23](https://indike.org/pramana/in.veda.brahmana.taittiriya.3.7.6.23) átho hāridravéṣu me / harimā́ṇaṃ nídadhmasi / údagād ayám ādityáḥ / víśvena sáhasā sahá / dviṣántaṃ máma randháyan / mó aháṃ dvíṣató radham / yó naḥ śápād áśapataḥ / yáś ca naḥ śápataḥ śápāt / uṣā́ś ca tásmai nimrúk ca / sárvaṃ pāpám̐ sámūhatām // yó naḥ sapátno yó ráṇaḥ / márto 'bhidā́sati devāḥ / idhmásya\_iva prakṣā́yataḥ / mā́ tásya\_úccheṣi kíṃ caná / ávasṛṣṭaḥ párāpata / śaro bráhmasam̐śitaḥ / gácchāmítrān práviśa / mā́\_eṣāṃ káṃ caná\_ucchiṣaḥ // ## Commentaries (1) - [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.195.20) — Sāyaṇa, Sanskrit ## Linked texts (4) - [Bhāradvājaśrautasūtra](https://indike.org/pramana/in.vedanga.kalpa.srauta.bharadvaja.70.2) — Sanskrit - [Kātyāyanaśrautasūtra](https://indike.org/pramana/in.vedanga.kalpa.srauta.katyayana.3.7.19) — Kātyāyana (Vājasaneyi sūtrakāra), Sanskrit - [Hiraṇyakeśiśrautasūtra (ed. Kāśīnāthaśāstrī Āgāśe, Ānandāśrama 1907, with Mahādeva's Vaijayantī)](https://indike.org/pramana/in.vedanga.kalpa.srauta.hiranyakesi*agase.6.5.3) — Sanskrit - [Kalpaḥ](https://indike.org/pramana/in.jaina.post.vidhi.mantra.kalpah.2.6.6.509_98) — Sanskrit --- Source: [https://indike.org/pramana/in.veda.brahmana.taittiriya.3.7.6](https://indike.org/pramana/in.veda.brahmana.taittiriya.3.7.6) · Pramāṇa