[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.7.7 # Taittiriyabrahmana 3.7.7 Taittirīyabrāhmaṇa 3.7.7 - **Language:** Sanskrit ### [3.7.7.1](https://indike.org/pramana/in.veda.brahmana.taittiriya.3.7.7.1) sákṣa\_idáṃ paśya / vídhartar idáṃ paśya / nā́ka\_idáṃ paśya / ramátiḥ pániṣṭhā / ṛtáṃ várṣiṣṭham / amṛ́tā yā́ny āhúḥ / sū́ryo váriṣṭho akṣábhir víbhāti / ánu dyā́vāpṛthivī́ deváputre / dīkṣā́\_asi tápaso yóniḥ / tápo 'si bráhmaṇo yóniḥ // ### [3.7.7.2](https://indike.org/pramana/in.veda.brahmana.taittiriya.3.7.7.2) bráhmāsi kṣatrásya yóniḥ / kṣatrám asy ṛtásya yóniḥ / ṛtám asi bhū́r, ārabhe / śraddhā́ṃ mánasā / dīkṣā́ṃ tápasā / víśvasya bhúvanasyā́dhipatnīm / sárve kā́mā yájamānasya santu / vā́taṃ prāṇáṃ mánasā\_anvā́rabhāmahe / prajā́patiṃ yó bhúvanasya gopā́ḥ / sá no mṛtyós trāyatāṃ pā́tv ám̐hasaḥ // ### [3.7.7.3](https://indike.org/pramana/in.veda.brahmana.taittiriya.3.7.7.3) jyóg jīvā́ jarā́m aśīmahi / índra śākvara gāyatrī́ṃ prápadye / tā́ṃ te yunajmi / índra śākvara triṣṭúbhaṃ prápadye / tā́ṃ te yunajmi / índra śākvara jágatīṃ prápadye / tā́ṃ te yunajmi / índra śākvarānuṣṭúbhaṃ prápadye / tā́ṃ te yunajmi / índra śākvara paṅktíṃ prápadye // ### [3.7.7.4](https://indike.org/pramana/in.veda.brahmana.taittiriya.3.7.7.4) tā́ṃ te yunajmi / ā́\_aháṃ dīkṣā́m aruham ṛtásya pátnīm / gāyattréṇa chándasā bráhmaṇā ca / ṛtám̐ satyè 'dhāyi / satyám ṛtè 'dhāyi / ṛtáṃ ca me satyáṃ cābhūtām / jyótir abhūvam̐ súvar agamam / suvargáṃ lokáṃ nā́kasya pṛṣṭhám / bradhnásya viṣṭápam agamam / pṛthivī́ dīkṣā́ // ### [3.7.7.5](https://indike.org/pramana/in.veda.brahmana.taittiriya.3.7.7.5) táyā\_agnír dīkṣáyā dīkṣitáḥ / yáyā\_agnír dīkṣáyā dīkṣitáḥ / táyā tvā dīkṣáyā dīkṣayāmi / antárikṣaṃ dīkṣā́ / táyā vāyúr dīkṣáyā dīkṣitáḥ / yáyā vāyúr dīkṣáyā dīkṣitáḥ / táyā tvā dīkṣáyā dīkṣayāmi / dyáur dīkṣā́ / táyā\_ādityó dīkṣáyā dīkṣitáḥ / yáyā\_ādityó dīkṣáyā dīkṣitáḥ // ### [3.7.7.6](https://indike.org/pramana/in.veda.brahmana.taittiriya.3.7.7.6) táyā tvā dīkṣáyā dīkṣayāmi / díśo dīkṣā́ / táyā candrámā dīkṣáyā dīkṣitáḥ / yáyā candrámā dīkṣáyā dīkṣitáḥ / táyā tvā dīkṣáyā dīkṣayāmi / ā́po dīkṣā́ / táyā váruṇo rā́jā dīkṣáyā dīkṣitáḥ / yáyā váruṇo rā́jā dīkṣáyā dīkṣitáḥ / táyā tvā dīkṣáyā dīkṣayāmi / óṣadhayo dīkṣā́ // ### [3.7.7.7](https://indike.org/pramana/in.veda.brahmana.taittiriya.3.7.7.7) táyā sómo rā́jā dīkṣáyā dīkṣitáḥ / yáyā sómo rā́jā dīkṣáyā dīkṣitáḥ / táyā tvā dīkṣáyā dīkṣayāmi / vā́g dīkṣā́ / táyā prāṇó dīkṣáyā dīkṣitáḥ / yáyā prāṇó dīkṣáyā dīkṣitáḥ / táyā tvā dīkṣáyā dīkṣayāmi / pṛthivī́ tvā dī́kṣamāṇam ánu dīkṣatām / antárikṣaṃ tvā dī́kṣamāṇam ánu dīkṣatām / dyáus tvā dī́kṣamāṇam ánu dīkṣatām // ### [3.7.7.8](https://indike.org/pramana/in.veda.brahmana.taittiriya.3.7.7.8) díśas tvā dī́kṣamāṇam ánu dīkṣantām / ā́pas tvā dī́kṣamāṇam ánu dīkṣantām / óṣadhayas tvā dī́kṣamāṇam ánu dīkṣantām / vā́k tvā dī́kṣamāṇam ánu dīkṣatām / ṛ́cas tvā dī́kṣamāṇam ánu dīkṣantām / sā́māni tvā dī́kṣamāṇam ánu dīkṣantām / yájūm̐ṣi tvā dī́kṣamāṇam ánu dīkṣantām / áhaś ca rā́triś ca / kṛṣíś ca vṛ́ṣṭiś ca / tvíṣiś cā́pacitiś ca // ### [3.7.7.9](https://indike.org/pramana/in.veda.brahmana.taittiriya.3.7.7.9) ā́paś ca\_óṣadhayaś ca / ū́rk ca sūnṛ́tā ca / tā́s tvā dī́kṣamāṇam ánu dīkṣantām / své dákṣe dákṣapitā\_ihá sīda / devā́nām̐ sumnó mahaté ráṇāya / svāsasthás tanúvā sáṃviśasva / pitā́\_iva\_edhi sūnáva ā́suśévaḥ / śivó mā śivám ā́viśa / satyáṃ ma ātmā́ / śraddhā́ mé 'kṣitiḥ // ### [3.7.7.10](https://indike.org/pramana/in.veda.brahmana.taittiriya.3.7.7.10) tápo me pratiṣṭhā́ / savitṛ́prasūtā mā díśo dīkṣayantu / satyám asmi / aháṃ tvád asmi mád asi tvám etát / mámāsi yónis táva yónir asmi / máma\_evá sán váha havyā́ny agne / puttráḥ pitré lokakṛ́j jātavedaḥ / ājúhvānaḥ suprátīkaḥ purástāt / ágne svā́ṃ yónim ā́sīda sādhyā́ / asmínt sadhásthe ádhy úttarasmin // ### [3.7.7.11](https://indike.org/pramana/in.veda.brahmana.taittiriya.3.7.7.11) víśve devā yájamānaś ca sīdata / ékam iṣé víṣṇus tvā\_ánvetu / dvé ūrjé víṣṇus tvā\_ánvetu / trī́ṇi vratā́ya víṣṇus tvā\_ánvetu / catvā́ri mā́yobhavāya víṣṇus tvā\_ánvetu / páñca paśúbhyo víṣṇus tvā\_ánvetu / ṣáḍ rāyás póṣāya víṣṇus tvā\_ánvetu / saptá saptábhyo hótrābhyo víṣṇus tvā\_ánvetu / sákhāyaḥ saptápadā abhūma / sakhyáṃ te gameyam // ### [3.7.7.12](https://indike.org/pramana/in.veda.brahmana.taittiriya.3.7.7.12) sakhyā́t te mā́ yoṣam / sakhyā́n me mā́ yoṣṭhāḥ / sā́\_asi subrahmaṇye / tásyās te pṛthivī́ pā́daḥ / sā́\_asi subrahmaṇye / tásyās te 'ntárikṣaṃ pā́daḥ / sā́\_asi subrahmaṇye / tásyās te dyáuḥ pā́daḥ / sā́\_asi subrahmaṇye / tásyās te díśaḥ pā́daḥ // ### [3.7.7.13](https://indike.org/pramana/in.veda.brahmana.taittiriya.3.7.7.13) parórajās te pañcamáḥ pā́daḥ / sā́ na íṣam ū́rjaṃ dhukṣva / téja indriyám / brahmavarcasám annā́dyam / vímime tvā páyasvatīm / devā́nāṃ dhenúm̐ sudúghām ánapasphurantīm / índraḥ sómaṃ pibatu / kṣémo astu naḥ / imā́ṃ narāḥ kṛṇuta védim étya / vásumatīm̐ rudrávatīm ādityávatīm // ### [3.7.7.14](https://indike.org/pramana/in.veda.brahmana.taittiriya.3.7.7.14) diváḥ / nā́bhā pṛthivyā́ḥ / yáthā\_ayáṃ yájamāno ná ríṣyet / devásya savitúḥ savé / cátuḥśikhaṇḍā yuvatíḥ supéśāḥ / ghṛtápratīkā bhúvanasya mádhye / tásyām̐ suparṇā́v ádhi yáu níviṣṭau / táyor devā́nām ádhi bhāgadhéyam / ápa jányaṃ bhayáṃ nuda / ápa cakrā́ṇi vartaya / gṛhám̐ sómasya gacchatam / ná vā́ uv etán mriyase ná riṣyasi / devā́m̐ íd eṣi pathíbhiḥ sugébhiḥ / yátra yánti sukṛ́to nā́pi duṣkṛ́taḥ / tátra tvā deváḥ savitā́ dadhātu // ## Commentaries (1) - [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.195.23) — Sāyaṇa, Sanskrit ## Linked texts (3) - [Āpastambaśrautasūtra](https://indike.org/pramana/in.vedanga.kalpa.srauta.apastamba.10.3.2.c) — Āpastamba, Sanskrit - [Bhāradvājaśrautasūtra](https://indike.org/pramana/in.vedanga.kalpa.srauta.bharadvaja.205.3) — Sanskrit - [Kāṭhakasaṃhitā](https://indike.org/pramana/in.veda.samhita.krsnayajur*kathaka.asv.1.9) — Sanskrit --- Source: [https://indike.org/pramana/in.veda.brahmana.taittiriya.3.7.7](https://indike.org/pramana/in.veda.brahmana.taittiriya.3.7.7) · Pramāṇa