<!-- Pramāṇa, a library of Indian primary sources · https://indike.org/pramana/in.veda.brahmana.taittiriya.3.7.8 -->

[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.7.8

# Taittiriyabrahmana 3.7.8

Taittirīyabrāhmaṇa 3.7.8

- **Language:** Sanskrit

### [3.7.8.1](https://indike.org/pramana/in.veda.brahmana.taittiriya.3.7.8.1)

yád asyá pāré rájasaḥ /  
śukráṃ jyótir ájāyata /  
tán naḥ parṣad áti dvíṣaḥ /  
ágne vaiśvānara svā́hā /  
yásmād bhīṣā́\_avāśiṣṭhāḥ /  
táto no ábhayaṃ kṛdhi /  
prajā́bhyaḥ sárvābhyo mṛḍa /  
námo rudrā́ya mīḍhúṣe /  
yásmād bhīṣā́ nyáṣadaḥ /  
táto no ábhayaṃ kṛdhi //

### [3.7.8.2](https://indike.org/pramana/in.veda.brahmana.taittiriya.3.7.8.2)

prajā́bhyaḥ sárvābhyo mṛḍa /  
námo rudrā́ya mīḍhúṣe /  
úd usra tiṣṭha prátitiṣṭha mā́ riṣaḥ /  
mā́\_imáṃ yajñáṃ yájamānaṃ ca rīriṣaḥ /  
suvargé loké yájamānam̐ hí dhehi /  
śáṃ na edhi dvipáde śáṃ cátuṣpade /  
yásmād bhīṣā́\_avepiṣṭhāḥ palā́yiṣṭhāḥ samájñāsthāḥ /  
táto no ábhayaṃ kṛdhi /  
prajā́bhyaḥ sárvābhyo mṛḍa /  
námo rudrā́ya mīḍhúṣe //

### [3.7.8.3](https://indike.org/pramana/in.veda.brahmana.taittiriya.3.7.8.3)

yá idám ákaḥ /  
tásmai námaḥ /  
tásmai svā́hā /  
ná vā́ uv etán mriyase, /  
ā́śānāṃ tvā, víśvā ā́śāḥ, /  
yajñásya hí sthá ṛtvíyau /  
índrāgnī cétanasya ca /  
hutāhutásya tṛpyatam /  
áhutasya hutásya ca /  
hutásya cā́hutasya ca /  
áhutasya hutásya ca /  
índrāgnī asyá sómasya /  
vītáṃ pibataṃ juṣéthām /  
mā́ yájamānaṃ támo vidat /  
mā́\_ṛtvíjo mó imā́ḥ prajā́ḥ /  
mā́ yáḥ sómam imáṃ píbāt /  
sám̐sṛṣṭam ubháyaṃ kṛtám //

## Commentaries (1)

- [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.196.13) — Sāyaṇa, Sanskrit

## Linked texts (1)

- [Kātyāyanaśrautasūtra](https://indike.org/pramana/in.vedanga.kalpa.srauta.katyayana.25.12.1) — Kātyāyana (Vājasaneyi sūtrakāra), Sanskrit

---
Source: [https://indike.org/pramana/in.veda.brahmana.taittiriya.3.7.8](https://indike.org/pramana/in.veda.brahmana.taittiriya.3.7.8) · Pramāṇa