[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.7.9 # Taittiriyabrahmana 3.7.9 Taittirīyabrāhmaṇa 3.7.9 - **Language:** Sanskrit ### [3.7.9.1](https://indike.org/pramana/in.veda.brahmana.taittiriya.3.7.9.1) anāgásas tvā vayám / índreṇa préṣitā úpa / vāyúṣ ṭe astv am̐śabhū́ḥ / mitrás te astv am̐śabhū́ḥ / váruṇas te astv am̐śabhū́ḥ / ápāṃ kṣayā ṛ́tasya garbhāḥ / bhúvanasya gopāḥ śyénā atithayaḥ / párvatānāṃ kakubhaḥ prayúto napātāraḥ / vagnúnā\_índram̐ hvayata / ghóṣeṇā́mīvām̐ś cātayata // ### [3.7.9.2](https://indike.org/pramana/in.veda.brahmana.taittiriya.3.7.9.2) yuktā́ḥ stha váhata / devā́ grā́vāṇa índur índra íty avādiṣuḥ / ā́\_índram acucyavuḥ paramásyāḥ parāvátaḥ / ā́\_asmā́t sadhásthāt / ā́\_urór antárikṣāt / ā́ subhūtám asuṣavuḥ / brahmavarcasáṃ ma ā́suṣavuḥ / samaré rákṣām̐sy avadhiṣuḥ / ápahataṃ brahmajyásya / vā́k ca tvā mánaś ca śriṇītām // ### [3.7.9.3](https://indike.org/pramana/in.veda.brahmana.taittiriya.3.7.9.3) prāṇáś ca tvā\_apānáś ca śrīṇītām / cákṣuś ca tvā śrótraṃ ca śrīṇītām / dákṣaś ca tvā bálaṃ ca śrīṇītām / ójaś ca tvā sáhaś ca śrīṇītām / ā́yuś ca tvā jarā́ ca śrīṇītām / ātmā́ ca tvā tanū́ś ca śrīṇītām / śṛtò 'si śṛtáṃkṛtaḥ / śṛtā́ya tvā śṛtébhyas tvā / yám índram āhúr váruṇaṃ yám āhúḥ / yáṃ mitrám āhúr yám u satyám āhúḥ // ### [3.7.9.4](https://indike.org/pramana/in.veda.brahmana.taittiriya.3.7.9.4) yó devā́nāṃ devátamas tapojā́ḥ / tásmai tvā tébhyas tvā / máyi tyád indriyáṃ mahát / máyi dákṣo máyi krátuḥ / máyi dhāyi suvī́ryam / tríśug gharmó víbhātu me / ā́kūtyā mánasā sahá / virā́jā jyótiṣā sahá / yajñéna páyasā sahá / tásya dóham aśīmahi // ### [3.7.9.5](https://indike.org/pramana/in.veda.brahmana.taittiriya.3.7.9.5) tásya sumnám aśīmahi / tásya bhakṣám aśīmahi / vā́g juṣāṇā́ sómasya tṛpyatu / mitró jánān, prá sá mitra, / yásmān ná jātáḥ páro anyó ásti / yá āvivéśa bhúvanāni víśvā / prajā́patiḥ prajáyā saṃvidānáḥ / trī́ṇi jyótīm̐ṣi sacate sá ṣoḍaśī́ / eṣá brahmā́ yá ṛtvíyaḥ / índro nā́ma śrutó gaṇé // ### [3.7.9.6](https://indike.org/pramana/in.veda.brahmana.taittiriya.3.7.9.6) prá te mahé vidáthe 'śam̐siṣam̐ hárī / yá ṛtvíyaḥ prá te vanve / vanúṣo haryatáṃ mádam / índro nā́ma ghṛtáṃ ná yáḥ / háribhiś cā́ru sécate / śrutó gaṇá ā́ tvā viśantu / hárivarpasaṃ gíraḥ / índrā́dhipaté 'dhipatis tváṃ devā́nām asi / ádhipatiṃ mā́m / ā́yuṣmantaṃ várcasvantaṃ manuṣyèṣu kuru // ### [3.7.9.7](https://indike.org/pramana/in.veda.brahmana.taittiriya.3.7.9.7) índraś ca samrā́ḍ váruṇaś ca rā́jā / táu te bhakṣáṃ cakratur ágra etám / táyor ánu bhakṣáṃ bhakṣayāmi / vā́g juṣāṇā́ sómasya tṛpyatu / prajā́patir viśvákarmā / tásya máno deváṃ yajñéna rādhyāsam / arthegā́ asy ájahitaḥ / avasā́napate 'vasā́naṃ me vinda / námo rudrā́ya vāstoṣpátaye / ā́yane vidrávaṇe // ### [3.7.9.8](https://indike.org/pramana/in.veda.brahmana.taittiriya.3.7.9.8) udyā́ne yát parā́yaṇe / āvártane vivártane / yó gopāyáti tám̐ huve / yā́ny apāmítyāny ápratīttāny ásmi / yamásya balínā carāmi / ihá\_evá sántaḥ práti tád yātayāmaḥ / jīvā́ jīvébhyo níharāma enat / anṛṇā́ asmínn anṛṇā́ḥ párasmin / tṛtī́ye loké anṛṇā́ḥ syāma / yé devayā́nā utá pitṛyā́ṇāḥ // ### [3.7.9.9](https://indike.org/pramana/in.veda.brahmana.taittiriya.3.7.9.9) sárvān pathó anṛṇā́ ā́kṣīyema / idám ū nú śréyo 'vasā́nam ā́ganma / śivé no dyā́vāpṛthivī́ ubhé imé / gómad dhánavad áśvavad ū́rjasvat / suvī́rā vīráir ánu sáṃcarema / arkáḥ pavítram̐ rájaso vimā́naḥ / punā́ti devā́nāṃ bhúvanāni víśvā / dyā́vāpṛthivī́ páyasā saṃvidāné / ghṛtáṃ duhāte amṛ́taṃ prápīne / pavítram arkó rájaso vimā́naḥ / punā́ti devā́nāṃ bhúvanāni víśvā / súvar jyótir yáśo mahát / aśīmáhi gādhám utá pratiṣṭhā́m // ## Commentaries (1) - [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.197.1.3) — Sāyaṇa, Sanskrit ## Linked texts (3) - [Bhāradvājaśrautasūtra](https://indike.org/pramana/in.vedanga.kalpa.srauta.bharadvaja.261.1) — Sanskrit - [Āpastambaśrautasūtra](https://indike.org/pramana/in.vedanga.kalpa.srauta.apastamba.12.3.2.b) — Āpastamba, Sanskrit - [Kalpaḥ](https://indike.org/pramana/in.jaina.post.vidhi.mantra.kalpah.2.6.9.1) — Sanskrit --- Source: [https://indike.org/pramana/in.veda.brahmana.taittiriya.3.7.9](https://indike.org/pramana/in.veda.brahmana.taittiriya.3.7.9) · Pramāṇa