Taittiriyabrahmana 3.8.10
Taittirīyabrāhmaṇa 3.8.10
- Language
- Sanskrit
3.8.10.1
prajā́patir akāmayatāśvamehéna yajeya_íti /
sá tápo 'tapyata /
tásya tepānásya /
saptá_ātmáno devátā údakrāman /
sā́ dīkṣā́_abhavat /
sá etā́ni vaiśvadevā́ny apaśyat /
tā́ny ajuhot /
táir vái sá dīkṣā́m ávārundha /
yád vaiśvadevā́ni juhóti /
dīkṣā́m evá táir yájamānó 'varundhe //
3.8.10.2
saptá juhoti /
saptá hí tā́ devátā udákrāman //
anvaháṃ juhoti /
anvahám evá dīkṣā́m ávarundhe //
trī́ṇi vaiśvadevā́ni juhoti /
catvā́ry audgrahaṇā́ni /
saptá sáṃpadyante /
saptá vái śīrṣaṇyā̀ḥ prāṇā́ḥ /
prāṇā́ dīkṣā́ /
prāṇáir evá prāṇā́n dīkṣā́m ávarundhe //
3.8.10.3
ékavim̐śatiṃ vaiśvadevā́ni juhoti /
ékavim̐śatir vái devalokā́ḥ /
dvā́daśa mā́sāḥ páñca_ṛtávaḥ /
tráya imé lokā́ḥ /
asā́v ādityá ekavim̐śáḥ //
eṣá suvargó lokáḥ /
tád dáivyaṃ kṣattrám /
sā́ śrī́ḥ /
tád bradhnásya viṣṭápam /
tát svā́rājyam ucyate //
3.8.10.4
trim̐śátam audgrahaṇā́ni juhoti /
trim̐śádakṣarā virā́ṭ /
ánnaṃ virā́ṭ /
virā́jā_evā́nnā́dyam ávarundhe //
tredhā́ vibhájya devátāṃ juhoti /
tryā̀vṛto vái devā́ḥ /
tryā̀vṛta imé lokā́ḥ /
eṣā́ṃ lokā́nām ā́ptyai /
eṣā́ṃ lokā́nāṃ kŀ̥ptyai //
ápa vā́ etásmāt prāṇā́ḥ krāmanti //
3.8.10.5
yó dīkṣā́m atirecáyati /
saptāháṃ prácaranti /
saptá vái śīrṣanyā̀ḥ prāṇáḥ /
prāṇā́ dīkṣā́ /
prāṇáir evá prāṇā́n dīkṣā́m ávarundhe //
pūrṇāhutím uttamā́ṃ juhoti /
sárvaṃ vái pūrṇāhutíḥ /
sárvam evá_āpnoti /
átho iyáṃ vái pūrṇāhutíḥ /
asyā́m evá prátitiṣṭhati //
Commentaries (4)
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
Linked texts (3)
- Mādhyandina — Sanskrit
- Aśvamedhabhāṣya — Bhaṭṭabhāskara Miśra, Sanskrit
- History of Dharmaśāstra (Ancient and Mediaeval Religious and Civil Law in India) — P. V. Kane, English