<!-- Pramāṇa, a library of Indian primary sources · https://indike.org/pramana/in.veda.brahmana.taittiriya.3.8.12 -->

[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.8.12

# Taittiriyabrahmana 3.8.12

Taittirīyabrāhmaṇa 3.8.12

- **Language:** Sanskrit

### [3.8.12.1](https://indike.org/pramana/in.veda.brahmana.taittiriya.3.8.12.1)

sāvitrám aṣṭā́kapālaṃ prātár nírvapati /  
aṣṭā́kṣarā gāyatrī́ /  
gāyatráṃ prātaḥsavanám /  
prātaḥsavanā́d eváinaṃ gāyatriyā́ś chándaso 'dhi nirmímīte /  
átho prātaḥsavanám evá téna\_āpnoti /  
gāyatrī́ṃ chándaḥ //  
savitré prasavitrá ékādaśakapālaṃ madhyáṃdine /  
ékādaśākṣarā triṣṭúp /  
tráiṣṭubhaṃ mā́dhyaṃdinam̐ sávanam /  
mā́dhyaṃdinād eváinam̐ sávanāt triṣṭúbhaś chándasó 'dhi nírmimīte //

### [3.8.12.2](https://indike.org/pramana/in.veda.brahmana.taittiriya.3.8.12.2)

átho mā́dhyaṃdinam evá sávanaṃ téna\_āpnoti /  
triṣṭúbhaṃ chándaḥ //  
savitrá āsavitré dvā́daśakapālam aparāhṇé /  
dvā́daśākṣarā jágatī /  
jā́gataṃ tṛtīyasavanám /  
tṛtīyasavanā́d eváinaṃ jágatyāś chándasó 'dhi nírmimīte /  
átho tṛtīyasavanám evá téna\_āpnoti /  
jágatīṃ chándaḥ //  
īśvaró vā́ áśvaḥ prámuktaḥ párāṃ parāvátaṃ gántoḥ /  
ihá dhṛ́tiḥ svā́hā\_ihá vídhṛtiḥ svā́hā\_ihá rántiḥ svā́hā\_ihá rántiḥ svā́hā\_íti cátasra ā́hutīr juhoti /

### [3.8.12.3](https://indike.org/pramana/in.veda.brahmana.taittiriya.3.8.12.3)

cátasro díśaḥ /  
digbhír eváinaṃ párigṛhṇāti //  
ā́śvattho vrajó bhavati /  
prajā́patir devébhyo nílāyata /  
áśvo rūpáṃ kṛtvā́ /  
sò 'śvatthé saṃvatsarám atiṣṭhat /  
tád aśvatthásyāśvatthatvám /  
yád ā́śvattho vrajó bhávati /  
svá eváinaṃ yónau prátiṣṭhāpayati //

## Commentaries (1)

- [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.201.4.21) — Sāyaṇa, Sanskrit

## Linked texts (2)

- [Baudhāyanaśrautasūtra](https://indike.org/pramana/in.vedanga.kalpa.srauta.baudhayana.26.10.286.2) — Baudhāyana, Sanskrit
- [Kauṣītakibrāhmaṇa](https://indike.org/pramana/in.veda.brahmana.kausitaki.14.7.12) — Kauṣītaki, Sanskrit

---
Source: [https://indike.org/pramana/in.veda.brahmana.taittiriya.3.8.12](https://indike.org/pramana/in.veda.brahmana.taittiriya.3.8.12) · Pramāṇa