Taittiriyabrahmana 3.8.13
Taittirīyabrāhmaṇa 3.8.13
- Language
- Sanskrit
3.8.13.1
ā́ bráhman brāhmaṇó brahmavarcasī́ jāyatām íty āha /
brāhmaṇá evá brahmavarcasáṃ dadhāti /
tásmāt purā́ brāhmaṇó brahmavarcasy àjāyata /
ā́_asmín rāṣṭré rājanyà iṣavyàḥ śū́ro mahārathò jāyatām íty āha /
rājanyà evá śauryáṃ mahimā́naṃ dadhāti /
tásmāt purā́ rājanyà iṣavyàḥ śū́ro mahārathò 'jāyata //
dógdhrī dhenúr íty āha /
dhenvā́m evá páyo dadhāti /
tásmāt purā́ dógdhrī dhenúr ajāyata //
vóḍhā_anaḍvā́n íy āha /
3.8.13.2
anaḍúhy evá vīryàṃ dadhāti /
tásmāt purā́ vóḍhā_anaḍvā́n ajāyata //
āśúḥ sáptir íty āha /
áśva evá javáṃ dadhāti /
tásmāt purā́_āśúr áśvo 'jāyata //
púraṃdhir yóṣā_íty āha /
yoṣíty evá rūpáṃ dadhāti /
tásmāt strī́ yuvatíḥ priyā́ bhā́vukā //
jiṣṇū́ ratheṣṭhā́ íty āha /
ā́ ha vái tátra jiṣṇū́ ratheṣṭhā́ jāyate /
3.8.13.3
yátra_eténa yajñéna yájante //
sabhéyo yúvā_íty āha /
yó vái pūrvavayasī́ /
sá sabhéyo yúvā /
tásmād yúvā púmān priyó bhā́vukaḥ //
ā́_asyá yájamānasya vīró jāyatām íty āha /
ā́ ha vái tátra yájamānasya vīró jāyate /
yátra_eténa yajñéna yájante //
nikāmé_nikāme naḥ parjányo varṣatv íty āha /
nikāmé_nikāme ha vái tátra parjányo varṣati /
yátra_eténa yajñéna yájante //
phalínyo na óṣadhayaḥ pácyantām íty āha /
phalínyo ha vái tátra_óṣadhayaḥ pacyante /
yátra_eténa yajñéna yájante //
yogakṣemó naḥ kalpatām íty āha /
kálpate ha vái tátra prajā́bhyo yogakṣemáḥ /
yátra_eténa yajñéna yájante //
Linked texts (1)
- Mādhyandina — Sanskrit