[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.8.13 # Taittiriyabrahmana 3.8.13 Taittirīyabrāhmaṇa 3.8.13 - **Language:** Sanskrit ### [3.8.13.1](https://indike.org/pramana/in.veda.brahmana.taittiriya.3.8.13.1) ā́ bráhman brāhmaṇó brahmavarcasī́ jāyatām íty āha / brāhmaṇá evá brahmavarcasáṃ dadhāti / tásmāt purā́ brāhmaṇó brahmavarcasy àjāyata / ā́\_asmín rāṣṭré rājanyà iṣavyàḥ śū́ro mahārathò jāyatām íty āha / rājanyà evá śauryáṃ mahimā́naṃ dadhāti / tásmāt purā́ rājanyà iṣavyàḥ śū́ro mahārathò 'jāyata // dógdhrī dhenúr íty āha / dhenvā́m evá páyo dadhāti / tásmāt purā́ dógdhrī dhenúr ajāyata // vóḍhā\_anaḍvā́n íy āha / ### [3.8.13.2](https://indike.org/pramana/in.veda.brahmana.taittiriya.3.8.13.2) anaḍúhy evá vīryàṃ dadhāti / tásmāt purā́ vóḍhā\_anaḍvā́n ajāyata // āśúḥ sáptir íty āha / áśva evá javáṃ dadhāti / tásmāt purā́\_āśúr áśvo 'jāyata // púraṃdhir yóṣā\_íty āha / yoṣíty evá rūpáṃ dadhāti / tásmāt strī́ yuvatíḥ priyā́ bhā́vukā // jiṣṇū́ ratheṣṭhā́ íty āha / ā́ ha vái tátra jiṣṇū́ ratheṣṭhā́ jāyate / ### [3.8.13.3](https://indike.org/pramana/in.veda.brahmana.taittiriya.3.8.13.3) yátra\_eténa yajñéna yájante // sabhéyo yúvā\_íty āha / yó vái pūrvavayasī́ / sá sabhéyo yúvā / tásmād yúvā púmān priyó bhā́vukaḥ // ā́\_asyá yájamānasya vīró jāyatām íty āha / ā́ ha vái tátra yájamānasya vīró jāyate / yátra\_eténa yajñéna yájante // nikāmé\_nikāme naḥ parjányo varṣatv íty āha / nikāmé\_nikāme ha vái tátra parjányo varṣati / yátra\_eténa yajñéna yájante // phalínyo na óṣadhayaḥ pácyantām íty āha / phalínyo ha vái tátra\_óṣadhayaḥ pacyante / yátra\_eténa yajñéna yájante // yogakṣemó naḥ kalpatām íty āha / kálpate ha vái tátra prajā́bhyo yogakṣemáḥ / yátra\_eténa yajñéna yájante // ## Linked texts (1) - [Mādhyandina](https://indike.org/pramana/in.veda.brahmana.satapatha*madhyandina.13.1.9.3) — Sanskrit --- Source: [https://indike.org/pramana/in.veda.brahmana.taittiriya.3.8.13](https://indike.org/pramana/in.veda.brahmana.taittiriya.3.8.13) · Pramāṇa