<!-- Pramāṇa, a library of Indian primary sources · https://indike.org/pramana/in.veda.brahmana.taittiriya.3.8.14 -->

[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.8.14

# Taittiriyabrahmana 3.8.14

Taittirīyabrāhmaṇa 3.8.14

- **Language:** Sanskrit

### [3.8.14.1](https://indike.org/pramana/in.veda.brahmana.taittiriya.3.8.14.1)

prajā́patir devébhyo yajñā́n vyā́diśat /  
sá ātmánn aśvamedhám adhatta /  
táṃ devā́ abruvan /  
eṣá vā́vá yajñáḥ /  
yád aśvamedháḥ /  
ápy evá nó 'trāstv íti /  
tébhya etā́n annahomā́n prā́yacchat /  
tā́n ajuhot /  
táir vái sá devā́n aprīṇāt /  
yád annahomā́ñ juhóti /

### [3.8.14.2](https://indike.org/pramana/in.veda.brahmana.taittiriya.3.8.14.2)

devā́n evá táir yájamānaḥ prīṇāti //  
ā́jyena juhoti /  
agnér vā́ etád rūpám /  
yád ā́jyam /  
yád ā́jyena juhóti /  
agním evá tát prīṇāti //  
mádhunā juhoti /  
mahatyái vā́ etád devátāyai rūpám /  
yán mádhu /  
yán mádhunā juhóti /

### [3.8.14.3](https://indike.org/pramana/in.veda.brahmana.taittiriya.3.8.14.3)

mahatī́m evá tád devátāṃ prīṇāti //  
taṇḍuláir juhóti /  
vásūnāṃ vā́ etád rūpám /  
yát taṇḍulā́ḥ /  
yát taṇḍuláir juhóti /  
vásūn evá tát prīṇāti //  
pṛ́thukair juhoti /  
rudrā́ṇāṃ vā́ etád rūpám /  
yát pṛ́thukāḥ /  
yát pṛ́thukair juhóti /

### [3.8.14.4](https://indike.org/pramana/in.veda.brahmana.taittiriya.3.8.14.4)

rudrā́n evá tát prīṇāti //  
lājáir juhoti /  
ādityā́nāṃ vā́ etád rūpám /  
yál lājā́ḥ /  
yál lājáir juhóti /  
ādityā́n evá tát prīṇāti //  
karámbair juhoti /  
víśveṣāṃ vā́ etád devā́nām̐ rūpám /  
yát karámbāḥ /  
yát karámbair juhóti /

### [3.8.14.5](https://indike.org/pramana/in.veda.brahmana.taittiriya.3.8.14.5)

víśvān evá tád devā́n prīṇāti //  
dhānā́bhir juhoti /  
nákṣatrāṇāṃ vā́ etád rūpám /  
yád dhānā́ḥ /  
yád dhānā́bhir juhóti /  
nákṣatrāṇy evá tát prīṇāti //  
sáktubhir juhoti /  
prajā́pater vā́ etád rūpám /  
yát sáktavaḥ /  
yát sáktubhir juhóti /

### [3.8.14.6](https://indike.org/pramana/in.veda.brahmana.taittiriya.3.8.14.6)

prajā́patim evá tát prīṇāti //  
masū́syair juhoti /  
sárvāsāṃ vā́ etád devátām̐ rūpám /  
yán masū́syāni /  
yán masū́syair juhóti /  
sárvā evá tád devátāḥ prīṇāti //  
priyaṅgutaṇḍuláir juhoti /  
priyā́ṅgā ha vái nā́ma\_eté /  
etáir vái devā́ áśvasyā́ṅgāni sámadadhuḥ /  
yát priyaṅgutaṇḍuláir juhóti /  
áśvasya\_evā́ṅgāni sáṃdadhāti /  
dáśā́nnāni juhoti /  
dáśākṣarā virā́ṭ /  
virā́ṭ kṛtsnásyānnā́dyasyā́varuddhyai //

## Commentaries (4)

- [Taittirīyabrāhmaṇakāṭhakabhāṣya](https://indike.org/pramana/in.veda.brahmana.taittiriya!bhatta-bhaskara-misra-cikaedamandana.2.50) — Bhaṭṭa Bhāskara Miśra Cikāeḍamaṇḍana, Sanskrit
- [Jñānayajña on the Taittirīya Brāhmaṇa (Bhaṭṭabhāskara)](https://indike.org/pramana/in.veda.brahmana.taittiriya!bhattabhaskara) — Bhaṭṭabhāskara Miśra, Sanskrit
- [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana) — Sāyaṇa, Sanskrit
- [Taittirīyabrāhmaṇaṭīkā](https://indike.org/pramana/in.veda.brahmana.taittiriya!taittiriyabrahmanatika) — Sanskrit

## Linked texts (1)

- [Aśvamedhabhāṣya](https://indike.org/pramana/in.veda.brahmana.asvamedhabhasya.2.50) — Bhaṭṭabhāskara Miśra, Sanskrit

---
Source: [https://indike.org/pramana/in.veda.brahmana.taittiriya.3.8.14](https://indike.org/pramana/in.veda.brahmana.taittiriya.3.8.14) · Pramāṇa