[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.8.15 # Taittiriyabrahmana 3.8.15 Taittirīyabrāhmaṇa 3.8.15 - **Language:** Sanskrit ### [3.8.15.1](https://indike.org/pramana/in.veda.brahmana.taittiriya.3.8.15.1) prajā́patir aśvamedhám asṛjata / tám̐ sṛṣtám̐ rákṣām̐sy ajighām̐san / sá etā́n prajā́patir naktam̐homā́n apaśyat / tā́n ajuhoti / táir vái sá yajñā́d rákṣām̐sy ápāhan / yán naktam̐homāñ juhóti / yajñā́d evá táir yájamāno rákṣām̐sy ápahanti // ā́jyena juhoti / vájro vā́ ā́jyam / vájreṇa\_evá yajñā́d rákṣām̐sy ápahanti // ### [3.8.15.2](https://indike.org/pramana/in.veda.brahmana.taittiriya.3.8.15.2) ā́jyasya pratipádaṃ karoti / prāṇó vā́ ā́jyam / mukhatá evā́sya prāṇáṃ dadhāti // annahomā́ñ juhoti / śárīravad evā́varundhe // vyatyā́saṃ juhoti / ubháyasyā́varudhyai // náktaṃ juhoti / rákṣasām ápahatyai // ā́jyenānnatató juhoti / ### [3.8.15.3](https://indike.org/pramana/in.veda.brahmana.taittiriya.3.8.15.3) prāṇó vā́ ā́jyam / ubhayáta evā́sya prāṇáṃ dadhāti / purástāc ca\_upáriṣṭāc ca // ékasmai svā́hā\_íty āha / asmínn evá loké prátitiṣṭhati / dvā́bhyām̐ svā́hā\_íty āha / amúṣminn evá loké prátitiṣṭhati / ubháyor evá lokáyoḥ prátitiṣṭhati / asmím̐ś cāmúṣmim̐ś ca // śatā́ya svā́hā\_íty āha / śatā́yur vái púruṣaḥ śatávīryaḥ / ā́yur evá vīryàm ávarundhe / sahásrāya svā́hā\_íty āha / ā́yur vái sahásram / ā́yur evā́varundhe / sárvasmai svā́hā\_íty āha / áparimitam evā́varundhe // ## Commentaries (1) - [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.201.5) — Sāyaṇa, Sanskrit --- Source: [https://indike.org/pramana/in.veda.brahmana.taittiriya.3.8.15](https://indike.org/pramana/in.veda.brahmana.taittiriya.3.8.15) · Pramāṇa