Taittiriyabrahmana 3.8.16

Taittirīyabrāhmaṇa 3.8.16

Language: Sanskrit

3.8.16.1

prajā́patiṃ vā́ eṣá īpsatī́ty āhuḥ /
yò 'śvamedhéna yájata íti /
átho āhuḥ /
sárvāṇi bhūtā́nī́ti //
ékasmai svā́hā_íty āha /
prajā́patir vā́ ékaḥ /
tám evá_āpnoti //
ékasmai svā́hā dvā́bhyām̐ svā́hā_íty abhipūrvám ā́hutīr juhoti /
abhipūrvám evá suvargáṃ lokám eti //
ekottaráṃ juhoti /

3.8.16.2

ekavád evá suvargáṃ lokám eti //
sáṃtataṃ juhoti /
suvargásya lokásya sáṃtatyai //
śatā́ya svā́hā_íty āha /
śatā́yur vái púruṣaḥ śatávīryaḥ /
ā́yur evá vīryàm ávarundhe /
sahásrāya svā́hā_íty āha /
ā́yur vái sahásram /
ā́yur evā́varundhe //
ayútāya svā́hā niyútāya svā́hā prayútāya svā́hā_íty āha //

3.8.16.3

tráya imé lokā́ḥ /
imā́n evá lokā́n ávarundhe //
árbudāya svā́hā_íty āha /
vā́g vā́ arbudam /
vā́cam evā́varundhe /
nyàrbudāya svā́hā_íty āha /
yó vái vācó bhūmā́ /
tán nyarbudam /
vācá evá bhūmā́nam ávarundhe //
samudrā́ya svā́hā_íty āha /

3.8.16.4

samudrám evá_āpnoti /
mádhyāya svā́hā_íty āha /
mádhyam evá_āpnoti /
ántāya svā́hā_íty āha /
ántam eva_ā́pnoti /
parārdhā́ya svā́hā_íty āha /
parārdhám evá_āpnoti //
uṣáse svā́hā vyùṣṭyai svā́hā_íty āha /
rā́tir vā́ uṣā́ḥ /
áhar vyùṣṭiḥ /
ahorātré evā́varundhe /
átho ahorātráyor evá prátitiṣṭhati //
tā́ yád ubháyīr dívā vā náktaṃ vā́ juhuyā́t /
ahorātré mohayet /
uṣáse svā́hā vyùṣṭyai svā́hā_udeṣyaté svā́hā_údyate svā́hā_íty ánudite juhoti /
úditāya svā́hā suvargā́ya svā́hā lokā́ya svā́hā_íty údite juhoti /
ahorātráyor avyàtimohāya //

Commentaries (1)

Taittirīyabrāhmaṇabhāṣya (Sāyaṇa) — Sāyaṇa, Sanskrit

Linked texts (1)

Mādhyandina — Sanskrit