<!-- Pramāṇa, a library of Indian primary sources · https://indike.org/pramana/in.veda.brahmana.taittiriya.3.8.16 -->

[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.8.16

# Taittiriyabrahmana 3.8.16

Taittirīyabrāhmaṇa 3.8.16

- **Language:** Sanskrit

### [3.8.16.1](https://indike.org/pramana/in.veda.brahmana.taittiriya.3.8.16.1)

prajā́patiṃ vā́ eṣá īpsatī́ty āhuḥ /  
yò 'śvamedhéna yájata íti /  
átho āhuḥ /  
sárvāṇi bhūtā́nī́ti //  
ékasmai svā́hā\_íty āha /  
prajā́patir vā́ ékaḥ /  
tám evá\_āpnoti //  
ékasmai svā́hā dvā́bhyām̐ svā́hā\_íty abhipūrvám ā́hutīr juhoti /  
abhipūrvám evá suvargáṃ lokám eti //  
ekottaráṃ juhoti /

### [3.8.16.2](https://indike.org/pramana/in.veda.brahmana.taittiriya.3.8.16.2)

ekavád evá suvargáṃ lokám eti //  
sáṃtataṃ juhoti /  
suvargásya lokásya sáṃtatyai //  
śatā́ya svā́hā\_íty āha /  
śatā́yur vái púruṣaḥ śatávīryaḥ /  
ā́yur evá vīryàm ávarundhe /  
sahásrāya svā́hā\_íty āha /  
ā́yur vái sahásram /  
ā́yur evā́varundhe //  
ayútāya svā́hā niyútāya svā́hā prayútāya svā́hā\_íty āha //

### [3.8.16.3](https://indike.org/pramana/in.veda.brahmana.taittiriya.3.8.16.3)

tráya imé lokā́ḥ /  
imā́n evá lokā́n ávarundhe //  
árbudāya svā́hā\_íty āha /  
vā́g vā́ arbudam /  
vā́cam evā́varundhe /  
nyàrbudāya svā́hā\_íty āha /  
yó vái vācó bhūmā́ /  
tán nyarbudam /  
vācá evá bhūmā́nam ávarundhe //  
samudrā́ya svā́hā\_íty āha /

### [3.8.16.4](https://indike.org/pramana/in.veda.brahmana.taittiriya.3.8.16.4)

samudrám evá\_āpnoti /  
mádhyāya svā́hā\_íty āha /  
mádhyam evá\_āpnoti /  
ántāya svā́hā\_íty āha /  
ántam eva\_ā́pnoti /  
parārdhā́ya svā́hā\_íty āha /  
parārdhám evá\_āpnoti //  
uṣáse svā́hā vyùṣṭyai svā́hā\_íty āha /  
rā́tir vā́ uṣā́ḥ /  
áhar vyùṣṭiḥ /  
ahorātré evā́varundhe /  
átho ahorātráyor evá prátitiṣṭhati //  
tā́ yád ubháyīr dívā vā náktaṃ vā́ juhuyā́t /  
ahorātré mohayet /  
uṣáse svā́hā vyùṣṭyai svā́hā\_udeṣyaté svā́hā\_údyate svā́hā\_íty ánudite juhoti /  
úditāya svā́hā suvargā́ya svā́hā lokā́ya svā́hā\_íty údite juhoti /  
ahorātráyor avyàtimohāya //

## Commentaries (1)

- [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.202.2.2) — Sāyaṇa, Sanskrit

## Linked texts (1)

- [Mādhyandina](https://indike.org/pramana/in.veda.brahmana.satapatha*madhyandina.13.2.1.7) — Sanskrit

---
Source: [https://indike.org/pramana/in.veda.brahmana.taittiriya.3.8.16](https://indike.org/pramana/in.veda.brahmana.taittiriya.3.8.16) · Pramāṇa