[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.8.17 # Taittiriyabrahmana 3.8.17 Taittirīyabrāhmaṇa 3.8.17 - **Language:** Sanskrit ### [3.8.17.1](https://indike.org/pramana/in.veda.brahmana.taittiriya.3.8.17.1) vibhū́r mātrā́ prabhū́ḥ pitrā\_íty aśvanāmā́ni juhoti / ubháyor eváinaṃ lokáyor nāmadhéyaṃ gamayati // ā́yanāya svā́hā prā́yaṇāya svā́hā\_íty uddrāvā́ñ juhoti / sárvam eváinam áskannam̐ suvargáṃ lokáṃ gamayati // agnáye svā́hā sómāya svā́hā\_íti pūrvahomā́ñ juhoti / pū́rva evá dviṣántaṃ bhrā́tṛvyam átikrāmati // pṛthivyái svā́hā\_antárikṣāya svā́hā\_íty āha / yathāyajúr evá\_etát // agnáye svā́hā sómāya svā́hā\_íti pūrvadīkṣā́ juhoti / pū́rva evá dviṣántaṃ bhrā́tṛvyam átikrāmati // ### [3.8.17.2](https://indike.org/pramana/in.veda.brahmana.taittiriya.3.8.17.2) pṛthivyái svā́hā\_antárikṣāya svā́hā\_íty ekavim̐śínīṃ dīkṣā́ṃ juhoti / ékavím̐śatir vái devalokā́ḥ / dvā́daśa mā́sāḥ páñca\_ṛtávaḥ / tráya imé lokā́ḥ / asā́v ādityá ekavim̐śáḥ / eṣá suvargó lokáḥ / suvargásya lokásya sámaṣṭyai // bhúvo devā́nāṃ kármaṇā\_íty ṛtudīkṣā́ juhoti / ṛtūn evā́smai kalpayati // agnáye svā́hā vāyáve svā́hā\_íti juhoty ánantarityai // ### [3.8.17.3](https://indike.org/pramana/in.veda.brahmana.taittiriya.3.8.17.3) arvā́ṅ yajñáḥ sáṃkrāmatv íty ā́ptīr juhoti / suvargásya lokásya\_ā́ptyai // bhūtáṃ bhávyaṃ bhaviṣyád íti páryāptīr juhoti / suvargásya lokásya páryāptyai // ā́ me gṛhā́ bhavantv íty ābhū́r juhoti / suvargásya lokásya\_ā́bhūtyai // agnínā tápó 'nvabhavad íty anubhū́r juhoti / suvargásya lokásya\_ánubhūtyai // svā́hā\_ādhím ā́dhītāya svā́hā\_íti sámastāni vaiśvadevā́ni juhoti / sámastam evá dviṣántaṃ bhrā́tṛvyam átikrāmati // ### [3.8.17.4](https://indike.org/pramana/in.veda.brahmana.taittiriya.3.8.17.4) dadbhyáḥ svā́hā hánūbhyām̐ svā́hā\_íty aṅgahomā́ñ juhoti / áṅge\_aṅge vái púruṣasya pāpmā́\_úpaśliṣṭaḥ / áṅgād\_aṅgād eváinaṃ pāpmánas téna muñcati // añjyetā́ya svā́hā kṛṣṇā́ya svā́hā śvetā́ya svā́hā\_íty aśvarūpā́ṇi juhoti / rūpáir eváinam̐ sámardhayati // óṣadhībhyaḥ svā́hā mū́lebhyasḥ svā́hā\_íty oṣadhihomā́ñ juhoti / dvayyó vā́ óṣadhayaḥ / púṣpebhyo 'nyā́ḥ phálaṃ gṛhṇánti / mū́lebhyo 'nyā́ḥ / tā́ evá\_ubháyīr ávarundhe // ### [3.8.17.5](https://indike.org/pramana/in.veda.brahmana.taittiriya.3.8.17.5) vánasapátibhyaḥ svā́hā\_íti vanaspatihomā́ñ juhoti / āraṇyásyānnā́dyasyā́varudhyai // meṣás tvā pacatáir avatv íty ápāvyāni juhoti / prāṇā́ vái devā́ ápāvyāḥ / prāṇā́n evā́varundhe // kū́pyābhyaḥ svā́hā\_adbhyáḥ svā́hā\_íty apā́m̐ hómāñ juhoti / apsú vā́ ā́paḥ / ánnaṃ vā́ ā́paḥ / adbhyó vā́ ánnaṃ jāyate / yád evā́dbhyó 'nnaṃ jā́yate / tád ávarundhe // ## Commentaries (1) - [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.202.4.1) — Sāyaṇa, Sanskrit ## Linked texts (2) - [Āpastambaśrautasūtra](https://indike.org/pramana/in.vedanga.kalpa.srauta.apastamba.20.11.8.a) — Āpastamba, Sanskrit - [Āgniveśyagṛhyasūtra](https://indike.org/pramana/in.vedanga.kalpa.grhya.agnivesya.2.4.3.20) — Agniveśa, Sanskrit --- Source: [https://indike.org/pramana/in.veda.brahmana.taittiriya.3.8.17](https://indike.org/pramana/in.veda.brahmana.taittiriya.3.8.17) · Pramāṇa