[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.8.18 # Taittiriyabrahmana 3.8.18 Taittirīyabrāhmaṇa 3.8.18 - **Language:** Sanskrit ### [3.8.18.1](https://indike.org/pramana/in.veda.brahmana.taittiriya.3.8.18.1) ámbhām̐si juhoti / ayáṃ vái lokó 'mbhā́m̐si / tásya vásavó 'dhipatayaḥ / agnír jyótiḥ / yád ámbhām̐si juhóti / imám evá lokám ávarundhe / vásūnām̐ sā́yujyaṃ gacchati / agníṃ jyótir ávarundhe // nábhām̐si juhoti / antárikṣaṃ vái nábhām̐si / ### [3.8.18.2](https://indike.org/pramana/in.veda.brahmana.taittiriya.3.8.18.2) tásya rudrā́ ádhipatayaḥ / vāyúr jyótiḥ / yán nábhām̐si juhóti / antárikṣam evā́varundhe / rudrā́ṇām̐ sā́yujyaṃ gacchati / vāyúṃ jyótir ávarundhe // máhām̐si juhoti / asáu vái lokó máhām̐si / tásya\_ādityā́ ádhipatayaḥ / sū́ryo jyótiḥ // ### [3.8.18.3](https://indike.org/pramana/in.veda.brahmana.taittiriya.3.8.18.3) yán máhām̐si juhóti / amúm evá lokám ávarundhe / ādityā́nām̐ sā́yujyaṃ gacchati / sū́ryaṃ jyótir ávarundhe // námo rā́jñe námo váruṇáya\_íti yavyā́ni juhoti / annā́dyasyā́varudhyai // mayobhū́r vā́to abhí vātūsrā́ iti gavyā́ni juhoti / paśūnā́m ávarudhyai // prāṇā́ya svā́hā vyānā́ya svā́hā\_íti saṃtatihomáñ juhoti / suvargásya lokásya sáṃtatyai // ### [3.8.18.4](https://indike.org/pramana/in.veda.brahmana.taittiriya.3.8.18.4) sitā́ya svā́hā\_ásitāya svā́hā\_íti prámuktīr juhoti / suvargásya lokásya prámuktyai // pṛthivyái svā́hā\_antárikṣāya svā́hā\_íty āha / yathāyajúr eváitát / datváte sváhā\_adantákāya svā́hā\_íti śarīrahomā́ñ juhoti / pitṛlokám evá táir yájamānó 'varundhe / kás tvā yunakti sá tvā yunaktv íti paridhī́n yunakti / imé vái lokā́ḥ paridháyaḥ / imā́n evā́smai lokā́n yunakti / suvargásya lokásya sámaṣṭyai // ### [3.8.18.5](https://indike.org/pramana/in.veda.brahmana.taittiriya.3.8.18.5) yáḥ prāṇató yá ātmadā́ íti mahimā́nau juhoti / suvargó vái lokó máhaḥ / suvargám evá tā́bhyāṃ lokáṃ yájamānó 'varundhe / ā́ bráhman brāhmaṇó brahmavarcasī́ jāyatām íti sámastāni brahmavarcasā́ni juhoti / brahmavarcasám evá táir yájamānó 'varundhe // jájñi bī́jam íti juhoty ánantarityai // agnáye sámanamat pṛthivyái sámanamad íti saṃnatihomā́ñ juhoti / suvargásya lokásya sáṃnatyai // bhūtā́ya svā́hā bhaviṣyaté svā́hā\_íti bhūtābhavyáu hómau juhoti / ayáṃ vái lokó bhūtám / ### [3.8.18.6](https://indike.org/pramana/in.veda.brahmana.taittiriya.3.8.18.6) asáu bhaviṣyát / anáyor evá lokáyoḥ prátitiṣṭhati / sárvasya\_ā́ptyai / sárvasya\_ávaruddhyai / yád ákrandaḥ prathamáṃ jā́yamāna íty aśvastomī́yaṃ juhoti / sárvasya\_ā́ptyai / sárvasya jítyai // sárvam evá téna\_āpnoti / sárvaṃ jayati / yò 'śvamedhéna yájate / ### [3.8.18.7](https://indike.org/pramana/in.veda.brahmana.taittiriya.3.8.18.7) yá u ca\_enam eváṃ véda // yajñám̐ rákṣām̐sy ajighām̐san / sá etā́n prajā́patir naktam̐homā́n apaśyat / tā́n ajuhot / táir vái sá yajñā́d rákṣām̐sy ápāhan / yán naktaṃhomā́ñ juhoti / yajñā́d evá táir yájamāno rákṣām̐sy ápahanti // uṣáse svā́hā vyùṣṭyai svā́hā\_íty antató juhoti / suvargásya lokásya sámaṣṭyai // ## Commentaries (1) - [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.202.4.6) — Sāyaṇa, Sanskrit ## Linked texts (2) - [Āpastambaśrautasūtra](https://indike.org/pramana/in.vedanga.kalpa.srauta.apastamba.20.12.2.a) — Āpastamba, Sanskrit - [Hiraṇyakeśiśrautasūtra (ed. Kāśīnāthaśāstrī Āgāśe, Ānandāśrama 1907, with Mahādeva's Vaijayantī)](https://indike.org/pramana/in.vedanga.kalpa.srauta.hiranyakesi*agase.14.6.239.p9) — Sanskrit --- Source: [https://indike.org/pramana/in.veda.brahmana.taittiriya.3.8.18](https://indike.org/pramana/in.veda.brahmana.taittiriya.3.8.18) · Pramāṇa