Taittiriyabrahmana 3.8.2
Taittirīyabrāhmaṇa 3.8.2
- Language
- Sanskrit
3.8.2.1
cátuṣṭayya ā́po bhavanti /
cátuḥśapho vā́ áśvaḥ prājāpatyáḥ sámṛddhyai //
tā́ digbhyáḥ samā́bhṛtā bhavanti /
dikṣú vā́ ā́paḥ /
ánnaṃ vā́ ā́paḥ /
adbhyó vā́ ánnaṃ jāyate /
yád evā́dbhyó 'nnaṃ jā́yate /
tád ávarundhe //
tā́su brahmaudanáṃ pacati /
réta evá tád dadhāti //
3.8.2.2
cátuḥśarāvo bhavati /
dikṣv èvá práti tiṣṭhati //
ubhayáto rukmáu bhavataḥ /
ubhayáta evā́smin rúcaṃ dadhāti /
úddharati śṛtatvā́ya /
sarpíṣvān bhavati medhyatvā́ya /
catvā́ra ārṣeyā́ḥ prā́śnanti /
diśā́m evá jyótiṣi juhoti /
catvā́ri híraṇyāni dadāti /
diśā́m evá jyótīm̐ṣy ávarundhe //
3.8.2.3
yád ā́jyam ucchíṣyate /
tásmin raśanā́ṃ nyunatti /
prajā́patir vā́ odanáḥ /
réta ā́jyam /
yád ā́jye raśanāṃ nyunátti /
prajā́patim evá rétasā sámardhayati /
darbhamáyī raśanā́ bhavati /
bahú vā́ eṣá kucarò 'medhyám úpagacchati /
yád áśvaḥ /
pavítraṃ vái darbhā́ḥ //
3.8.2.4
yád darbhamáyī raśaṇā́ bhávati /
punā́ty evá_enam /
pūtám enaṃ médhyam ā́labhate //
áśvasya vā́ ā́labdhasya mahimā́_udakrāmat /
sá mahártvijaḥ prā́viśat /
tán mahartvijāṃ mahartviktvám /
yán mahártvijaḥ prāśnánti /
mahimā́nam evā́smin tád dadhati /
áśvasya vā́ ā́labdhasya réta údakrāmat /
tát suvárṇam̐ híraṇyam abhavat /
yát suvárṇam̐ híraṇyaṃ dádāti /
réta evá tád dadhāti /
odané dadāti /
réto vā́ odanáḥ /
réto híraṇyam /
rétasā_evā́smin réto dadhāti //
Linked texts (1)
- Mādhyandina — Sanskrit