<!-- Pramāṇa, a library of Indian primary sources · https://indike.org/pramana/in.veda.brahmana.taittiriya.3.8.20 -->

[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.8.20

# Taittiriyabrahmana 3.8.20

Taittirīyabrāhmaṇa 3.8.20

- **Language:** Sanskrit

### [3.8.20.1](https://indike.org/pramana/in.veda.brahmana.taittiriya.3.8.20.1)

rā́jjudālam agniṣṭháṃ minoti /  
bhrūṇahatyā́yā ápahatyai //  
páutudravāv abhíto bhavataḥ /  
púṇyasya gandhásyā́varudhyai /  
bhrūṇahatyā́m evā́smād apahátya /  
púṇyena gandhéna\_ubhayátaḥ párigṛhṇāti //  
ṣáḍ bailvā́ bhavanti /  
bramavarcasásyā́varuddhyai /  
ṣáṭ khādirā́ḥ /  
téjasó 'varudhyai //

### [3.8.20.2](https://indike.org/pramana/in.veda.brahmana.taittiriya.3.8.20.2)

ṣáṭ pālāśā́ḥ /  
somapīthásyā́varudhyai /  
ékavim̐śatiḥ sáṃpadyante /  
ékavim̐śatir vái devalokā́ḥ /  
dvā́daśa mā́sāḥ páñca\_ṛtávaḥ /  
tráya imé lokā́ḥ /  
asā́v ādityá ekavim̐śáḥ /  
eṣá suvargó lokáḥ /  
suvargásya lokásya sámaṣṭyai //  
śatáṃ paśávo bhavanti /

### [3.8.20.3](https://indike.org/pramana/in.veda.brahmana.taittiriya.3.8.20.3)

śatā́yuḥ púruṣaḥ śata\_índriyaḥ /  
ā́yuṣy evá\_indriyé prátitiṣṭhati //  
sárvaṃ vā́ aśvamedhy ā́pnoti /  
áparimitā bhavanti /  
áparimitasyā́varuddhyai //  
brahmavādíno vadanti /  
kásmāt satyā́t /  
dakṣiṇatò 'nyéṣāṃ paśūnā́m avadyánti /  
uttarató 'śvasya\_íti /  
vāruṇó vā́ áśvaḥ /

### [3.8.20.4](https://indike.org/pramana/in.veda.brahmana.taittiriya.3.8.20.4)

eṣā́ vái váruṇasya dík /  
svā́yām evā́sya diśy ávadyati /  
yád ítareṣāṃ paśūnā́m avadyáti /  
śatadevatyàṃ ténā́varundhe //  
citè 'gnā́v ádhi vaitasé káṭé 'śvaṃ cinoti /  
apsúyonir vā́ áśvaḥ apsujó vetasáḥ /  
svá evá\_enaṃ yónau prátiṣṭhāpayati //  
purástāt pratyáñcaṃ tūparáṃ cinoti /  
paścā́t prācī́naṃ gomṛgám /

### [3.8.20.5](https://indike.org/pramana/in.veda.brahmana.taittiriya.3.8.20.5)

prāṇāpānā́v evā́smint samyáñcau dadhāti //  
áśvaṃ tūparáṃ gomṛgám íti sarvahúta etā́ñ juhoti /  
eṣā́ṃ lokā́nām abhíjityai //  
ātmánā\_abhíjuhoti /  
sā́tmānam evá\_enam̐ sátanuṃ karoti //  
sā́tmā\_amúṣmin\_loké bhavati /  
yá eváṃ véda /  
átho vásor evá dhā́rāṃ ténā́varundhe //  
iluvárdāya svā́hā balivárdāya svā́hā\_íty āha /  
saṃvatsaró vā́ iluvárdaḥ /  
parivatsaró balivárdaḥ /  
saṃvatsarā́d evá parivatsarā́d ā́yur ávarundhe /  
ā́yur evā́smin dadhāti /  
tásmād aśvamedhayājī́ jarásā visrásā\_amúṃ lokám eti //

## Commentaries (1)

- [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.203.1.1) — Sāyaṇa, Sanskrit

## Linked texts (2)

- [Baudhāyanaśrautasūtra](https://indike.org/pramana/in.vedanga.kalpa.srauta.baudhayana.26.10.286.8) — Baudhāyana, Sanskrit
- [Kalpaḥ](https://indike.org/pramana/in.jaina.post.vidhi.mantra.kalpah.2.6.14.48_38) — Sanskrit

---
Source: [https://indike.org/pramana/in.veda.brahmana.taittiriya.3.8.20](https://indike.org/pramana/in.veda.brahmana.taittiriya.3.8.20) · Pramāṇa