Pramāṇa · Search · About · API

Taittiriyabrahmana 3.8.21

Taittirīyabrāhmaṇa 3.8.21

Language
Sanskrit

3.8.21.1

ekavim̐śò 'gnír bhavati /
ekavim̐śáḥ stómaḥ /
ékavim̐śatir yū́pāḥ //
yáthā vā́ áśvā varṣabhā́ vā vṛ́ṣāṇaḥ sam̐sphurérán /
evám etát stómāḥ sám̐sphurante /
yád ekavim̐śā́ḥ /
té yát samṛcchéran /
hanyétāsya yajñáḥ //
dvādaśá evā́gníḥ syād íty āhuḥ /
dvādaśáḥ stómaḥ /

3.8.21.2

ékādaśa yúpāḥ //
yád dvādaśò 'gnír bhávati /
dvā́daśa mā́sāḥ saṃvatsaráḥ /
saṃvatsaréṇa_evā́smā ánnam ávarundhe //
yád dáśa yū́pā bhávanti /
dáśākṣarā virā́ṭ /
ánnaṃ virā́ṭ /
virā́jā_evā́nnā́dyam ávarundhe /
yá ekādaśáḥ /
stána evā́syai sáḥ /

3.8.21.3

duhá evá_enāṃ téna //
tád āhuḥ /
yád dvādaśò 'gníḥ syād dvādaśáḥ stóma ékādaśa yū́pāḥ /
yáthā sthúriṇā yāyā́t /
tādṛ́k tát //
ekavim̐śá evā́gníḥ syād íty āhuḥ /
ekavim̐śáḥ stómaḥ /
ékavim̐śatir yū́pāḥ /
yáthā práṣṭibhir yā́ti /
tādṛ́g evá tát //

3.8.21.4

yó vā́ aśvamedhé tisráḥ kakúbho véda /
kakúd dha rā́jñāṃ bhavati /
ekavim̐śò 'nír bhavati /
ekavim̐śáḥ stómaḥ /
ékavim̐śatir yū́pāḥ /
etā́ vā́ aśvamedhé tisráḥ kakúbhaḥ /
yá eváṃ véda /
kakúd dha rā́jñāṃ bhavati //
yó vā́ aśvamedhé trī́ṇi śīrṣā́ṇi véda /
śíro ha rā́jñāṃ bhavati /
ekavim̐śò 'gnír bhavati /
ekavim̐śaḥ stómaḥ /
ékavim̐śatir yū́pāḥ /
etā́ni vā́ aśvamedhé trī́ṇi śīrṣā́ṇi /
yá eváṃ véda /
śíro ha rā́jñāṃ bhavati //

Commentaries (1)