<!-- Pramāṇa, a library of Indian primary sources · https://indike.org/pramana/in.veda.brahmana.taittiriya.3.8.21 -->

[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.8.21

# Taittiriyabrahmana 3.8.21

Taittirīyabrāhmaṇa 3.8.21

- **Language:** Sanskrit

### [3.8.21.1](https://indike.org/pramana/in.veda.brahmana.taittiriya.3.8.21.1)

ekavim̐śò 'gnír bhavati /  
ekavim̐śáḥ stómaḥ /  
ékavim̐śatir yū́pāḥ //  
yáthā vā́ áśvā varṣabhā́ vā vṛ́ṣāṇaḥ sam̐sphurérán /  
evám etát stómāḥ sám̐sphurante /  
yád ekavim̐śā́ḥ /  
té yát samṛcchéran /  
hanyétāsya yajñáḥ //  
dvādaśá evā́gníḥ syād íty āhuḥ /  
dvādaśáḥ stómaḥ /

### [3.8.21.2](https://indike.org/pramana/in.veda.brahmana.taittiriya.3.8.21.2)

ékādaśa yúpāḥ //  
yád dvādaśò 'gnír bhávati /  
dvā́daśa mā́sāḥ saṃvatsaráḥ /  
saṃvatsaréṇa\_evā́smā ánnam ávarundhe //  
yád dáśa yū́pā bhávanti /  
dáśākṣarā virā́ṭ /  
ánnaṃ virā́ṭ /  
virā́jā\_evā́nnā́dyam ávarundhe /  
yá ekādaśáḥ /  
stána evā́syai sáḥ /

### [3.8.21.3](https://indike.org/pramana/in.veda.brahmana.taittiriya.3.8.21.3)

duhá evá\_enāṃ téna //  
tád āhuḥ /  
yád dvādaśò 'gníḥ syād dvādaśáḥ stóma ékādaśa yū́pāḥ /  
yáthā sthúriṇā yāyā́t /  
tādṛ́k tát //  
ekavim̐śá evā́gníḥ syād íty āhuḥ /  
ekavim̐śáḥ stómaḥ /  
ékavim̐śatir yū́pāḥ /  
yáthā práṣṭibhir yā́ti /  
tādṛ́g evá tát //

### [3.8.21.4](https://indike.org/pramana/in.veda.brahmana.taittiriya.3.8.21.4)

yó vā́ aśvamedhé tisráḥ kakúbho véda /  
kakúd dha rā́jñāṃ bhavati /  
ekavim̐śò 'nír bhavati /  
ekavim̐śáḥ stómaḥ /  
ékavim̐śatir yū́pāḥ /  
etā́ vā́ aśvamedhé tisráḥ kakúbhaḥ /  
yá eváṃ véda /  
kakúd dha rā́jñāṃ bhavati //  
yó vā́ aśvamedhé trī́ṇi śīrṣā́ṇi véda /  
śíro ha rā́jñāṃ bhavati /  
ekavim̐śò 'gnír bhavati /  
ekavim̐śaḥ stómaḥ /  
ékavim̐śatir yū́pāḥ /  
etā́ni vā́ aśvamedhé trī́ṇi śīrṣā́ṇi /  
yá eváṃ véda /  
śíro ha rā́jñāṃ bhavati //

## Commentaries (4)

- [Taittirīyabrāhmaṇabhāṣya (Sāyaṇa)](https://indike.org/pramana/in.veda.brahmana.taittiriya!sayana.203.3.3) — Sāyaṇa, Sanskrit
- [Taittirīyabrāhmaṇakāṭhakabhāṣya](https://indike.org/pramana/in.veda.brahmana.taittiriya!bhatta-bhaskara-misra-cikaedamandana.2.83) — Bhaṭṭa Bhāskara Miśra Cikāeḍamaṇḍana, Sanskrit
- [Jñānayajña on the Taittirīya Brāhmaṇa (Bhaṭṭabhāskara)](https://indike.org/pramana/in.veda.brahmana.taittiriya!bhattabhaskara) — Bhaṭṭabhāskara Miśra, Sanskrit
- [Taittirīyabrāhmaṇaṭīkā](https://indike.org/pramana/in.veda.brahmana.taittiriya!taittiriyabrahmanatika) — Sanskrit

## Linked texts (1)

- [Aśvamedhabhāṣya](https://indike.org/pramana/in.veda.brahmana.asvamedhabhasya.2.84) — Bhaṭṭabhāskara Miśra, Sanskrit

---
Source: [https://indike.org/pramana/in.veda.brahmana.taittiriya.3.8.21](https://indike.org/pramana/in.veda.brahmana.taittiriya.3.8.21) · Pramāṇa