[Pramāṇa](https://indike.org/pramana/) › [Indian literature](https://indike.org/pramana/in) › [Vedic Literature](https://indike.org/pramana/in.veda) › [Brāhmaṇas (ritual exegesis)](https://indike.org/pramana/in.veda.brahmana) › [Taittiriyabrahmana](https://indike.org/pramana/in.veda.brahmana.taittiriya) › 3.8.2 # Taittiriyabrahmana 3.8.2 Taittirīyabrāhmaṇa 3.8.2 - **Language:** Sanskrit ### [3.8.2.1](https://indike.org/pramana/in.veda.brahmana.taittiriya.3.8.2.1) cátuṣṭayya ā́po bhavanti / cátuḥśapho vā́ áśvaḥ prājāpatyáḥ sámṛddhyai // tā́ digbhyáḥ samā́bhṛtā bhavanti / dikṣú vā́ ā́paḥ / ánnaṃ vā́ ā́paḥ / adbhyó vā́ ánnaṃ jāyate / yád evā́dbhyó 'nnaṃ jā́yate / tád ávarundhe // tā́su brahmaudanáṃ pacati / réta evá tád dadhāti // ### [3.8.2.2](https://indike.org/pramana/in.veda.brahmana.taittiriya.3.8.2.2) cátuḥśarāvo bhavati / dikṣv èvá práti tiṣṭhati // ubhayáto rukmáu bhavataḥ / ubhayáta evā́smin rúcaṃ dadhāti / úddharati śṛtatvā́ya / sarpíṣvān bhavati medhyatvā́ya / catvā́ra ārṣeyā́ḥ prā́śnanti / diśā́m evá jyótiṣi juhoti / catvā́ri híraṇyāni dadāti / diśā́m evá jyótīm̐ṣy ávarundhe // ### [3.8.2.3](https://indike.org/pramana/in.veda.brahmana.taittiriya.3.8.2.3) yád ā́jyam ucchíṣyate / tásmin raśanā́ṃ nyunatti / prajā́patir vā́ odanáḥ / réta ā́jyam / yád ā́jye raśanāṃ nyunátti / prajā́patim evá rétasā sámardhayati / darbhamáyī raśanā́ bhavati / bahú vā́ eṣá kucarò 'medhyám úpagacchati / yád áśvaḥ / pavítraṃ vái darbhā́ḥ // ### [3.8.2.4](https://indike.org/pramana/in.veda.brahmana.taittiriya.3.8.2.4) yád darbhamáyī raśaṇā́ bhávati / punā́ty evá\_enam / pūtám enaṃ médhyam ā́labhate // áśvasya vā́ ā́labdhasya mahimā́\_udakrāmat / sá mahártvijaḥ prā́viśat / tán mahartvijāṃ mahartviktvám / yán mahártvijaḥ prāśnánti / mahimā́nam evā́smin tád dadhati / áśvasya vā́ ā́labdhasya réta údakrāmat / tát suvárṇam̐ híraṇyam abhavat / yát suvárṇam̐ híraṇyaṃ dádāti / réta evá tád dadhāti / odané dadāti / réto vā́ odanáḥ / réto híraṇyam / rétasā\_evā́smin réto dadhāti // ## Linked texts (1) - [Mādhyandina](https://indike.org/pramana/in.veda.brahmana.satapatha*madhyandina.13.1.1.2) — Sanskrit --- Source: [https://indike.org/pramana/in.veda.brahmana.taittiriya.3.8.2](https://indike.org/pramana/in.veda.brahmana.taittiriya.3.8.2) · Pramāṇa