Taittiriyabrahmana 3.8.4
Taittirīyabrāhmaṇa 3.8.4
- Language
- Sanskrit
3.8.4.1
yáḥ pitúr anujā́yāḥ putráḥ /
sá purástān nayati /
yó mātúr anujā́yāḥ putráḥ /
sá paścā́n nayati /
víṣvañcam evā́smāt pāpmā́naṃ vívṛhataḥ //
yó árvantaṃ jíghām̐sati tám abhyàmīti váruṇa íti śvā́naṃ caturakṣáṃ prásauti /
paró mártaḥ paráḥ śvā́_íti śúnaś caturakṣásya práhanti /
śvā́_iva vái pāpmā́ bhrā́tṛvyaḥ /
pāpmā́nam evā́sya bhrā́tṛvyam̐ hanti //
saidhrakáṃ músalaṃ bhavati //
3.8.4.2
kárma_karma_evā́smai sādhayati //
paum̐ścaleyó hanti /
pum̐ścalvā́ṃ vái devā́ḥ śúcaṃ nyàdadhuḥ /
śucā_évā́sya śúcam̐ hanti //
pāpmā́ vā́ etám īpsatī́ty āhuḥ /
yò 'śvamedhéna yájata íti /
áśvasyādhaspadám úpāsyati /
vajrī́ vā́ áśvaḥ prājāpatyáḥ /
vájreṇa_evá pāpmā́naṃ bhrā́tṛvyam ávakrāmati //
dakṣiṇā́_apaplāvayati /
3.8.4.3
pāpmā́nam evā́smāt_śámalam ápaplāvayati //
aiṣīká udūhó bhavati /
ā́yur vā́ iṣī́kāḥ /
ā́yur evā́smin dadhati /
amṛ́taṃ vā́ iṣī́kāḥ /
amṛ́tam evā́smin dadhati //
vetasaśākhā́_upasáṃbaddhā bhavati /
apsúyonir vā́ áśvaḥ /
apsujó vetasáḥ /
svā́d evá_enaṃ yónir nírmimīte //
purástāt pratyáñcam abhyúdūhati /
purástād evā́smin pratī́cy amṛ́taṃ dadhāti //
aháṃ ca tváṃ ca vṛtrahann íti brahmā́ yájamānasya hástaṃ gṛhṇāti /
brahmakṣattré evá sáṃdadhāti /
abhí krátvā_indra bhūr ádha jmánn íty adhvaryúr yájamānaṃ vācayaty abhíjityai //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Linked texts (3)
- Aśvamedhabhāṣya — Bhaṭṭabhāskara Miśra, Sanskrit
- A Vedic Concordance — Maurice Bloomfield, English
- The Inner Conflict of Tradition: Essays in Indian Ritual, Kingship, and Society — J. C. Heesterman, English