Pramāṇa · Search · About · API

Taittiriyabrahmana 3.8.5

Taittirīyabrāhmaṇa 3.8.5

Language
Sanskrit

3.8.5.1

catvā́ra ṛtvíjaḥ sámukṣanti /
ābhyá eváinaṃ catasṛ́bhyo digbhyò 'bhísámīrayanti //
śaténa rājaputráiḥ sahā́dhvaryúḥ /
purástāt pratyáṅ tíṣṭhan prókṣati /
anénā́śvena médhyena_iṣṭvā́ /
ayám̐ rā́jā vṛtráṃ vadhyād íti /
rājyáṃ vā́ adhvaryúḥ /
kṣattrám̐ rājaputráḥ /
rājyéna_evā́smin kṣattráṃ dadhāti //
śaténārājábhir ugráiḥ sahá brahmā́ //

3.8.5.2

dakṣiṇatá údaṅ tíṣṭhan prókṣati /
anénā́śvena médhyena_iṣṭvā́ /
ayám̐ rā́jāpratidhṛṣyò 'stv íti /
bálaṃ vái brahmā́ /
bálam arājā́_ugráḥ /
bálena_evā́smin bálaṃ dadhāti //
śaténa sūtagrāmaṇíbhiḥ sahá hótā /
paścā́t prā́ṅ tíṣṭhan prókṣati /
anénā́śvena médhyena_iṣṭvā́ /
ayám̐ rā́jā_asyái viśáḥ //

3.8.5.3

bahugvái bahvaśvā́yai bahvajāvikā́yai /
bahuvrīhiyavā́yai bahumāṣatilā́yai /
bahuhiraṇyā́yai bahuhastíkāyai /
bahudāsapūruṣā́yai rayimátyai púṣṭimatyai /
bahurāyaspoṣā́yai rā́jā_astv íti /
bhūmā́ vái hótā /
bhūmā́ sūtagrāmaṇyàḥ /
bhūmnā́_evā́smin bhūmā́naṃ dadhāti //
śaténa kṣattasaṃgrahītṛ́bhiḥ saha_údgātā́ /
uttarató dakṣiṇā́ tíṣṭhan prókṣati //

3.8.5.4

anénā́śvena médhyena_iṣṭvā́ /
ayám̐ rā́jā sárvam ā́yur etv íti /
ā́yur vā́ udgātā́ /
ā́yuḥ kṣattasaṃgrahītā́raḥ /
ā́yuṣā_evā́sminn ā́yur dadhāti //
śatám̐_śataṃ bhavanti /
śatā́yuḥ púruṣaḥ śata_índriyaḥ /
ā́yuṣy evá_indriyé prátitiṣṭhati catuḥśatā́ bhavanti /
cátasro díśaḥ /
dikṣv èvá prátitiṣṭhati //

Commentaries (4)

Linked texts (6)