Pramāṇa · Search · About · API

Taittiriyabrahmana 3.8.6

Taittirīyabrāhmaṇa 3.8.6

Language
Sanskrit

3.8.6.1

yáthā vái havíṣo gṛhītásya skándati /
eváṃ vā́ etád áśvasya skandati /
yán niktám ánālabdham utsṛjánti /
yát stókyā anvā́ha /
sarvahútam eváinaṃ karoty áksandāya /
áskannam̐ hí tát /
yád dhutásya skándati //
sahásram ánvāha /
sahásrasaṃmitaḥ suvargó lokáḥ /
suvargásya lokásyābhíjityai //

3.8.6.2

yátpárimitā anubrū́yāt /
párimitam ávarundhīta /
áparimitā ánvāha /
áparimitaḥ suvargó lokáḥ /
suvargásya lokásya sámaṣṭyai //
stókyā juhoti /
yā́ evá várṣyā ā́paḥ /
tā́ ávarundhe //
asyā́ṃ juhoti /
iyáṃ vā́ agnír vaiśvānaráḥ /

3.8.6.3

asyā́m evá_enāḥ prátiṣṭhāpayati //
uvā́ca ha prajā́patiḥ /
stókyāsu vā́ ahám aśvamedhám̐ sám̐sthāpayāmi /
téna tátaḥ sám̐sthitena carāmī́ti //
agnáye svā́hā_íty āha /
agnáya eváinaṃ juhoti //
sómāya svā́hā_íty āha /
sómāya_eváinaṃ juhoti /
savitré svā́hā_íty āha /
savitrá eváinaṃ juhoti /

3.8.6.4

sárasvatyai svā́hā_íty āha /
sárasvatyā eváinaṃ juhoti /
pūṣṇé svā́hā_íty āha /
pūṣṇá eváinaṃ juhoti /
bṛ́haspátaye svā́hā_íty āha /
bṛ́haspátaya eváinaṃ juhoti /
apā́ṃ módāya svā́hā_íty āha /
adbhyá eváinaṃ juhoti /
vāyáve svā́hā_íty āha /
vāyáva eváinaṃ juhoti //

3.8.6.5

mitrā́ya svā́hā_íty āha /
mitrā́ya_eváinaṃ juhoti /
váruṇāya svā́hā_íty āha /
váruṇāya_eváinaṃ juhoti //
etā́bhya eváinaṃ devátābhyo juhoti //
dáśa_daśa saṃpā́daṃ juhoti /
dáśākṣarā virā́ṭ /
ánnaṃ virā́ṭ /
virā́jā_evā́nnā́dyam ávarundhe //
prá vā́ eṣò 'smā́l lokā́c cyavate /
yáḥ párācīr ā́hutīr juhóti /
púnaḥ_punar abhyāvártaṃ juhoti /
asmínn evá loké prátitiṣṭhati //
etā́m̐ ha vā́vá sò 'śvamedhásya sám̐sthitim uvācā́skandāya /
áskannam̐ hí tát /
yád yajñásya sám̐sthitasya skándati //

Commentaries (4)

Linked texts (3)