Taittiriyabrahmana 3.8.7
Taittirīyabrāhmaṇa 3.8.7
- Language
- Sanskrit
3.8.7.1
prajā́pataye tvā júṣṭaṃ prókṣāmī́ti purástāt pratyáṅ tíṣṭhan prókṣati /
prajā́patir vai devā́nām annādó vīryā̀vān /
annā́dyam evā́smin vīryàṃ dadhāti /
tásmād áśvaḥ paśūnā́m annādó vīryā̀vattamaḥ //
indrāgníbhyāṃ tvā_íti dakṣiṇatáḥ /
indrāgnī́ vái devā́nām ójiṣṭhau báliṣṭhau /
ója evā́smin bálaṃ dadhāti /
tásmād áśvaḥ paśūnā́m ójiṣṭho báliṣṭhaḥ //
vāyáve tvā_íti paścā́t /
vāyúr vái devā́nām āśúḥ sārasārítamaḥ //
3.8.7.2
javám evā́smin dadhāti /
tásmād áśvaḥ /
paśūnā́m āśúḥ sārasārítamaḥ //
víśvebhyas tvā devébhya íty uttaratáḥ /
víśve vái devā́ devā́nāṃ yaśasvítamāḥ /
yáśa evā́smin dadhāti /
tásmād áśvaḥ paśūnā́ṃ yaśasvítamaḥ //
devébhyas tvā_íty adhástāt /
devā́ vái devā́nām ápacitatamāḥ /
ápacitim evā́smin dadhāti /
tásmād áśvaḥ paśūnā́m ápacitatamaḥ //
3.8.7.3
sárvebhyas tvā devébhya íty upáriṣṭāt /
sárve vái devā́s tvíṣimanto harasvínaḥ /
tvíṣim evā́smin háro dadhāti /
tásmād áśvaḥ paśūnā́ṃ tvíṣimān harasvítamaḥ //
divé tvā_antárikṣāya tvā pṛthivyái tvā_íty āha /
ebhyá eváinaṃ lokébhyaḥ prókṣati //
saté tvā_ásate tvā_adbhyás tvā_óṣadhībhyas tvā víśvebhyas tvā bhutébhya íty āha /
tásmād aśvamedhayājínam̐ sárvāṇi bhutā́ny úpajīvanti //
brahmavādíno vadanti /
yát prājāpatyó 'śvaḥ /
átha kásmād enam anyā́bhyo devátābhyó 'pi prókṣatī́ti /
áśve vái sárvā devátā anvā́yattāḥ /
táṃ yád víśvebhyas tvā bhūtébhya íti prókṣáti /
devátā evā́sminn anvā́yātayati /
tásmād áśve sárvā devátā anvā́yattāḥ //
Commentaries (4)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
Linked texts (2)
- A Vedic Concordance — Maurice Bloomfield, English
- Aśvamedhabhāṣya — Bhaṭṭabhāskara Miśra, Sanskrit