Taittiriyabrahmana 3.8.8
Taittirīyabrāhmaṇa 3.8.8
- Language
- Sanskrit
3.8.8.1
yáthā vái havíṣo gṛhītásya skándati /
eváṃ vā́ etád áśvasya skandati /
yát prókṣitam ánālabdham utsṛjánti /
yád aśvacaritā́ni juhóti /
sarvahútam eváinaṃ karoty áskandāya /
áskannam̐ hí tát /
yád dhutásya skándati //
īṃkārā́ya svā́hā_ī́ṃkṛtāya svā́hā_íty āha /
etā́ni vā́ aśvacaritā́ni /
caritáir eváinam̐ sámardhayati //
3.8.8.2
tád āhuḥ /
ánāhutayo vā́ aśvacaritā́ni /
ná_etā́ hotavyā̀ íti /
átho khálv āhuḥ /
hotavyā̀ evá /
átra vā́vá_eváṃ vidvā́n aśvamedhám̐ sám̐sthāpayati /
yád aśvacaritā́ni juhóti /
tásmād dhotavyā̀ íti //
bahirdhā́ vā́ enam etád āyátanād dadhāti /
bhrā́tṛvyam asmai janayati //
3.8.8.3
yásyānāyatanè 'nyátrāgnér ā́hutīr juhóti /
sāvitriyā́ íṣṭyāḥ purástāt sviṣṭakṛ́taḥ /
āhavanī́ye 'śvacaritā́ni juhoti /
āyátana evā́sya_ā́hutīr juhoti /
nā́smai bhrā́tṛvyaṃ janayati //
tád āhuḥ /
yajñamukhé_yajñamukhe hotavyā̀ḥ /
yajñásya kŀ̥ptyai /
suvargásya lokásyānukhyātyā íti //
átho khálv āhuḥ /
3.8.8.4
yád yajñamukhé_yajñamukhe juhuyā́t /
paśúbhir yájamānaṃ vyàrdhayet /
áva suvargā́l lokā́t padyeta /
pā́pīyānt syād íti /
sakṛ́d evá hotavyā̀ḥ /
ná yájamānaṃ paśúbhir vyàrdhayati /
abhí suvargáṃ lokáṃ jayati /
ná pā́pīyān bhavati /
aṣṭā́catvārim̐śatam aśvarūpā́ṇi juhoti /
aṣṭā́catvārim̐śadakṣarā jágatī /
jā́gató 'śvaḥ prājāpatyáḥ sámṛddhyai //
ékam átiriktaṃ juhoti /
tásmād ékaḥ prajā́sv árdhukaḥ //
Commentaries (4)
- Taittirīyabrāhmaṇaṭīkā — Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
Linked texts (2)
- Mādhyandina — Sanskrit
- Aśvamedhabhāṣya — Bhaṭṭabhāskara Miśra, Sanskrit