Pramāṇa · Search · About · API

Taittiriyabrahmana 3.8.9

Taittirīyabrāhmaṇa 3.8.9

Language
Sanskrit

3.8.9.1

vibhū́r mātrā́ prabhū́ḥ pitrā_íty āha /
iyáṃ vái mātā́ /
asáu pitā́ /
ābhyā́m eváinaṃ páridadāti //
áśvo 'si háyo 'sī́ty āha /
śā́sty eváinam etát /
tásmāt_śiṣṭā́ḥ prajā́ jāyante /
átyo 'sī́ty āha /
tásmād áśvaḥ sárvān paśū́n átyeti /
tásmād áśvaḥ sárveṣāṃ paśūnā́m̐ śráiṣṭhyaṃ gacchati //

3.8.9.2

prá yáśaḥ śráiṣṭhyam āpnoti /
yá eváṃ véda //
náro 'sy árvā_asi sáptir asi vājy àsī́ty āha /
rūpám evā́sya_etán māhimā́naṃ vyā́caṣṭe //
yáyur nā́māsī́ty āha /
etád vā́ áśvasya priyáṃ nāmadhéyam /
priyéṇa_eváinaṃ nāmadhéyenābhívadati /
tásmād ápy ā_amitráu saṃgátya /
nā́mnā céd dhváyete /
mitrám evá bhavataḥ //

3.8.9.3

ādityā́nāṃ pátvā_ánvihī́ty āha /
ādityā́n eváinaṃ gamayati //
agnáye svā́hā svā́hā_indrāgnibhyām íti pūrvahomā́ñ juhoti /
pū́rva evá dviṣántaṃ bhrā́tṛvyam átikrāmati //
bhū́r asi bhuvé tvā bhávyāya tvā bhaviṣyaté tvā_íty útsṛjati sarvatvā́ya //
dévā āśāpālā etáṃ devébhyó 'śvaṃ médhāya prókṣitaṃ gopāyata_íty āha //
śatáṃ vái tálpyā rājaputrā́ devā́ āśāpālā́ḥ /
tébhya eváinaṃ páridadāti //
īśvaró vā́ áśvaḥ prámuktaḥ párāṃ parāvátaṃ gántoḥ /
ihá dhṛ́tiḥ svā́hā_ihá vídhṛtiḥ svā́hā_ihá rántiḥ svā́hā_ihá rámatiḥ svā́hā_íti catṛṣú patsú juhoti /

3.8.9.4

etā́ vā́ áśvasya bándhanam /
tā́bhir eváinaṃ badhnāti /
tásmād áśvaḥ prámukto bándhanam ā́gacchati /
tásmād áśvaḥ prámukto bándhanaṃ ná jahāti //
rāṣṭráṃ vā́ aśvamedháḥ /
rāṣṭré khálu vā́ eté vyā́yacchante /
yé 'śvaṃ médhyam̐ rákṣanti /
téṣāṃ yá udṛ́caṃ gácchanti /
rāṣṭrā́d evá té rāṣṭráṃ gacchanti /
átha yá udṛ́caṃ ná gácchanti //
rāṣṭrā́d evá té vyávacchidyante /
párā vā́ eṣá sicyate /
yò 'balò 'śvamedhéna yájate /
yád amítrā áśvaṃ vindéran /
hanyétāsya yajñáḥ /
catuśśatā́ rakṣanti /
yajñásyā́ghātāya //
áthānyám ānī́ya prókṣeyuḥ /
sā́_evá tátaḥ prā́yaścittiḥ //

Commentaries (4)

Linked texts (5)