Taittiriyabrahmana 3.9.1

Taittirīyabrāhmaṇa 3.9.1

Language: Sanskrit

3.9.1.1

prajā́patir aśvamedhám asṛjata /
sò 'smāt sṛṣṭó 'pākrāmat /
tám aṣṭādaśíbhir ánuprā́yuṅkta /
tám āpnot /
tám āptvā́_aṣṭādaśíbhir ávārundha /
yád aṣṭādaśína ālabhyánte /
yajñám evá táir āptvā́ yájamāno 'varundhe //
saṃvatsarásya vā́ eṣā́ pratimā́ /
yád aṣṭādaśínaḥ /
dvā́daśa mā́sāḥ páñc_ṛtávaḥ /

3.9.1.2

saṃvatsarò 'ṣṭādaśáḥ /
yád aṣṭādaśína ālabhyánte /
saṃvatsarém evá táir āptvā́ yájamānó 'varundhe //
agniṣṭhè 'nyā́n paśūn upākaróti /
itareṣu yū́peṣv aṣṭādaśínó 'jāmitvāya /
náva_nava_ā́labhyante savīryatvā́ya //
yád āraṇyáiḥ sám̐sthāpáyet /
vyávasyetāṃ pitāputráu /
vy ádhvānaḥ krāmeyuḥ /
vídūraṃ grā́mayor grāmāntáu syātām /

3.9.1.3

ṛkṣī́kāḥ puruṣavyāghrā́ḥ parimoṣíṇi āvyādhínīs táskarā áraṇyeṣv ā́jāyeran //
tád āhuḥ /
ápaśavo vā́ eté /
yád āraṇyā́ḥ /
yád āraṇyáiḥ sám̐sthāpáyet /
kṣipré yájamānam áraṇyaṃ mṛtám̐ hareyuḥ /
áraṇyāyatanā hy ā̀raṇyāḥ paśáva íti /
yát paśūn ná_ālábheta /
ánavaruddhā asya paśávaḥ syuḥ /
yát páryagnikṛtān utsṛjét /

3.9.1.4

yajñavaiśasáṃ kuryāt //
yát paśū́n ālábhate /
téna_evá paśū́n ávarundhe /
yát páryagnikṛtān utsṛjáty áyajñavaiśasāya /
ávaruddhā asya paśávo bhávanti /
ná yajñavaiśasáṃ bhavati /
ná yájamānam áraṇyaṃ mṛtám̐ haranti //
grāmyáiḥ sám̐sthāpayati /
eté vái paśávaḥ kṣémo nā́ma /
sáṃ pitāputrā́v ávasyataḥ /
sám adhvānaḥ krāmanti /
samantikáṃ grā́mayor grāmāntáu bhavataḥ /
ná_ṛkṣīkāḥ puruṣavyāghrā́ḥ parimoṣíṇa āvyādhínīs táskarā áraṇyeṣv ā́jāyante //

Commentaries (4)

Taittirīyabrāhmaṇaṭīkā — Sanskrit
Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
Taittirīyabrāhmaṇabhāṣya (Sāyaṇa) — Sāyaṇa, Sanskrit
Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit

Linked texts (3)

Mādhyandina — Sanskrit
Aśvamedhabhāṣya — Bhaṭṭabhāskara Miśra, Sanskrit
Die Religion des Veda — Hermann Oldenberg, German