Taittiriyabrahmana 3.9.12
Taittirīyabrāhmaṇa 3.9.12
- Language
- Sanskrit
3.9.12.1
áśvasya vā́ ā́labdhasya médha údakrāmat /
tád aśvastomī́yam abhavat /
yád aśvastomī́yaṃ juhóti /
sámedham eváinam ā́labhate //
ā́jyena juhoti /
médho vā́ ā́jyam /
médho 'śvastomī́yam /
médhena_evā́smin médhaṃ dadhāti //
ṣáṭtrim̐śataṃ juhoti /
ṣáṭtrim̐śad akṣarā bṛhatī́ /
3.9.12.2
bā́rhatāḥ paśávaḥ /
sā́ paśūnā́ṃ mā́trā /
paśū́n evá mā́trayā sámardhayati //
tā́ yád bhū́yasīr vā kánīyasīr vā juhuyā́t /
paśū́n mátrayā vyàrdhayet /
ṣáṭtrim̐śataṃ juhoti /
ṣáṭtrim̐śadakṣarā bṛhatī́ /
bā́rhatāḥ paśávaḥ /
sā́ paśūnā́ṃ mā́trā /
paśū́n evá mā́trayā sámardhayati //
3.9.12.3
aśvastomī́yam̐ hutvā́ dvipádā juhoti /
dvipā́d vái púruṣo dvípratiṣṭhaḥ /
tád enaṃ pratiṣṭháyā sámardhayati //
tád āhuḥ /
aśvastomī́yaṃ pū́rvam̐ hotavyā́3m̐ dvipádā́3 íti /
áśvo vā́ aśvastomī́yam /
púruṣo dvipádāḥ /
aśvastomī́yam̐ hutvā́ dvipádā juhoti /
tásmād dvipā́c cátuṣpādam atti /
átho dvipády evá cátuṣpadaḥ prátiṣṭhāpayati //
dvipádā hutvā́ /
nā́nyā́m úttarām ā́hutiṃ juhuyāt /
yád anyā́m úttarām ā́hutiṃ juhuyā́t /
prá pratiṣṭhāyāś cyaveta /
dvipádā antató juhoti prátiṣṭhityai //
Commentaries (5)
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Yajurbrahmaṇabhāṣya — Sāyaṇācārya, Sanskrit