Taittiriyabrahmana 3.9.13
Taittirīyabrāhmaṇa 3.9.13
- Language
- Sanskrit
3.9.13.1
prajā́patir aśvamedhám asṛjata /
sò 'smāt sṛṣṭó 'pākrāmat /
táṃ yajñakratúbhir ánvaicchat /
táṃ yajñakratúbhir nā́nvavindat /
támíṣṭibhir ánvaicchat /
tám íṣṭibhir ánvavindat /
tád íṣṭīnām iṣṭitvám /
yát saṃvatsarám íṣṭibhir yájate /
áśvam evá tád ánvicchati //
sāvitríyo bhavanti /
3.9.13.2
iyáṃ vái savitā́ /
yó vā́ asyā́ṃ náśyati yó niláyate /
asyā́ṃ vā́vá táṃ vindanti /
ná vā́ imā́m káś cana_íty āhuḥ /
tiryáṅ ná_ūrdhvó 'tyetum arhatī́ti /
yát sāvitríyo bhávanti /
savitṛ́prasūta eva_énam icchati //
īśvaró vā́ áśvaḥ prámuktaḥ párāṃ parāvátaṃ gántoḥ /
yát sāyáṃ dhṛ́tīr juhóti /
áśvasya yátyai dhṛ́tyai //
3.9.13.3
yát prātár íṣṭibhir yájate /
áśvam evá tád ánvicchati /
yát sāyáṃ dhṛ́tīr juhóti /
áśvasya_evá yátyai dhṛ́tyai /
tásmāt sāyáṃ prajā́ḥ kṣemyā́ bhavanti //
yát prātár íṣṭibhir yájate /
áśvam evá tád ánvicchati /
tásmād dívā naṣṭaiṣá eti /
yát prātár íṣṭibhir yájate sāyáṃ dhṛ́tīr juhóti /
ahorātrā́bhyām eváinam ánvicchati /
átho ahorātrā́bhyām evā́smai yogakṣemáṃ kalpayati //
Commentaries (5)
- Taittirīyabrāhmaṇaṭīkā — Sanskrit
- Taittirīyabrāhmaṇakāṭhakabhāṣya — Bhaṭṭa Bhāskara Miśra Cikāeḍamaṇḍana, Sanskrit
- Taittirīyabrāhmaṇabhāṣya (Sāyaṇa) — Sāyaṇa, Sanskrit
- Jñānayajña on the Taittirīya Brāhmaṇa (Bhaṭṭabhāskara) — Bhaṭṭabhāskara Miśra, Sanskrit
- Yajurbrahmaṇabhāṣya — Sāyaṇācārya, Sanskrit